Read Central Malay 2 TIMUTIUS 1 Bible Online

2 TIMUTIUS 1 - Central Malay bible

2 TIMUTIUS 1

¹Jak di aku, Paulus, diau dijadika rasul Yesus Keristus karnau kendak Allah, supayau ngiciakka idup diau dijanjika Allah ngan jemau diau seghundak ngan Yesus Keristus

²batan endak Timutius diau kusayangi luak anakku. Aku bedu'a, supayau Allah Bapak ngan Tuhan kitau Yesus Keristus sayang ngan iluak ngan kaba ngan ngenjuakka damai.

³Aku beterimau-kasia ngan Allah. Batan endak Diau aku bekerjau ngan ati diau beresia luak dikerjauka niniak puyangku senitu. Aku maju teghingat kaba dalam du'a ngan beterimau-kasia ngan Allah empuak siang empuak malam.

⁴Amun aku teghingat kaba nangis, aku ghindu nian endak betemu ngan kaba, mangku aku riang nianan.

⁵Karnau aku teghingat kaba percayau nian ngan Keristus semegi luak niniak kaba Luis ngan mak kaba Iuniki, mangku aku yakin kaba percayau pulau luak itu.

⁶Itula sebapau aku ngingatka, supayau kaba maju nggunauka kuasau diau dienjuakka Allah ngan kaba, masau aku nepiakka tanganku di pucuak palak kaba ndu'aka kaba.

⁷Karnau Rua diau dienjuakka Allah ngan kitau ukan rua diau mbuat kitau penakut. Rua Allah mbuat kitau kuat ngan sayang ngan jemau, mangku kitau pacak nguasaui diri kitau.

⁸Karnau itu jangan kaba takut nceritauka Tuhan kitau ngan jangan pulau maluan aku dijilka karnau bekerjau batan endak Diau, tapitu kaba mesti ngikut sengsarau karnau ceritau iluak. Allah ka nulung kaba.

⁹Allahtu nyelamatka kitau ngan milia kitau, supayau njadi umatAu. Titu dikerjaukaNyau ukan karnau setu diau kitau kerjauka, tapitu karnau rencanauNyau ngan keilu'anNyau itula. Keilu'anNyautu dienjuakka ngan kitau karnau Yesus Keristus, antak ka deniauni dijadika.

¹⁰Mbak kini Allah nyatauka keilu'anNyautu ngan kitau, karnau Penyelamat kitau Yesus Keristus la datang. Yesustu la ngalaka kuasau maut ngan ngenjuakka idup selelamaunyau, amun kitau percayau ngan ceritau iluak.

¹¹Endak ngiciakka ceritau iluak itu Allah milia aku njadi rasul ngan guru.

¹²Itula sebapau aku nanggungka gegalaunyautu, tapitu aku nidau maluan, karnau aku keruan diau kupercayauitu. Aku yakin, bansau setu diau la dipercayauka ngan aku pacak Diau jagaui enggut aghi kiamat.

¹³Ikutila nian ajaghan diau benagh diau la kaba dengagh jak di aku. Kerjaukala gegalaunyautu ngan maju percayau ngan sayang diau adau di kitau karnau seghundak ngan Yesus Keristus.

¹⁴Ngan kuasau Rua Allah diau adau di kitau kaba mesti njagaui iluak-iluak setu diau iluak diau la dipercayauka ngan kaba.

¹⁵Kaba keruan, bansau gegalau kantin di daira Asia Keciak enggup agi sekantin ngan aku, temasuak pulau Pigelus ngan Hermugenis.

¹⁶Kapu Unesipurus la rajin meriangka atiku. Aku bedu'a, supayau Tuhan iluak ngan diau. Empuak aku di jil, diau nidau maluan ngan setu diau kughasauitu.

¹⁷Masau diau sampai di Rum, diau ndala'i aku nian enggut betemu.

¹⁸Diau pulau banyak nulung aku masau di Ipisus. Ceritau itu kaba keruan. Aku bedu'a, supayau Tuhan iluak ngan diau masau aghi kiamat.