Read Central Malay 2 KURINTUS 11 Bible Online

2 KURINTUS 11 - Central Malay bible

2 KURINTUS 11

¹Enangka kerjauku diau bang bigal ini. Asauku bulia.

²Aku nyanauka kamu nian luak Allah nyanauka kamu. Aku la njanjika kamu ngan Keristus. Mangku aku endak, supayau kamu maju beresia luak sughang gadis beresia enggut aghi nika.

³Anyautu aku ghegak rupu'an kamu disesatka, nidau agi ta'at ngan Keristus, luak Hawa senitu pulau disesatka kecalakan ulagh.

⁴Rupaunyau kamu riang nerimau jemau diau datang guak kamu ngan ngiciakka ceritau Yesus diau lain, ukan Yesus diau kami kiciakka ngan kamu. Kamu pulau endak nerimau rua ngan ceritau diau lain nian ngan Rua Allah ngan ceritau iluak diau kamu terimau jak di kami.

⁵Dikit kiala aku nidau meghasau inau jak di rasul-rasul diau hibat itu.

⁶Asauku aku kurang pacak nian ngiciak, tapitu amun ngeruani ceritau Allah ukan aku nidau pacak, la kami buktika ngan kamu ngan gegalaunyau.

⁷Aku la ngiciakka ceritau iluak jak di Allah ngan kamu, nidau mintak dibayighi dikit kiala. Aku nginauka diriku endak ninggika kamu. Apu itu salaku ngan kamu?

⁸Masau aku kerjau batan endak kamu, aku dibayighi jemau Keristen lainau. Pacak dikiciakka aku merugika jemautu, mangku pacak nulung kamu.

⁹Amun aku dang nidau betanci, aku nidau kekela nyusaka sughang kia jak di kamu. Gegalaunyau diau aku enda'au disediauka kantin-kantin diau datang jak di Makedunia. Aku njagau nian, mangku nidau njadi beban kamu. Mangku aku njagau, supayau maju luak itu.

¹⁰Karnau ajaghan Keristus diau benagh adau di aku, nidau sughang kiala di gegalau daira Akaya pacak melengitka kebanggaanku itu.

¹¹Ngapau luak itu? Apu aku nidau nyayangi kamu? Allah keruan aku nyayangi kamu.

¹²Setu diau kukerjauka mbak kini ka maju kukerjauka, supayau rasul diau lainautu nidau bediau tapakan endak muji diriau ngan ngiciakka, bansau ughangtu bekerjau ngan carau luak kami.

¹³Ughangtu cak rasul. Ughangtu bekerjau ngan mbu'ungi jemau, ughangtu luluak rasul Keristus.

¹⁴Nidau nanti kemangan ughangtu ngerjauka titu. Iblis pulau luluak malaikat terang.

¹⁵Mangku nidau nanti kemangan, amun anak-bua iblis luluak anak-bua Allah. Udim-udimau ughangtu ka nerimau balasan diau setimpal ngan kerjaunyautu.

¹⁶Kukiciakka sekali agi: Jangan adau diau nganggap aku bigal. Anyautu amun nyela adau diau nganggap aku bigal, terimaula aku luak jemau bigal. Mangku nengkela aku diau bigalni muji diriku dikit.

¹⁷Ka kukiciakka kebanggaanku luak jemau bigal. Ukan Tuhan diau ngajung aku ngiciakkanyau. Aku ngiciak luak jemau bigal.

¹⁸Banyak jemau muji diriau ngan carau deniau. Aku endak pulau muji diriku.

¹⁹Kamu ngaligh nian ngan jemau bigal, karnau kamu meghasau pintar.

²⁰Kamu nerimau nian, amun jemau mbudakka kamu, amun jemau nguasaui ngan ngambiak untung banyak jak di kamu, amun jemau nganggap diriau lebia jak di kamu ngan beghani nampagh kamu.

²¹Aku maluan ngaku'i, bansau kami nidau pacak ngerjauka titu. Anyautu setu diau jemau lain beghani mbanggaka, aku mbanggaka pulau. Akuni ngiciak luak jemau bigal.

²²Ughangtu jemau Ibrani, aku pulau jemau Ibrani! Ughangtu jemau Israil, aku pulau jemau Israil! Ughangtu pengadau Abraham, aku pulau pengadau Abraham!

²³Apu ughangtu bekerjau batan endak Keristus? Aku ngiciak luak jemau gilau, iluakla aku sangkan gegalau ughangtu. Nemanla aku bekerjau, rajinla aku dijilka. Banyakla aku disaraui ngan rajin sengkiap mati.

²⁴Limau kali aku dibaduki jemau Yahudi, idang kali tigau pulua sembilan.

²⁵Tigau kali aku dipeciti jemau Rum. Aku pulau digutuki ngan batu. Tigau kali ngalami kapal tebenak, saghi semalam aku tuapung-apung di tenga laut.

²⁶Amun aku bejalan, aku rajin ngadapi bayau, bayau ayiak merampus, bayau perampuk, bayau jak di jemau Yahudi, bayau jak di jemau ukan Yahudi, bayau di kuta, bayau di padang, bayau di laut ngan bayau jak di jemau diau ngiciakka diriau jemau Keristen awuak ukan.

²⁷Aku mbanting tulang ngan beusaha mati-matian, rajin nidau tiduak. Aku keruan lapagh ngan aus, rajin nidau makan, kedinginan ngan nidau bediau baju.

²⁸Lain jak di gegalaunyautu aku idang aghi temas merupuakka gegalau jemau Keristen.

²⁹Amun adau diau nidau tegua, aku meghasau pulau nidau tegua. Amun adau diau celakau ngan dusau, atiku madak nian karnau maluan.

³⁰Amun aku mesti mbanggaka diriku, aku endak mbanggaka kuranganku.

³¹Allah, Bapak jak di Yesus, Tuhan kitau, keruan aku nidau mbu'ung. Tepujila namaunyau selelamaunyau.

³²Masau aku di Damsik, gubernur diau ditetapka rajau Aretas ngajung tenterahau njagau mukau lawang kutatu endak nangkap aku.

³³Anyautu aku ditughunka jak di tebuak dinding kutatu pakai kinjagh, mangku aku luput jak di tangan ughangtu.