Read Central Malay 2 TIMUTIUS 4 Bible Online

2 TIMUTIUS 4 - Central Malay bible

2 TIMUTIUS 4

¹Yesus Keristus ka datang agi ke deniau endak ngadili jemau diau idup ngan diau mati. Diau ka datang endak merinta luak rajau. Karnau itu aku mintak nian ngan kaba di adapan Allah ngan Yesus Keristus,

²kiciakkala katau Allah. Kaba maju ngerjaukanyau, empuak masau iluak empuak masau nidau iluak. Yakinkala jemau, tunjuakkala setu diau sala, tegughila ngan ngajaghila jemau ngan ngaligh.

³Karnau ka sampai masaunyau jemau nidau endak agi nerimau ajaghan diau benagh. Anyautu ughangtu ka nunggalka banyak guru nurut kendak ughang itula endak diajagh setu diau lemak didengagh.

⁴Ughangtu enggup ndengagh ceritau diau benagh, tapitu endak ndengagh ceritau mbu'ung.

⁵Empuak luak itu kaba mesti nguasaui diri, empuak luak manau kila. Tanggungkala ngan ngaligh. Kerjaukala tugas kaba endak ngiciakka ceritau iluak jak di Allah. Kerjaukala titu iluak-iluak batan endak Allah.

⁶Ceritau aku la sampai masaunyau aku ka mati luak dikerbanka batan endak Allah. Jerang agi aku ka ninggalka deniauni.

⁷Aku la ngikut tandingan ngan iluak, la sampai ke batasau. Aku maju percayau ngan Keristus.

⁸Mbak kini adia menang la nunggu aku, karnau idupku la dibenaghka Allah. Masau aghi kiamat, Tuhan akim diau adil ka nyeraka adiatu ngan aku. Ukan aku ajau diau ka nerimau adiatu, tapitu gegalau jemau diau nungguka nian Tuhan datang.

⁹Beusahala cecepat njenguak aku,

¹⁰karnau Dimas la nyayangi deniauni, mangku ninggalka aku pegi ke Tesalunika. Keriskis la pegi ke Galatia, mangku Titus la pegi ke Dalmatia.

¹¹Cuman Lukas gi adau guak aku. Depatka Markus, batakla diau ke sini, karnau diau pacak nulung aku.

¹²Tikikus la kuajung pegi ke Ipisus.

¹³Amun kaba datang, mbatak mantil diau kutinggalka di Teruas di ghuma Karpus. Batak pulau bukuku diau penting diau dibuat jak di bawak.

¹⁴Aliksandar, tukang tembagautu, la banyak bebuat ja'at tuadap aku. Tuhan ka mbalaska diau nurut peremba'au.

¹⁵Kaba pulau mesti sepepadau ngan diau, karnau diau melawan nian ajaghan kitau.

¹⁶Masau dulu sekali aku mbenaghka diriku di pengadilan, nidau bediau sughang kia diau nulung aku. Gegalaunyau ninggalka aku. Aku bedu'a, supayau Allah jangan nyalaka ughangtu.

¹⁷Anyautu Tuhan la nulung ngan neguaka aku, mangku aku pacak ngiciakka gegalau ceritau iluak itu, mangku didengagh gegalau jemau diau ukan jemau Yahudi. Mangku aku luput jak di ukuman mati.

¹⁸Tuhan ka ngilakka aku jak di gegalau rencanau diau ja'at. Diau ka mbatak aku ke sergau ngan selamat. Diautu mesti dipuji selelamaunyau. Amin.

¹⁹Pesanku ngan Periska ngan Akwila ngan kapu Unesipurus.

²⁰Irastus mendam di Kurintus. Terupimus kutinggalka di Militus dang buidapan.

²¹Beusahala datang antak ka pangkau dingin. Pesan jak di Ibulus, Pudis, Linus, Kelaudia ngan gegalau kantin kitau.

²²Aku bedu'a, supayau Tuhan njagaui kamu ngan iluak nian ngan kamu.