Read Central Malay IPISUS 5 Bible Online

IPISUS 5 - Central Malay bible

IPISUS 5

¹Kamu la njadi anak Allah diau disayangiNyau. Karnau itu penaula Diau.

²Idupla sangi sayangi luak Keristus nyayangi kitau. Diau la nyeraka nyawauNyau batan endak kitau njadi kerban diau iluak ngan melemakka ati Allah.

³Kamutu umat Allah. Karnau itu jangan kamu menaugawia ngan ngerjauka setu diau nidau senangaian ngan selak. Ngiciakkanyau ajau jangan.

⁴Nidau pantas kamu ngiciakka setu diau kumua ngan nidau senangaian ngan kici'an bigal. Tapitu kamu mesti beterimau-kasia ngan Allah.

⁵Ingatkala iluak-iluak, jemau diau peremba'au menaugawia ngan nidau senangaian ngan selak, kerjau itu semegi ngan nyemba diwau. Jemau itu nidau pacak dikiciakka Keristus njadi rajau dalam idupau, mangku nidau ka bulia setu diau disediauka Allah batan endak umatAu.

⁶Jangan kamu tetipu ngan kici'an diau mbu'ung, karnau setu luak itu mbuat Allah mara ngan jemau diau nidau ta'at.

⁷Jangan kamu sekantin ngan jemau luak itu.

⁸Nyela, senitu kamu idup bekeleman. Mbak kini kamu adau di terang, karnau la njadi umat Tuhan. Karnau itu kamu mesti idup dalam terang.

⁹Jak di terang itu nimbul gegalau kerjau diau iluak ngan adil ngan benagh.

¹⁰Beusahala ngeruani setu diau meriangka ati Tuhan.

¹¹Jangan kamu ngikut jemau ngerjauka kerjau diau nidau begati diau dikerjauka di keleman. Anyautu kamu mesti ngancakka ja'atau kerjau itu.

¹²Karnau ngiciakka ajau kerjau diau dikerjauka ughangtu di bada nidau kina'antu la maluka.

¹³Anyautu gegalaunyau diau diancakka terang kina'an, karnau terang nginakka gegalaunyau.

¹⁴Itula sebapau la dikiciakka luak ini, “Bangunla, ui kaba diau tiduak, idupla jak di mati, mangku Keristus ka nerangi kaba.”

¹⁵Karnau itu kina'ila iluak-iluak carau idup kamu. Jangan idup luak jemau bigal. Idupla luak jemau diau bepengertian.

¹⁶Gunaukala iluak-iluak masau diau adau, karnau masau ini masau diau ja'at.

¹⁷Jangan kamu bigal, anyautu beusahala ngeruani kendak Tuhan.

¹⁸Jangan kamu mabuak anggur, karnau anggur merusakka kamu. Anyautu kamu mesti dikuasaui Rua Allah.

¹⁹Amun ngiciak ngan kantin, kiciakkala katau masmur, pujian ngan nyanyian ruhani. Nyanyila ngagungka Tuhan ngan ati riang.

²⁰Luak manau kila maju beterimau-kasiala ngan Allah Bapak dalam namau Tuhan kitau Yesus Keristus.

²¹Kamu mesti sangi ta'ati. Ngan carau luak itula kamu meregaui Keristus.

²²Bini mesti ta'at ngan lakiau luak ngan Tuhan,

²³karnau laki ngepala'i biniau luak Keristus ngepala'i jemau Keristen. Lagi pulau Diautu Rajau Penyelamat jemau Keristen. Ughangtu umpamau badanAu.

²⁴Karnau itu luak jemau Keristen ta'at ngan Keristus, luak itu pulau bini mesti ta'at ngan lakiau luak manau kila.

²⁵Laki mesti nyayangi biniau, luak Keristus nyayangi jemau Keristen ngan nyeraka diriAu batan endak ughangtu.

²⁶Diau ngerjauka titu endak mberesiaka ughangtu ngan ajaghanNyau ngan ayiak baptisan, mangku pacak diseraka ngan Allah.

²⁷Ngan carau luak itu ughangtu pacak ngadap Diau ngan beresia ngan alap, nidau bediau cacat ngan celakau ngan tuapau kila diau karut.

²⁸Luak itu pulau laki mesti nyayangi biniau luak badanau sendighi. Jemau diau nyayangi biniau nyayangi diriau.

²⁹Nidau kekela jemau meluatka diriau, anyautu diau nyayia ngan njagaui diriau semegi luak Keristus nyayangi jemau Keristen,

³⁰karnau kitau umpamau dandanan badan Keristus.

³¹Di Injil ditulis, “Karnau itu sughang lanang ka ninggalka pejadiau endak seghundak ngan biniau, mangku ughang duautu njadi sutiak.”

³²Resiau itu dalam, anyautu diau kukiciakka ubungan Keristus ngan jemau Keristen.

³³Luak manau kila gegalaunyautu ngenaui kamu pulau. Sayangila bini kamu luak diri kamu, mangku bini mesti meregaui lakiau.