Read Central Malay GALATIA 1 Bible Online

GALATIA 1 - Central Malay bible

GALATIA 1

¹Batan endak kantin-kantin kami jemau Keristen di perupinsi Galatia. Aku, Paulus, sughang rasul nulis surat ini. Aku njadi rasul ukan karnau dikenda'i manusiau ukan pulau karnau diajung jemau, tapitu karnau kendak Yesus Keristus ngan Allah Bapak diau la ngidupka Diautu jak di mati. Gegalau kantin kitau diau adau seghundak ngan aku bepesan ngan kamu.

³Kami bedu'a, supayau Allah, Bapak kitau, ngan Tuhan Yesus Keristus iluak nian ngan ngenjuakka damai ngan kamu.

⁴Keristus na'ati kendak Allah Bapak kitau, mangku Diau nyeraka nyawauNyau batan endak dusau-dusau kitau, supayau kitau diselamatka jak di deniau diau ja'at ini.

⁵Tepujila Diau selelamaunyau! Amin.

⁶Aku kemangan ngan kamu. Kamu dipilia Allah, karnau Keristus sayang ngan kamu. Anyautu mbak kini kamu cepat nian nyimpang jak di Diau mangku ngikut ceritau iluak diau lain.

⁷Sebenaghau nidau bediau injil lain. Anyautu adau jemau diau ngacauka kamu, endak ngubai ceritau iluak jak di Keristus.

⁸Amun adau jemau diau ngiciakka ceritau iluak diau lain jak di ceritau iluak diau la kami kiciakkatu ngan kamu, empuak jemautu jak di kaminila, empuak malaikat jak di sergau, nengkela jemautu didawaika Allah.

⁹Luak diau la kami kiciakka, mbak kini kukiciakka agi: Amun adau jemau diau ngiciakka injil lain jak di ceritau iluak diau la kamu terimau jak di kami, jemautu didawaika.

¹⁰Luak manau akuni? Apu aku ngaghapka diregaui manusiau? Ukan, dikit kiala nidau. Aku cuman ngaghapka diregaui Allah. Apu aku beusaha melemakka ati manusiau, mangku dipuji jemau? Amun aku masia ngerjauka kerjau luak itu, aku ukan budak Keristus.

¹¹Kantin-kantinku, kamu mesti ngeruani, bansau ceritau iluak diau kukiciakkatu asalau ukan jak di manusiau.

¹²Aku nidau nerimaunyau jak di manusiau. Nidau sughang kia ngajaghkanyau ngan aku, tapitu Yesus Keristus nyataukanyau ngan aku.

¹³Cengki kamu la ndengagh ceritau idupku senitu. Aku sughang diau ngikut agamau Yahudi ngenianau. Ngan kejam aku nganiayau jemau Keristen ngan beusaha ngabiskanyau.

¹⁴Aku lebia ta'at jak di banyak jemau Yahudi diau sebayau njalanka agamauku. Aku rajin nian ngikuti adat lembagau niniak puyang kami.

¹⁵Anyautu karnau keilu'an atiAu Allah milia aku, antak ka aku adau mangku ngajung aku bekerjau batan endak Diau.

¹⁶Allah nyatauka Ana'Au ngan aku, supayau ceritau Ana'Autu pacak kukiciakka ngan jemau bangsau lain. Masau itu aku nidau mintak pendapat ngan sughang kiala.

¹⁷Aku nidau pulau pegi njenguak jemau di Yerusalim diau la lamau jak di aku njadi rasul. Anyautu aku pegi ke nenggeri Arab, mangku jak di situ ngulang ke Damsik agi.

¹⁸Tigau taun la udim itu, aku pegi ke Yerusalim endak betemu ngan Pitrus. Aku berayak ngan diau cuman limau belas aghi.

¹⁹Aku nidau betemu ngan rasul diau lain, selain Yakubus, ading Tuhan Yesus.

²⁰Setu diau kutulis ini benagh. Allah keruan, aku nidau mbu'ung.

²¹La udim itu aku pegi ke daira Siria ngan Kilikia.

²²Masau itu jemau Keristen di Yudia lum kecinauan nian aku.

²³Ughangtu cuman ndengagh, bansau jemau diau senitu nganiayau ughangtu mbak kini ngiciakka ceritau iluak diau senitu endak diabiskanyau.

²⁴Mangku ughangtu muji Allah karnau aku.