Read Central Malay GALATIA 5 Bible Online

GALATIA 5 - Central Malay bible

GALATIA 5

¹Kitau mbak kini bibas, karnau Keristus la mbibaska kitau. Karnau itu ta'ankala kebibasan kamu, jangan endak dibudakka agi.

²Aku, Paulus, ngiciak ngan kamu nian: Amun kamu mintak disunat, Keristus nidau nian begunau ngan kamu.

³Lagi kukiciakka ngan kamu. Bilang jemau diau mintak disunat wajib nuruti gegalau ukum Taurat.

⁴Amun kamu endak dibenaghka karnau nuruti ukum Taurat, itu mbuktika kamu la beceghai ngan Keristus. Ngan carau luak itu kamu nidau pacak meghasauka keilu'an Allah.

⁵Anyautu kaminila ngaghapka, bansau kami ka dibenaghka Allah, karnau Rua Allah nulung kami percayau ngan Keristus.

⁶Karnau amun kitau la idup seghundak ngan Keristus, apu besunat apu nidau besunat, itu nidau bediau retiau. Diau penting, percayau ngan Keristus, mangku itu nyatau ngan sayang kitau ngan jemau.

⁷Senitu kamu bejuang ngan iluak. Mbak kini ngapau kamu nidau ta'at agi ngan Allah? Sapau diau ngasut kamu?

⁸Cetau ukan Allah! Allahtu la ngajung kamu njenguak Diau.

⁹Katau jemau, “Ghagi dikit ka ngembangka gegalau lejuan.”

¹⁰Empuak luak itu akuni percayau, bansau kamu nidau ka bediau pendapat lain jak di aku, karnau kitau la seghundak karnau Keristus. Mangku jemaunyau, sapau kila diau ngacauka rupu'an kamu, ka diukum Allah.

¹¹Mangku aku, ngapau aku maju diluatka, amun aku masia ngajung jemau besunat? Amun ngenian aku ngiciak luak itu, kici'anku ceritau kayu salip Keristus nidau njadi pekarau agi.

¹²Iluakla jemau diau ngacauka kamutu pegi ajau jak di guak jemau Keristen.

¹³Kantin-kantinku, nyela kamutu la diajung njadi jemau diau bibas. Anyautu jangan kebibasantu njadi tapakan endak idup nuruti kendak dusau. Tapitu kamu mesti sangi sayangi ngan sangi tulungi.

¹⁴Karnau gegalau ukum Taurat disimpulka ngan sutiak perinta ini, “Kaba mesti nyayangi kantin kaba luak diri kaba.”

¹⁵Anyautu amun kamu sangi gigiti ngan sangi tegu'i, awas, nanti kamu ka ancur galau.

¹⁶Diau endak kukiciakka ini: Idupla dibimbing Rua Allah, mangku kamu nidau ka nuruti serilau manusiau.

¹⁷Serilau manusiau belawanan ngan kendak Rua Allah, kendak Rua Allah belawanan ngan serilau manusiau, karnau sangi musui. Itula sebapau kamu nidau pacak ngerjauka setu diau kamu kenda'i.

¹⁸Anyautu amun kamu idup dibimbing Rua Allah, kamu nidau dikuasaui ukum Taurat.

¹⁹Serilau manusiau nyatau di kerjau menaugawia, kumua ngan diau nidau pantas,

²⁰di kerjau nyemba di keramat, menterau, bemusuan, belagau, sengit, cepat mara, merupuakka diriau ajau, ngasung ngan mihak,

²¹luat, memabu'an, bereruyalan ngan kerjau lain luak itu. Aku ngingatka kamu, luak aku la ngingatka kamu senitu, bansau jemau diau ngerjauka setu luak itu nidau ka nerimau setu diau disediauka Allah, masau Diau bekuasau.

²²Anyautu jemau diau dibimbing Rua Allah asilau luak ini: Jemautu sayang ngan jemau, diau riang, adau damai, ngaligh, galak nulung jemau, diau iluak, setia,

²³ngensian, ngan pacak nguasaui diriau. Nidau bediau ukum diau negahi kerjau luak itu.

²⁴Jemau diau la njadi hak Yesus Keristus, jemautu nidau agi nuruti kendak manusiau ngan gegalau serilaunyau.

²⁵Rua Allah la ngenjuakka ngan kitau idup diau empai. Karnau itu idup kitau mesti pulau dibimbing Rua itu.

²⁶Kitau jangan geduak, jangan sangi sakiti ati, jangan sangi sengitka, jangan sangi luatka.