Read Central Malay TITUS 1 Bible Online

TITUS 1 - Central Malay bible

TITUS 1

¹Jak di aku, Paulus. Akuni dijadika rasul Yesus Keristus ngan bekerjau batan endak Allah. Akuni dipilia ngan diajung batan endak nulung jemau diau dipilia Allah, supayau ughangtu tamba percayau. Akuni pulau mesti mbimbing ughangtu, supayau keruan ajaghan diau benagh luak diajaghka agamau kitau.

²Kitau ngaghapka idup selelamaunyau. Allah la njanjika idup itu, antak ka deniau dijadika, mangku Allah nidau ka adau mbu'ung.

³Mangku masau diau ditetapkaNyau, Allah nyatauka janjiAu ngan katauNyau. Katau Allahtu la dipercayauka ngan aku, mangku aku ngiciakkanyau, karnau la diajung Allah, Penyelamat kitau.

⁴Batan endak Titus diau njadi anakku nian karnau semegi percayau ngan Keristus. Aku bedu'a, supayau Allah Bapak ngan Yesus Keristus, Rajau Penyelamat kitau, iluak nian ngan kaba ngan ngenjuakka damai.

⁵Aku la ninggalka kaba di Kerita, mangku kaba ngatur setu diau mesti diatur. Kaba mesti milia pengulu di bilang kuta, luak diau la kuajungka ngan kaba.

⁶Pengulu jemau Keristen mesti jemau diau nidau bediau salahau, buntingau cuman sughang. Anak-ana'au mesti percayau ngan Keristus ngan nidau pacak dikiciakka idup nidau senangaian ngan nidau pacak diatur.

⁷Pengulu jemau Keristen jemau diau ngerjauka kerjau Allah, mangku diau nidau bulia besala, geduak, pemara, memabu'an, galak belagau, ngan tetancian.

⁸Anyautu diau mesti riang nerimau jemau di ghumahau, galak ngan setu diau iluak, bepengertian, jujur, beresia ngan pacak nguasaui diri.

⁹Diau mesti bepaut ngan ajaghan diau benagh luak la diajaghka, mangku diau pacak ngajagh jemau nurut ajaghantu ngan pacak ngiciakka sala jemau diau melawan.

¹⁰La banyak jemau diau melawan, terutamau jemau diau asalau jak di agamau Yahudi. Ughangtu nyesatka jemau ngan kici'an mbu'ung.

¹¹Jemau diau luak itu mesti ditukup mulutau, karnau ughangtu ngacauka banyak ghuma-tanggau ngan ngajaghka diau nidau-nidau endak bulia untung diau nidau pantas.

¹²Adau sughang nabi jak di ughangtu diau asalau jak di Kerita ngiciak luak ini, “Jemau Kerita tukang mbu'ung, benatang ganas, selak ngan pemalas.”

¹³Setu diau dikiciakka nabitu benagh. Karnau itu kaba mesti negughi ughangtu nian, mangku ughangtu maju percayau ngan ajaghan diau benagh.

¹⁴Mangku ughangtu nidau agi nuruti ceritau mbu'ung jemau Yahudi ngan peraturan diau dibuat manusiau diau nyimpang jak di ajaghan diau benagh.

¹⁵Gegalaunyau beresia, amun jemau beresia. Anyautu amun jemau diau rupu'annyau kumua, dikit kia nidau bediau diau beresia, karnau rupu'an ngan ati keciak jemautu kumua.

¹⁶Ughangtu bekatau, bansau ughangtu keruan Allah, awuak perembak ughangtu nidau ngaku'i Allah. Ati ughangtu ja'at ngan melawan ngan nidau pacak ngerjauka setu diau iluak.