Read Central Malay GALATIA 6 Bible Online

GALATIA 6 - Central Malay bible

GALATIA 6

¹Kantin-kantinku, amun adau sughang kedapatan mbuat dusau, kamu diau idup na'ati Rua Allah mesti mbimbing jemautu ke jalan diau benagh. Anyautu kamu mesti ngerjauka titu ngan ngaligh sampai njagau diri kamu, supayau jangan bedusau pulau.

²Betetulunganla kamu nanggungka beban jemau. Ngan carau luak itula kamu na'ati perinta Keristus.

³Amun sughang nyangkau diriau penting awuak nidau, jemautu mbu'ungi diriau.

⁴Bilang jemau mesti merisau diriau, apu kerjaunyau iluak apu nidau. Amun iluak, diau bulia meghasau bangga, nidau nanti mbandingkanyau ngan kerjau jemau.

⁵Karnau bilang jemau mesti mikul tanggungannyau sendighi.

⁶Jemau diau nerimau ajaghan ceritau Keristus semestiau mbagika ngan guruau gegalaunyau diau iluak diau adau di diau.

⁷Jangan kamu tetipu! Allah nidau pacak dipusiakka. Setu diau ditanam, titu pulau diketam.

⁸Amun jemau beperembak nurut serilaunyau, asilau kematian. Amun jemau beperembak nurut bimbingan Rua Allah, asilau idup selelamaunyau jak di Rua itu.

⁹Karnau itu jangan kitau puas ngerjauka setu diau iluak. Karnau amun kitau nidau mandak-mandak ngerjauka titu, kitau ka nerimau asilau, amun masaunyau la sampai.

¹⁰Empungan gi adau masaunyau, mela kitau iluak ngan gegalau jemau, apau agi ngan kantin-kantin seagamau.

¹¹Peratikala iluak-iluak tulisan ini diau kutulis ngan tangankunila ngan urup besak-besak.

¹²Jemau diau nganggap diriau lebia karnau setu diau kina'an, ughangtula diau endak masauka kamu besunat. Ughangtu ngerjauka titu, supayau nidau diluatka jemau Yahudi karnau ngiciakka ceritau Keristus diau mati di kayu salip.

¹³Jemau diau ngikut peraturan sunat nidau pulau nuruti ukum Taurat. Ughangtu endak, supayau kamu disunat, mangku ughangtu pacak mbanggaka diriau, bansau kamu nuruti peraturantu.

¹⁴Anyautu akuni dikit kiala nidau endak mbanggaka diriku, lain jak di Tuhan kitau Yesus Keristus diau mati di kayu salip. Karnau Diau la mati di kayu salip, mangku deniau nidau bereti agi ngan aku, ngan deniauni aku meghasau mbak asau la mati.

¹⁵Apu disunat apu nidau besunat nidau penting. Diau penting itu njadi manusiau empai.

¹⁶Mangku ngan jemau diau idup nurut pendirian ini aku bedu'a, supayau Allah iluak nian ngan ngenjuakka damai. Luak itu pulau ngan gegalau umat Allah.

¹⁷Mangku jangan sughang kia madakka aku agi, karnau di badanku adau buktiau, bansau aku anak-bua Yesus.

¹⁸Aku bedu'a, supayau Tuhan kitau Yesus Keristus iluak ngan kamu. Amin.