Read Central Malay IPISUS 2 Bible Online

IPISUS 2 - Central Malay bible

IPISUS 2

¹Senitu kamu luak mati, karnau kamu bedusau ngan melanggar perinta Allah.

²Masau itu kamu nuruti carau deniau. Kamu ta'at ngan penguasau diau adau di awang-awang, diautu rua diau mbak kini nguasaui ati jemau diau nidau ta'at ngan Allah.

³Sebenaghau senitu gegalau kitau semegi ngan ughangtu. Kitau nuruti serilau manusiau ngan ngerjauka sekendak badan ngan rupu'an kitau diau ja'at. Masau itu kitau jemau diau kenau mara Allah semegi ngan jemau laintu.

⁴Anyautu Allah iluak nianan ngan kitau. Karnau Diau sayang tegalau,

⁵mangku masau kitau gi luak mati karnau dusau kitau, kitau diidupka ngan Keristus. Kamu diselamatka cuman karnau keilu'an ati Allah.

⁶Mangku kitau seghundak ngan Yesus Keristus. Karnau itu Allah ngidupka kitau agi, mangku Diau ngenjuakka ngan kitau bada di sergau endak merinta ngan Diau.

⁷Allah ngerjauka titu, supayau masau diau ka datang manusiau pacak nginak keilu'an ati Allah diau dinyatauka ngan kitau karnau Yesus Keristus.

⁸Allah sayang nian ngan kamu. Karnau itu Diau nyelamatka kamu, karnau kamu percayau ngan Yesus. Keselamatan kamutu ukan karnau usaha kamu. Itu pengenjuak Allah,

⁹ukan kerjau kamu. Mangku nidau sughang kia diau pacak nyumbungka diriau.

¹⁰Kitauni buatan Allah, mangku karnau seghundak ngan Keristus, kitau dijadika endak ngerjauka setu diau iluak diau la disediaukaNyau sebelumau, supayau kitau ngerjaukanyau.

¹¹Kantin-kantinku diau ukan jemau Yahudi! Ingatkala luak manau kamu senitu. Kamu dikiciakka “jemau nidau besunat” ngan jemau Yahudi diau ngaku'i diriau “disunat”, itula tandau diau dikerjauka manusiau.

¹²Masau itu kamu lum seghundak ngan Keristus, kamu jemau asing diau nidau temasuak umat Allah. Kamu nidau temasuak jemau diau bulia bagian diau dijanjika Allah ngan umatAu. Kamu idup di deniauni nidau bediau aghapan ngan nidau keruan Allah.

¹³Anyautu mbak kini kamu la seghundak ngan Keristus, mangku kamu diau senitu jawua ngan Tuhan mbak kini la dipasighka, karnau Keristus mati batan endak kamu.

¹⁴Keristus ndamaika kitau. Jemau Yahudi ngan jemau ukan Yahudi dijadikaNyau sebangsau. Bemusuan ughangtu diau luak dinding nceghai la diabiskaNyau, karnau Diau la mati di kayu salip.

¹⁵Mangku ukum Taurat ngan gegalau perintahau diabiska Keristus, mangku duau bangsau itu njadi manusiau empai karnau seghundak ngan Keristus. Ngan carau luak itu Diau ndamaika ughangtu.

¹⁶Karnau Diau mati di kayu salip, bemusuan ughangtu diabiskaNyau, mangku ughangtu seghundak, mangku njadi seilu'an ngan Allah.

¹⁷Mangku Keristus datang ngiciakka ceritau damai ngan kamu, jemau diau senitu nidau keruan Allah, pulau ngan jemau diau la keruan Allah.

¹⁸Karnau Keristus mangku gegalau kitau, empuak jemau Yahudi empuak ukan jemau Yahudi, pacak ngadapi Allah karnau Rua diau semegi.

¹⁹Mangku kamu ukan agi jemau asing ngan jemau luagh. Mbak kini kamu semegi ngan umat Allah, kamu njadi anak Allah.

²⁰Kamu umpamau ghuma diau ditegakka di pelapiak diau dibuat rasul-rasul ngan nabi-nabi ngan Keristus njadi batu pelapiak diau penting sekali.

²¹Diaula nyusun ghumatu njadi Ghuma Allah diau beresia batan endak Tuhan.

²²Karnau kamu seghundak ngan Keristus, kamu ngikut disusun ngan jemau lain njadi Ghuma Allah bada RuaHau.