Read Central Malay 2 KURINTUS 9 Bible Online

2 KURINTUS 9 - Central Malay bible

2 KURINTUS 9

¹Sebenaghau nidau nanti kutuliska agi ceritau kumpulan tanci batan endak umat Allah di Yudia.

²Aku keruan kamu galak nulung, mangku aku muji kamu di adapan jemau Makedunia. Aku la ngiciakka ngan ughangtu, bansau jak taun empaini kantin kitau di Akaya la siap ngenjuakka tanci. Mangku kerjau kamu mbuat banyak jemau endak nulung pulau.

³Mbak kini aku ngajung Titus ngan kantinautu njenguak kamu, supayau setu diau kami banggaka ceritau kamu jangan njadi kici'an mbu'ung. Kamu mesti siap, karnau la kukiciakka ngan ughangtu, bansau kamu la siap.

⁴Amun jemau Makedunia datang serempak ngan aku nanti, jangan ughangtu nemuni kamu lum siap. Alaka maluannyau kamini nanti, karnau la percayau nian ngan kamu. Kamu pulau ka maluan.

⁵Itula sebapau aku ngajung ughangtu dulu pegi endak ngurus kumpulan tanci diau la kamu janjikatu. Mangku amun aku datang, tancitu la tekumpul, mangku tenyatau kamu ngenjuak ngan riang, ukan karnau tepasau.

⁶Ingatkala, jemau diau nanamka benia dikit ka dikit pulau dapat asilau. Jemau diau nanamka banyak benia ka banyak pulau asilau.

⁷Bilang jemau mesti ngenjuak nurut kenda'au, jangan ngan asau-asauan, jangan meghasau tepasau, karnau Allah nyayangi jemau diau ngenjuak ngan riang.

⁸Allah bekuasau ngenjuakka ngan kamu setu diau iluak banyak tegalau, mangku setu diau kamu enda'au maju adau galau, lagi ka lebia batan endak bebuat lebia iluak agi.

⁹Di Injil ditulis, “Diau banyak ngenjuak ngan jemau serik. Keilu'an atiAu batan endak selelamaunyau.”

¹⁰Allah nyediauka benia ngan tukang tanam ngan makanan batan endak kitau. Diau pulau ka nyediauka banyak benia batan endak kamu nanam, ka dibuat banyak asilau, mangku keilu'an ati kamu ka tamba banyak pulau.

¹¹Ngan carau luak itu kamu ka serbau cukup, mangku kamu maju pacak ngenjuak ngan riang. Mangku banyak jemau ka beterimau-kasia ngan Allah, karnau enju'an kamu diau kami agiaka.

¹²Kerjau iluak diau kamu kerjaukatu ncukupi umat Allah diau kurangan, mangku pulau mbuat banyak jemau beterimau-kasia ngan Allah.

¹³Karnau keilu'an diau kamu nyataukatu banyak jemau Keristen di Yudia ka muji Allah, karnau nginak kamu ta'at ngan ceritau iluak jak di Keristus diau kamu ikutitu. Ughangtu ka muji Allah pulau, karnau kamu iluak ngan ngenjuak setu diau adau di kamu ngan gegalau jemau.

¹⁴Mangku ughangtu ka ndu'aka kamu ngan sayang nian ngan kamu, karnau Allah iluak nian ngan kamu.

¹⁵Terimau-kasia ngan Allah, karnau enju'anNyau diau iluak nianantu.