Read Central Malay 2 KURINTUS 1 Bible Online

2 KURINTUS 1 - Central Malay bible

2 KURINTUS 1

¹Jak di aku, Paulus diau njadi rasul Yesus Keristus karnau kendak Allah, jak di kantin kitau Timutius, batan endak jemau Keristen di Kurintus ngan gegalau jemau percayau diau adau di Akaya.

²Kami bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai.

³Tepujila Allah, Bapak Tuhan kitau Yesus Keristus. Diaula Bapak diau iluak nianan ngan maju nulung ngan neguaka kitau.

⁴Diau neguaka kami ngadapi gegalau tanggungan, mangku kami pacak neguaka jemau diau meghasauka bemecam-mecam tanggungan ngan carau diau semegi luak kami la diteguaka Allah.

⁵Tanggungan diau dighasauka Keristus la banyak pulau kami ghasauka, mangku karnau Keristus pulau kami diteguaka nian.

⁶Amun kami sengsarau, itu batan endak neguaka kamu, supayau kamu selamat. Amun kami diteguaka, kamu pulau diteguaka, mangku kamu ta'an ngan ngaligh nanggungka sengsarau diau luak kami tanggungka pulau.

⁷Kami maju yakin ngan kamu, nidau kekela asau-asau, karnau kami keruan, bansau kamu diau ngikut sengsarau ngan kami mbak kini, ka ngikut pulau diteguaka luak kami.

⁸Kami endak, supayau kamu ngeruani gegalau sengsarau diau kami ghasauka di perupinsi Asia Keciak. Kami meghasau tanggungan diau kami ghasaukatu beghat igau, mangku kami nidau bediau aghapan agi ka idup.

⁹Kami meghasau luak la diukum mati. Anyautu titu tejadi, supayau kami jangan ngandalka diri kami, tapitu ngandalka Allah diau ngidupka jemau mati.

¹⁰Diautu la nyelamatka kami jak di bayau maut diau nakutka. Diau pulau ka nyelamatka kami nanti, karnau Diau itula kami aghapka.

¹¹Kami percayau, bansau karnau du'a kamu batan endak kami, Allah ka nyelamatka kami agi jak di bayau. Allah ndengaghka du'a jemau banyak, mangku iluak ngan kami. Mangku banyak jemau ka beterimau-kasia ngan Diau.

¹²Kami bangga, karnau diyakinka ati keciak kami, bansau gegalaunyau diau kami kerjauka di deniau ini terutamau ngan kamu, la kami kerjauka ngan jujur ngan beresia di adapan Allah. Kami ngerjaukanyau ukan ngan pengertian manusiau, tapitu ngan kekuatan jak di Allah.

¹³Kami cuman nulis ngan kamu setu diau pacak kamu bacau ngan terti. Mbak kini kamu la ngerti separau, mangku kami ngaghap nanti kamu ka ngeruani kami nian. Mangku masau Tuhan Yesus datang nanti, kamu ka bangga karnau kami, luak kami pulau bangga karnau kamu.

¹⁵Karnau aku yakin nian ngan titu, mangku aku la merencanauka endak berayak ngan kamu, supayau kamu nerimau sayang Allah lebia banyak agi.

¹⁶La udim itu aku endak melajuka pejalanan ke Makedunia, mangku jak di situ ngelipat singga agi ngan kamu. Mangku kamu pacak nulung aku melajuka pejalananku ke Yudia.

¹⁷Anyautu rencanaukutu la beghuba. Apu itu bereti, bansau pendirianku nidau benagh? Apu aku mbuat rencanau nurut kendakkunila, mangku kekadangan aku ngiciakka “au” kekadangan “nidau”?

¹⁸Demi Allah diau pacak dipercayaui janjiku ngan kamu ukan “au” ngan “nidau”.

¹⁹Karnau Yesus Keristus, Anak Allah, diau dikiciakka aku, Silas ngan Timutius ngan kamu ukan “au” ngan “nidau”. Di Diau cuman adau “au”.

²⁰Gegalau janji la “au” galau dalam Keristus. Karnau itu kitau ngiciakka “nyela nian” endak ngagungka Allah karnau Diau.

²¹Allah itula diau la mbuat kami ngan kamu seghundak nian ngan Keristus. Diau pulau la milia kitau.

²²Diau la nandaui kitau njadi ha'Au ngan ngenjuakka RuaHau dalam ati kitau. Titu jaminan, bansau Diau ka ngenjuakka gegalaunyau diau la dijanjikaNyau batan endak kitau.

²³Allah ngeruani aku. Diau keruan, bansau aku nidau lasung ke Kurintus, karnau aku nidau endak mbingungka kamu.

²⁴Kami nidau endak masau kamu ngan setu diau mesti kamu percayaui, karnau kamu la percayau nian ngan Keristus. Kami cuman endak sesamau bekerjau ngan kamu batan endak meriangka kamu.