Read Central Malay TITUS 2 Bible Online

TITUS 2 - Central Malay bible

TITUS 2

¹Anyautu kaba ajaghkala setu diau benagh.

²Jemau lanang diau la tuau mesti idup tau diri, bepengertian, luak jemau diau pantas diregaui. Ughangtu mesti percayau ngan Allah ngan carau diau benagh, nyayangi jemau ngan ta'an sengsarau ngan ngaligh.

³Luak itu pulau jemau tinau diau tuau mesti idup ngan carau diau pantas ngan jemau diau percayau ngan Allah. Jangan ughangtu ngupatka jemau ngan jangan memabu'an. Ughangtu mesti ngajaghka setu diau iluak.

⁴Ngan carau luak itu ughangtu ngajagh tinau diau gi mudau nyayangi lakiau ngan anak-ana'au,

⁵bepengertian, idup beresia, ngurus ghuma-tanggaunyau iluak-iluak, ta'at ngan lakiau. Mangku nidau bediau diau pacak nggelakka katau Allah.

⁶Luak itu pulau budak perjakau, tegughila ughangtu, supayau nguasaui diriau.

⁷Mangku kaba mesti ngerjauka kerjau diau iluak batan penauan. Kaba mesti ngajagh ngan jujur ngan ngenianau.

⁸Kiciakkala katau diau bepengertian diau nidau pacak disalaka jemau, mangku lawan kaba maluan, karnau nidau bediau setu diau nidau iluak diau pacak ughangtu kiciakka ceritau kitau.

⁹Budak-budak mesti ta'at ngan tuanau ngan gegalaunyau ngan meriangka atiau. Jangan melawan,

¹⁰jangan maling. Anyautu ughangtu mesti maju iluak ngan ta'at. Mangku ajaghan Allah, Penyelamat kitau, maju dipuji jemau.

¹¹Keilu'an Allah diau nyelamatka gegalau manusiau la dinyatauka.

¹²Keilu'antu ngajagh kitau, supayau kitau nidau agi idup belawanan ngan Allah ngan nidau agi nuruti serilau deniau. Kitau diajagh, supayau kitau idup di deniau ini na'an diri, jujur ngan takut ngan Allah.

¹³Mbak kini kitau dang nungguka aghi diau meriangka diau kitau ngaghapka itu. Aghitu deniau ka nginak keagungan Allah diau Mahabesak ngan Yesus Keristus, Rajau Penyelamat kitau.

¹⁴Diautu la nyeraka diriAu batan endak kitau endak nyelamatka kitau jak di gegalaunyau diau ja'at. Diautu njadika kitau umatAu diau beresia diau njadi ha'Au ngan rajin ngerjauka diau iluak.

¹⁵Kiciakkala gegalaunyautu, ajaghla ngan tegughila ngan kuasau jemau diau ndengaghka kaba. Jangan enangka sughang kia nganggap kaba nidau bereti.