Read Central Malay KULUSI 3 Bible Online

KULUSI 3 - Central Malay bible

KULUSI 3

¹Kamu la diidupka agi seghundak ngan Keristus. Karnau itu beusahala, mangku bulia setu diau adau di sergau, di bada Keristus duduak di sebela kanan Allah.

²Rupuakkala setu diau adau di sergau, jangan setu diau adau di deniau.

³Karnau kamu la mati, mangku idup kamu tebuni ngan Keristus di Allah.

⁴Idup diau ngenianau itu idup seghundak ngan Keristus. Mangku amun Keristus datang nanti, kamu ka adau ngan Diau dalam keagunganNyau.

⁵Karnau itu, mandakkala serilau deniau diau adau dalam diri kamu, diautu menaugawia, setu diau nidau senangaian, gegalau serilau diau ja'at ngan selak. Gegalaunyautu semegi ngan nyemba diwau,

⁶karnau gegalaunyautu ka ndatangka dawaian Allah ngan jemau diau nidau ta'at.

⁷Senitu kamu pulau ngerjauka kerjau luak itu, masau kamu dikuasauinyau.

⁸Mbak kini kamu mesti mandak ngerjauka gegalau kerjau ja'at luak purik ngan mara, meluatka, nggelakka, ngupatka jemau, kici'an kumua.

⁹Jangan agi sangi bu'ungi, karnau idup diau lamau ngan peremba'au la kamu tinggalka.

¹⁰Mbak kini kamu la adau idup empai. Kamu manusiau empai diau maju diempaika njadi luak gambaran Allah, mangku kamu keruan Allah luak Diau sebenaghau.

¹¹Mangku nidau bediau bidahau antarau jemau Yahudi ngan jemau ukan Yahudi, antarau jemau besunat ngan jemau nidau besunat, antarau bangsau-bangsau, antarau babu ngan jemau bibas, karnau Keristus itu gegalaunyau, Diautu seghundak ngan gegalau ughangtu.

¹²Kamutu la njadi umat Allah. Kamu la dipilia njadi ha'Au ngan disayangiNyau. Karnau itu kamu mesti sial, iluak, ngaligh, ngensian, jangan geduak, jangan kejam.

¹³Kamu mesti ngaligh sughang ngan diau lain ngan sangi ma'apka, amun nidau tetuju ngan carau jemau. Tuhan la ngabiska dusau kamu, mangku kamu pulau mesti sangi ma'apka.

¹⁴Mangku diau penting sekali, kamu mesti sangi sayangi, karnau ngan sayang kamu disatuka nian.

¹⁵Damai jak di Keristus diau adau di ati kamu mesti netapka gegalau kerjau kamu, karnau kamu la dipilia Allah batan endak damai, mangku njadi sutiak badan. Kamu mesti beterimau-kasia.

¹⁶Ajaghan Keristus mesti bekerjau dalam ati kamu ngan carau diau iluak. Mangku sangi ajaghila ngan sangi retika ngan bepengertian nian. Nyanyikala masmur ngan pujian ngan lagu ruhani batan endak Allah sampai beterimau-kasia dalam ati.

¹⁷Gegalaunyau diau kamu kerjauka ngan kiciakka kerjaukala dalam namau Tuhan Yesus, sampai beterimau-kasia ngan Allah Bapak karnau Diau.

¹⁸Tinau diau la belaki tunduakla ngan laki kamu, karnau itula carau diau iluak batan endak jemau Keristen.

¹⁹Lanang diau la bebini maju sayangila bini kamu. Jangan endak sekendak ngan diau.

²⁰Budak keciak ta'atila gegalaunyau ngan pejadi kamu, karnau itula diau melemakka ati Allah.

²¹Bak-bak jangan nyakiti ati anak kamu, mangku diau jangan tekedan.

²²Babu-babu ta'atila gegalaunyau ngan tuan kamu diau di deniauni. Jangan cuman ta'at, amun dikina'i karnau endak dipuji. Ta'atila diau nian, karnau takut ngan Tuhan.

²³Tuapau kila diau diajung ngan kamu kerjaukala ngan riang luak kamu bekerjau batan endak Tuhan, ukan batan endak manusiau.

²⁴Ingatkala bansau kamu ka nerimau upa jak di Tuhan diau dijanjikaNyau, karnau Keristus Tuhan kamu ngan kamu bekerjau batan endak Diau.

²⁵Jemau diau mbuat sala ka nanggungka salahautu, karnau Tuhan nidau milia rupau.