Read Central Malay KULUSI 2 Bible Online

KULUSI 2 - Central Malay bible

KULUSI 2

¹Aku endak, supayau kamu ngeruani, bansau aku bekerjau nian batan endak kamu ngan jemau di Laudikia ngan gegalau jemau lain diau lum keruan aku.

²Aku ngerjauka titu, supayau ughangtu diteguaka ngan sangi sayangi, mangku ughangtu besatu. Ngan carau luak itu ughangtu ngerti nian ngan yakin ngan ngeruani resiau Allah, diautu Keristus.

³Keristus itula kunci ngeruani gegalau keilu'an ngan pengertian Allah diau lum dikeruani.

⁴Aku ngiciakka titu, supayau kamu jangan dicalu'i jemau diau pacak ngiciak.

⁵Empuak aku jawua ngan kamu, rupu'anku guak kamu. Aku riang nginak kamu suati ngan tegua percayau ngan Keristus.

⁶Kamu la nerimau Yesus Keristus njadi Tuhan kamu. Karnau itu kamu mesti idup seghundak ngan Diau

⁷ngan buakagh dalam Diau, mangku tamba bepaut ngan Diau ngan tamba tegua percayau nurut setu diau la diajaghka ngan kamu. Mangku ati kamu mesti banyak beterimau-kasia.

⁸Sepepadaula, jangan adau diau mikati kamu ngan rupu'an manusiau diau nidau begunau ngan nyesatka. Rupu'antu ukan jak di Keristus, tapitu jak di manusiau ngan rua deniau.

⁹Karnau gegalau sipat Allah adau galau di Keristus, masau Diau adau di deniau njadi manusiau.

¹⁰Mangku karnau kamu idup seghundak ngan Keristus, kamu dienju'i idup ngenianau. Keristusla kepalak gegalau rua diau bekuasau ngan merinta.

¹¹Karnau seghundak ngan Keristus kamu la disunat, ukan ngan sunat diau dibuat manusiau, tapitu ngan sunat diau dibuat Keristus. Sunattu mbibaska kamu jak di kuasau serilau diau bedusau.

¹²Masau kamu dibaptis, kamu dikuburka seghundak ngan Keristus. Mangku masau itu pulau kamu diidupka agi seghundak ngan Diau, karnau percayau ngan kuasau Allah diau la ngidupka Keristus jak di mati.

¹³Senitu kamu luak mati, karnau kamu jemau bedusau ngan nidau keruan ukum Allah. Mbak kini kamu la diidupka Allah seghundak ngan Keristus ngan gegalau dusau kitau la diabiskaNyau.

¹⁴Diau la mbatalka surat utang diau ngancam kitau ngan carau diau beghat. Surattu la dipakukaNyau di kayu salip, mangku gegalau buru'an la diabiska.

¹⁵Diau la mbuat gegalau rua diau bekuasau ngan merinta nidau bekuasau agi. Ruatu dijadikaNyau tuntunan gegalau jemau, masau Diau nggiring ruatu njadi kawalan karnau menang.

¹⁶Karnau itu jangan enangka jemau nyalaka kamu, empuak karnau makanan ngan minuman, empuak karnau aghi rerayau agamau, empuak karnau aghi rayau bulan empai ngan aghi Sabat.

¹⁷Gegalaunyautu bayangan ajau jak di setu diau ka datang, anyautu diau nyatau itu Keristus.

¹⁸Jangan enangka kamu dirugika jemau nerimau hak kamu. Jemautu cak ngensian, cak alim ngan nyemba malaikat. Jemautu geduak, karnau rupu'annyau rupu'an deniau. Diautu nganggap diriau lebia, karnau adau pengina'an.

¹⁹Diautu nidau agi bepaut ngan Keristus diau luak palak. Diau njagaui ngan nyatuka gegalau badan ngan ughat ngan sendi, mangku tumbua nurut kendak Allah.

²⁰Kamu la mati seghundak ngan Keristus, la bibas jak di kuasau rua deniauni. Ngapau kamu gi idup luak jemau diau dikuasaui deniau? Ngapau kamu tunduak ngan peraturan luak ini:

²¹“Jangan ngucak ini. Jangan ngecap itu. Jangan nginggut itu-ini.”

²²Gegalau peraturan itu ngiciakka setu diau nidau begunau agi, amun la dipakai. Itu cuman peraturan ngan ajaghan diau dibuat jemau.

²³Jemau diau mbuat peraturantu kina'an bepengertian karnau ngajung jemau sembayang nurut carau ughangtula ngan ngensianka ngan nganiayau diriau. Anyautu gegalaunyautu nidau begati, cuman muaska serilau manusiau.