Read Central Malay GALATIA 3 Bible Online

GALATIA 3 - Central Malay bible

GALATIA 3

¹Ui jemau Galatia, kamu bigal nian! Kamu tepengarua ngan sapau? Keristus diau la mati di kayu saliptu la kamu keruan nian.

²Cubau kiciakka ngan aku diau sutiak ini: Apu kamu nerimau Rua Allah karnau na'ati ukum Taurat, apu karnau ndengagh ceritau iluak jak di Allah ngan percayau ngan Keristus?

³Ngapau kamu bigal nian? Kamu la mulai idup empai ngan Rua Allah. Baghia mbak kini kamu endak maju idup enggut udim ngan usaha kamu sendighi?

⁴Apu nidau bediau gunaunyau ngan gegalaunyau diau la kamu ghasauka itu? Baghia nidau bediau gunaunyau.

⁵Allah ngenjuakka RuaHau ngan kamu ngan mbuat banyak tandau nyelia di guak kamu. Apu Allah ngerjauka titu karnau kamu na'ati ukum Taurat, apu karnau ndengagh ceritau iluaktu ngan percayau ngan Keristus?

⁶Itu semegi luak diau ditulis di Injil ceritau Abraham, “Abraham percayau ngan Allah. Karnau itu diau diterimau Allah njadi jemau benagh.”

⁷Amun luak itu, kamu keruan, bansau jemau diau pengadau Abraham nian jemau diau percayau ngan Allah.

⁸Jak di senitu kitab Injil la keruan, bansau Allah mbenaghka jemau diau ukan Yahudi karnau percayau ngan Diau. Ceritau iluak itu la dikiciakka senitu ngan Abraham ngan janji ini, “Karnau kaba, Allah ka iluak ngan gegalau bangsau.”

⁹Abraham percayau, mangku diau disayangi. Luak itu pulau gegalau jemau diau percayau ka disayangi semegi ngan Abraham.

¹⁰Jemau diau bepaut ngan ukum Taurat idup ngan dawaian. Karnau di Injil ditulis, “Jemau diau nidau nuruti gegalaunyau diau ditulis dalam kitab Taurat didawaika Allah.”

¹¹Nidau sughang kia ka dibenaghka Allah karnau na'ati ukum Taurat. Titu la dinyatauka dalam Injil, “Jemau diau la dibenaghka karnau percayau ka idup nian.”

¹²Anyautu ukum Taurat nidau bepaut ngan iman, tapitu jemau diau nuruti ukumtu ka idup karnau kerjaunyautu.

¹³Keristus mbibaska kitau jak di dawaian ukum Taurattu. Diau ngerjauka titu ngan ngenangka diriAu didawaika karnau kitau. Karnau di Injil ditulis, “Jemau diau mati digerintungka di kayu didawaika.”

¹⁴Yesus Keristus ngerjauka titu, supayau keilu'an Allah diau dijanjikaNyau ngan Abrahamtu dienjuakka pulau ngan jemau ukan Yahudi. Ngan carau luak itu gegalau kitau diau percayau nerimau Rua diau dijanjika Allah.

¹⁵Kantin-kantinku, nengkela aku ngiciakka cuntau jak di idup kitau. Amun duau jemau bejanji ngan janjitu la disahka, mangku nidau sughang kia pacak mbatalka janjitu ngan namba tuapau kila.

¹⁶Janji-janji Allah dijanjikaNyau ngan Abraham ngan jemau pengadau Abraham. Di Injil nidau ditulis, “ngan pengadau-pengadau Abraham”, retiau banyak jemau. Diau ditulis di situ, “ngan jemau pengadau kaba”, retiau gi sughang ajau, diautu Keristus.

¹⁷Diau endak kukiciakka di sini: Janji Allah la disahka senitu. Ukum Taurat empai dienjuakka empat ratus tigau pulua taun udim itu. Ukumtu nidau pacak mbatalka ngan ngabiska janji itu.

¹⁸Amun pengenjuak Allah bepaut ngan ukum Taurat, itu ukan agi pengenjuak diau dijanjikatu. Tapitu karnau Allah la njanjikanyau ngan Abraham, mangku dienjuakkaNyau ngan diau.

¹⁹Amun luak itu, batan tuapau ukum Taurattu dienjuakka? Ukumtu ditambaka batan endak nyatauka pelanggaran manusiau. Ukum Taurattu dijalanka cuman enggut pengadau diau dikiciakkatu datang. Ukum itu disampaika malaikat ngan sughang jemau diau njadi pengantarau.

²⁰Pengantarau cuman penting, amun adau duau pihak. Anyautu Allah itu sutiak.

²¹Amun luak itu, apu ukum Taurat belawanan ngan janji Allah? Nidau ka adau! Karnau misalau ukum Taurat dienjuakka batan endak bulia idup, mangku manusiau dibenaghka karnau nuruti ukumtu.

²²Anyautu di Injil la ditulis, bansau gegalau manusiau la dikuasaui dusau, mangku setu diau dijanjika Allah dienjuakka ngan jemau diau percayau ngan Keristus, karnau janjitu cuman dienjuakka ngan jemau amun percayau.

²³Antak ka masaunyau jemau pacak percayau ngan Keristus, kitau dipasau ukum Taurat, luak dikurungka. Udim itu dinyatauka carau kitau percayau ngan Keristus.

²⁴Mangku ukum Taurat njadi penjagau kitau, enggut Keristus datang endak mbenaghka kitau, karnau kitau percayau ngan Diau.

²⁵Mbak kini la masaunyau manusiau pacak percayau ngan Keristus, mangku kitau nidau agi dijagaui ukum itu.

²⁶Gegalau kamu la percayau ngan Yesus Keristus, mangku kamu la seghundak ngan Diau ngan njadi anak-anak Allah.

²⁷Gegalau kamu la dibaptis dalam namau Keristus, mangku kamu la nerimau sipat Keristus.

²⁸Mangku nidau bediau bidahau, empuak jemau Yahudi empuak jemau ukan Yahudi, empuak budak empuak jemau bibas, empuak tinau empuak lanang. Gegalaunyau semegi karnau Yesus Keristus.

²⁹Mangku amun kamu hak Keristus, kamu pulau pengadau Abraham, mangku kamu behak nerimau setu diau dijanjika Allahtu.