Read Central Malay IPISUS 1 Bible Online

IPISUS 1 - Central Malay bible

IPISUS 1

¹Jak di aku, Paulus, diau dijadika rasul Yesus Keristus karnau kendak Allah batan endak jemau di Ipisus diau percayau ngan Yesus Keristus.

²Aku bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai.

³Tepujila Allah, Bapak Tuhan kitau Yesus Keristus! Diau la ngenjuakka ngan kitau gegalau keilu'an jak di sergau, karnau kitau seghundak ngan Keristus.

⁴Antak ka deniauni dijadika, Allah la milia kitau, supayau kitau beresia ngan nidau becacat di adapanNyau. Karnau Diau nyayangi kitau,

⁵mangku Diau la netapka jak di senitu, supayau kitau dijadika ana'Au karnau Yesus Keristus, nyela titu kenda'Au.

⁶Mangku Allah dipuji karnau keilu'anNyau diau agungtu diau dienjuakka ngan kitau karnau Ana'Au Yesus Keristus diau disayangiNyau.

⁷Karnau Keristus la mati njadi kerban, mangku kitau dibibaska, retiau dusau kitau diabiska, karnau Diau nyayangi kitau nianan.

⁸Allah iluak ngan kitau, karnau Diau keruan gegalaunyau ngan bepengertian nian.

⁹Diau la nyatauka ngan kitau resiau rencanauNyau, karnau Diau endak nyataukanyau. Rencanautu la direncanauka jak di penembai endak diudimi Keristus.

¹⁰RencanauNyautu supayau gegalaunyau, empuak di sergau empuak di deniauni, njadi seghundak, mangku Keristus njadi kepala'au. Titu ka dikerjauka Allah, amun la sampai masaunyau.

¹¹Allah ngerjauka gegalaunyautu nurut kenda'Au diau ditetapka jak di senitu. Jak di penembai Diau la milia kitau njadi umatAu, karnau seghundak ngan Keristus.

¹²Mangku kami diau dulu sekali ngaghapka Keristustu ngagungka Allah karnau Diau agung.

¹³Kamu pulau la njadi umatAu, masau kamu ndengagh katau Allah, ceritau iluak diau nyelamatka kamu. Kamu la percayau ngan Keristus, mangku kamu ditandaui Rua Allah diau dijanjikaNyautu.

¹⁴Rua itula njamin kitau ka nerimau setu diau la dijanjika Allah ngan umatAu. Mangku kitau yakin, bansau kitau ka ditebus nian ngan dijadikaNyau umatAu, supayau Allah dipuji karnau keagunganNyau.

¹⁵Itula sebapau jak aku ndengagh, bansau kamu percayau ngan Tuhan Yesus ngan nyayangi gegalau umat Allah,

¹⁶aku nidau mandak-mandak beterimau-kasia ngan Allah karnau kamu. Aku maju ndu'aka kamu.

¹⁷Aku mintak, supayau Allah Tuhan kitau Yesus Keristus, Bapak diau agungtu, ngenjuakka RuaHau ngan kamu, mangku Ruatu ka ngenjuakka ngan kamu pengertian ngan nyatauka Allah diau benagh ngan kamu, mangku kamu ka keruan Diau.

¹⁸Aku mintak, supayau Diau mbukakka rupu'an kamu, mangku kamu ngerti setu diau kamu aghapka jak di Allah diau milia kamu. Mangku kamu keruan, bansau Allah kayau nian ngan serbau diau iluak diau disediaukaNyau batan endak umatAu.

¹⁹Mangku kamu keruan pulau, bansau Allah besak nian kuasauNyau diau bekerjau dalam ati kitau. Kuasau Allahtu semegi ngan kuasau diau besak

²⁰diau ngidupka Keristus jak di mati, dienjuakkaNyau bada diau bekuasau di sebela kanan Allah di sergau.

²¹Besak tegalau kuasau Keristustu sangkan gegalau kuasau pemerinta, penguasau, pengulu, tuan ngan sapau kila diau bepangkat tinggi, empuak masau mbak kini empuak masau diau ka datang.

²²Gegalaunyautu la ditunduakka ngan kuasau Keristus, mangku Diau dijadika kepalak gegalau jemau Keristen.

²³Ughangtu umpamau badan Keristus, la disempernauka Keristus diau nyempernauka gegalaunyau.