Read Central Malay 2 KURINTUS 5 Bible Online

2 KURINTUS 5 - Central Malay bible

2 KURINTUS 5

¹Badan kitau diumpamauka ngan anjung. Mangku kitau keruan, amun anjung diau kitau tunggu di deniauni la dileghak, Allah nyediauka ghuma di sergau batan endak kitau diau nidau dibuat jemau mangku ta'an selelamaunyau.

²Semasau kitau gi adau di anjung ini, kitau madak ngan nyempit, karnau kitau ghindu nian endak mendam di ghuma kitau di sergau.

³Ghumatu badan kitau diau empai, mangku kitau telindung.

⁴Semasau gi adau di anjung di deniauni, kitau nyempit karnau tanggungan diau beghat ini. Kitau endak mendam di ghuma di sergau ukan karnau endak bibas jak di badan kitau di deniauni, tapitu karnau kitau endak ngenauka badan diau jak di sergautu, mangku badan kitau diau pacak mati ini digenti ngan diau idup.

⁵Allah nyediauka kitau batan endak itu, mangku Diau ngenjuakka RuaHau ngan kitau njadi jaminan gegalaunyau diau la disediauka batan endak kitau.

⁶Mangku kami maju meghasau tegua, empuak kami keruan, semasau kami gi mendam di badan kamini, kami gi jawua jak di ghuma diau ka kami tunggu ngan Tuhan.

⁷Kami idup karnau percayau, ukan karnau nginak.

⁸Karnau itu ati kami tegua. Kami endak nian bibas jak di badan kamini, mangku pacak mendam ngan Tuhan.

⁹Mangku kami beusaha nian melemakka atiAu, empuak kami mendam di anjung kami di sini, empuak di situ.

¹⁰Karnau gegalau kitau ka diadili Keristus, mangku bilang jemau ka nerimau balasan diau setimpal nurut peremba'au di deniauni, empuak iluak empuak ja'at.

¹¹Kami keruan retiau takut ngan Tuhan. Karnau itu kami beusaha meyakinka jemau. Allah keruan ati kami, mangku aku ngaghap kamu pulau keruan kami dalam ati kamu.

¹²Ngan kici'an ini kami nidau mintak dipuji. Kami cuman endak nunjuakka jalan iluak, mangku kamu bangga karnau kami, mangku pacak nimbali jemau diau mentingka rupau ukan ati.

¹³Amun kami kina'an luak gilau, titu batan endak Allah. Amun kami kina'an waras, titu batan endak kamu.

¹⁴Kasia Keristus nguasaui kami, mangku kami keruan, amun sughang la mati batan gegalau jemau, mangku itu bereti gegalau jemau la mati.

¹⁵Keristus la mati batan endak gegalau jemau, mangku jemau diau idup nidau agi idup batan endak diriau, tapitu batan endak Keristus diau la mati ngan la diidupka agi batan endak ughangtu.

¹⁶Karnau itu kami nidau agi ngeruani jemau nurut rupu'an manusiau. Nyela, senitu kami ngeruani Keristus nurut rupu'an manusiau, tapitu mbak kini nidau agi.

¹⁷Amun jemau la seghundak ngan Keristus, diau njadi manusiau empai. Idup diau lamau nidau bediau agi, gegalaunyau la njadi empai.

¹⁸Gegalaunyautu dikerjauka Allah. Mangku karnau Keristus Allah mbuat kitau seilu'an ngan Diau ngan ngenju'i kitau kerjau ngiciakka ceritau damaitu, supayau jemau lain pulau seilu'an ngan Diau.

¹⁹Kami ngiciakka, bansau Allah mbuat manusiau seilu'an ngan Diau karnau Keristus. Allah ngerjauka titu nidau nuntut dusau jemau. Mangku kami la ditugaska ngiciakka ceritau damaitu.

²⁰Kamini diajung Keristus. Mangku amun kami ngiciak, itu luak Allah ngiciak ngan kamu. Atas namau Keristus kami mintak nian, terimaula kasia Allah diau mbuat kamu seilu'an ngan Diau.

²¹Keristustu nidau bedusau. Anyautu Allah ngajung Diau nanggungka dusau kitau, supayau kitau dibenaghka karnau seghundak ngan Keristus.