Read Central Malay KULUSI 4 Bible Online

KULUSI 4 - Central Malay bible

KULUSI 4

¹Kamu diau njadi tuan, buatila budak kamu ngan adil ngan benagh. Ingatkala, kamu pulau adau tuan di sergau.

²Bedu'ala maju ngan sepepadau penarau bedu'a ngan beterimau-kasia ngan Allah.

³Du'akala pulau kami, supayau kami pacak ngiciakka ceritau resiau Keristus. Ikak aku ngerjauka titu, aku dijilka.

⁴Bedu'ala, supayau aku pacak ngiciakka ceritautu ngan iluak luak semestiau.

⁵Carau kamu bekundang ngan jemau diau nidau percayau, kamu mesti bepengertian nian, mangku gunaukala masau diau adau iluak-iluak batan endak Tuhan.

⁶Kici'an kamu mesti tepat ngan melemakka ati. Kamu mesti keruan, luak manau semestiau nimbali jemau.

⁷Tikikus, kantin kitau diau disayangi, ka ngiciakka ngan kamu gegalau ceritau aku. Diautu ngelapan ngan sesamau bekerjau ngan kami batan endak Tuhan.

⁸Aku ngajung diau berayak ngan kamu ngan tujuan, supayau kamu keruan ceritau kami mangku kamu diteguaka.

⁹Unisimus ka pegi serempak ngan diau. Diautu sughang jak di kamu diau pacak dipercayaui, kami nyayangi diau. Ughang duautu ka ngiciakka ngan kamu gegalaunyau diau la tejadi di guak kami.

¹⁰Aristarkus diau adau di jil seghundak ngan aku bepesan ngan kamu. Luak itu pulau Markus, denga-sanak Barnabas. Kamu la dipesanka, supayau kamu nerimau diau, amun diau datang guak kamu.

¹¹Adau pulau pesan jak di Yisus diau pulau diadaki Yustus. Jak di jemau Yahudi diau la percayau ngan Tuhan Yesus cuman ughang tigau itula diau sesamau bekerjau ngan aku batan endak Allah. Ughangtu nulungi aku nian.

¹²Pesan pulau jak di Ipapras. Diau pulau sughang jak di kamu. Diau bekerjau batan endak Yesus Keristus ngan maju ndu'aka kamu nian, supayau kamu percayau nian ngan bepengertian, mangku kamu ta'at nian ngan kendak Allah.

¹³Akuni pacak ngiciakka, bansau diau la bekerjau nian batan endak kamu ngan batan endak jemau Laudikia ngan jemau Hirapulis pulau.

¹⁴Duktur Lukas diau kitau sayangi ngan Dimas bepesan ngan kamu.

¹⁵Sampaika pulau pesan kami ngan kantin kitau di Laudikia, mangku pulau ngan Nimpa ngan jemau Keristen diau betunggal di ghumahau.

¹⁶Amun surat ini la dibacauka ngan kamu, usahakala supayau surat ini dibacauka pulau ngan jemau Keristen di Laudikia. Kamu pulau mesti mbacau surat batan endak jemau Laudikia diau ka dikighimka ngan kamu.

¹⁷Kiciakka ngan Arkipus, bansau diau mesti ngudimka kerjau diau diajung ngan diau batan endak Tuhan.

¹⁸Pesan jak di aku, Paulus. Akunila nulis pesan ini. Ingatkala aku, bansau aku masia dalam jil. Aku bedu'a, supayau Tuhan iluak ngan kamu.