Read Central Malay PILIPI 3 Bible Online

PILIPI 3 - Central Malay bible

PILIPI 3

¹Mangku, kantin-kantinku, riangla kamu karnau la seghundak ngan Tuhan. Aku nidau meghasau beghat endak ngulangi setu diau la kutulis senitu, mangku kamu keruan nian.

²Sepepadaula ngan jemau diau ngerjauka setu diau ja'at diau luak anjing. Ughangtu endak masau jemau besunat,

³awuak kitaula diau besunat nian, ukan ughangtu. Kitauni nyemba Allah, dibimbing Rua Allah. Kitauni beterimau-kasia nian karnau la seghundak ngan Yesus Keristus. Kitauni nidau tepaut ngan setu diau dikerjauka di badan manusiau.

⁴Sebenaghau akunila pacak bepaut ngan kerjau manusiautu. Amun adau jemau diau meghasau adau tapakan bepaut ngan kerjautu, apau agi aku.

⁵Akuni disunat masau umur tujua malam. Aku jemau Israil jak di jungku Benyamin, jemau Ibrani asli. Ceritau ta'at ngan ukum Taurat aku jemau Parisi.

⁶Aku ta'at tegalau, mangku nganiayau jemau Keristen. Ceritau ukum agamau Yahudi aku nidau becacat.

⁷Anyautu setu diau senitu kuanggap untung, mbak kini kuanggap rugi karnau Keristus.

⁸Gegalaunyau kuanggap rugi, karnau beregaula ngeruani Keristus Tuhanku sangkan gegalaunyautu. Karnau Diautu, mangku aku ninggalka gegalaunyau. Kuanggap gegalaunyautu sesara, supayau aku bulia Keristus

⁹ngan seghundak ngan Diau. Aku nidau agi dibenaghka karnau kerjaukunila ngan ta'at ngan ukum Taurat. Mbak kini aku dibenaghka karnau percayau ngan Keristus. Allahtu diau mbenaghka jemau karnau percayau ngan Keristus.

¹⁰Diau kukenda'itu ngeruani Diau ngan kuasauNyau diau ngidupka Diau jak di mati. Aku endak ngikut sengsarau ngan Diau ngan njadi seghundak ngan Diau dalam kematianNyau.

¹¹Mangku aku ngaghap, aku ka diidupka pulau jak di mati.

¹²Aku nidau ngiciakka aku la buasil ngan sempernau. Aku maju beusaha endak bulia setu diau dijanjika Yesus Keristus. Batan endak itula aku la dijadika hak Keristus.

¹³Kantin-kantinku, akuni nidau ngirau bansau aku la buasil. Anyautu adau semecam diau kukerjauka. Aku nidau nyanauka setu diau la udim. Aku beusaha endak bulia setu diau di adapanku.

¹⁴Mangku aku maju beusaha endak sampai ke tujuan endak bulia adia, diautu idup di sergau. Batan endak itula kitau dipilia Allah karnau Yesus Keristus.

¹⁵Gegalau kitau diau la sempernau mesti berupuak luak itu. Amun adau di guak kamu diau rupu'an lain, Allah ka meretikanyau ngan diau.

¹⁶Luak manau kila ini diau penting, ngikut carau diau la kitau terimau enggut mbak kini.

¹⁷Kantin-kantinku, penaula aku. Kami la ngenjuakka penauan diau iluak. Karnau itu ikutkala jemau diau menau kami.

¹⁸Aku la rajin ngiciakka ngan kamu, mbak kini kukiciakka agi sampai nangis, banyak jemau idup njadi musua salip Keristus.

¹⁹Idup jemau luak itu ka benasau, karnau serilau ughangtu njadi tuanau. Setu diau maluka itu dibanggaka ughangtu. Ughangtu maju merupuakka setu di deniauni ajau.

²⁰Anyautu kitauni jemau diau behak di sergau. Jak di situla pulau kitau nantika ngan ghindu nian ngan Tuhan Yesus Keristus, Rajau Penyelamat kitau.

²¹Badan kitauni diau litak ngan pacak mati ka diuba Keristus njadi luak badanAu diau agungtu. Diau ka ngerjauka titu, karnau Diau adau kuasau endak nunduakka gegalaunyau.