Read Central Malay 2 KURINTUS 4 Bible Online

2 KURINTUS 4 - Central Malay bible

2 KURINTUS 4

¹Kami nerimau tugas itu, karnau Allah itu iluak. Karnau itu kami nidau tekedan.

²Kami enggup nggunauka carau gelap diau maluka. Kami nidau nipuka jemau ngan nidau ngubai katau Allah. Kami ngiciakka kendak Allah ngenianau. Mangku teserala ngan jemau endak nilai kami dalam ati keciak di adapan Allah.

³Mangku amun ceritau iluak diau kami kiciakkatu masia pulau jemau nidau terti, itu cuman jemau diau ka benasau diau nidau ngerti.

⁴Ughangtu nidau percayau, karnau rua iblis diau nguasaui deniauni ngalangi rupu'an, supayau nidau ngerti ngan nidau nginak terang jak di ceritau iluaktu, ceritau keagungan Keristus diau luak gambaran Allah.

⁵Ceritau diau kami kiciakkatu ukan nceritauka kaminila. Ceritautu nceritauka Yesus Keristus, bansau Diautu Tuhan, mangku kamini njadi budak kamu karnau Keristus.

⁶Allah la bekatau, “Jak di keleman ka nimbul terang.” Allah itu pulau nimbulka terang di ati kitau, supayau rupu'an kitau njadi terang mangku ngeruani keagungan Allah diau kina'an di dayi Keristus.

⁷Retau sergau itu adau di kami diau nidau beregautu diau luak guci dibuat jak di tana, mangku nyatau, bansau kuasau injil diau besaktu asalau jak di Allah ukan jak di kamini.

⁸Kami diluatka di manau-manau, tapitu kami nidau nyera. Kami bingung, tapitu nidau putus aghapan.

⁹Kami disaraui, tapitu nidau kekela dienangka kami ajau. Kami diempaska enggut rubua, tapitu nidau mati.

¹⁰Kami maju meghasauka kematian Yesus di badan kami, mangku idupAu pulau ka nyatau di badan kami.

¹¹Empungan gi idup, kami maju dalam bayau maut karnau Yesus, mangku idup Yesus pulau dinyatauka di badan kami diau pacak mati.

¹²Kami maju dalam bayau maut, mangku kamu bulia idup.

¹³Di Injil ditulis katau ini, “Aku percayau, karnau itu aku ngiciak.” Mangku kami percayau. Karnau itu kami pulau ngiciak.

¹⁴Kami keruan, bansau Allah diau la ngidupka Tuhan Yesus ka ngidupka kami pulau ngan Yesus. Diau ka mbata'i kami ngan kamu pulau ke adapanNyau.

¹⁵Gegalaunyautu batan endak kamu. Karnau tamba banyak jemau meghasauka keilu'an Allah, tamba banyak pulau du'a beterimau-kasia ngan Allah, mangku Allah diagungka.

¹⁶Itula sebapau kami nidau tekedan. Empuak badan kami tamba guyuk, ati kami maju diteguaka.

¹⁷Mangku tanggungan diau mbak kini kami ghasauka nidau sebeghapau. Itu ka ngasilka keriangan selelamaunyau diau jawua lebia besak, amun dibandingka ngan penanggungantu.

¹⁸Kami nidau nyanauka setu diau kina'an, tapitu setu diau nidau kina'an, karnau diau kina'an jerang ajau, diau nidau kina'an selelamaunyau.