Read Central Malay IBRANI 10 Bible Online

IBRANI 10 - Central Malay bible

IBRANI 10

¹Ukum Taurat nggambarka setu diau iluak diau ka datang nanti. Itu cuman gambaran ajau, ukan diau sebenaghau. Idang taun kerban diau semegi maju dikerbanka. Manau ka adau ukum Taurat ngan kerbantu pacak nyempernauka jemau diau endak nyemba Allah.

²Misalau jemau diau nyemba Allah ngan carau luak itu la diberesiaka nian jak di dusaunyau, diau nidau agi meghasau besala, mangku jemau mandak bekerban.

³Anyautu kerban diau dikerbanka idang tauntu mbuat jemau maju teghingat ngan dusaunyau.

⁴Dagha sapi ngan dagha kambing lanang nidau pacak ngabiska dusau.

⁵Itula sebapau masau Keristus datang ke deniau, Diau bekatau ngan Allah, “Kerban ngan enju'an nidau Dighi kenda'i. Tapitu Dighi ngenjuakka badan ngan Aku.

⁶Dighi nidau riang ngan kerban benatang diau disilap ngan kerban endak ngabiska dusau.

⁷Mangku Aku bekatau, ‘Allah, Aku datang endak ngerjauka kendak Dighi, luak ceritauKu diau la ditulis di Injil.’ ”

⁸Tadi Diau bekatau, “Kerban ngan enju'an, kerban benatang diau disilap ngan kerban endak ngabiska dusau nidau Dighi kenda'i, Dighi nidau riang ngan gegalaunyautu.” Diau ngiciak luak itu, empuak kerbantu dikerbanka nurut ukum Taurat.

⁹Mangku Diau bekatau, “Aku datang endak ngerjauka kendak Dighi.” Retiau Allah la ngabiska kerban diau senitu, digenti ngan kerban empai, diautu Keristus.

¹⁰Yesus Keristus la ngerjauka kendak Allah ngan nyeraka diriAutula njadi kerban. Mangku kitau la diberesiaka karnau kerbantu diau dikerbanka cuman sekali ajau.

¹¹Idang aghi imam maju ngerjauka tugasau, maju ngerbanka kerban diau semegi diau nidau nian pacak ngabiska dusau.

¹²Tapitu Keristus cuman ngerbanka kerban sekali ajau endak ngabiska dusau batan endak selelamaunyau. Udim itu Diau duduak di sebela kanan Allah.

¹³Mbak kini Diau cuman nunggu masaunyau musuAu ditunduakka ngan Diau.

¹⁴Ngan sutiak kerban ajau Keristus la nyempernauka selelamaunyau jemau diau la diberesiaka jak di dusaunyau.

¹⁵Ceritau itu la dikiciakka Rua Allah ngan kitau, katauNyau,

¹⁶“ ‘Inila janji diau ka Kujanjika ngan ughangtu nanti,’ katau Tuhan. ‘Aku ka masuakka ukumKu dalam ati ughangtu, mangku ughangtu ka maju merupuakkanyau.’ ”

¹⁷Allah bekatau pulau, “Aku nidau ka ngingatka agi dusau ngan sala ughangtu.”

¹⁸Mangku amun dusau ngan sala jemau la diabiska, nidau nanti agi ngerbanka kerban karnau dusau.

¹⁹Mangku, kantin-kantinku, mbak kini dagha Yesus mbuat kitau beghani masuak ke bada diau suci.

²⁰Diautu la mbuat jalan diau empai batan endak kitau, jalan diau ngenjuakka idup. Jalan itu wuan tabir, diautu badan Yesus itula.

²¹Mangku kitau adau imam diau agung diau njadi kepalak Ghuma Allah.

²²Karnau itu mela kitau ngadap Allah ngan ati diau sebenagh-benaghau ngan maju percayau, karnau ati kitau la diberesiaka jak di sala kitau, badan kitau la dibasua ngan ayiak diau beresia.

²³Mela kitau maju ngaghapka setu diau la kitau aku'i, karnau Allah diau la njanjikanyau pacak dipercayaui.

²⁴Mela kitau sangi peratika, mangku kitau sangi ingatka endak ngerjauka diau iluak ngan sangi sayangi.

²⁵Mela kitau rajin betunggal endak sembayang, jangan kitau malas luak bebeghapau jemau. Mela kitau sangi ingatka ngan tamba rajin ngerjaukanyau, karnau nidau lamau agi Tuhan ka datang.

²⁶Amun kitau sajauka bedusau, empuak la keruan diau benagh, nidau bediau agi kerban endak ngabiska dusau itu.

²⁷Diau adau batan endak jemau itu ukuman Allah diau nakutka ngan api besak kematila diau mutungka jemau diau melawan Allah.

²⁸Jemau diau nidau nerimau ukum Musa diukum mati, amun dibuktika duau madak tigau ughang saksiau, bansau diautu besala. Jemautu nidau disialka.

²⁹Apau agi jemau diau nijak-nijakka Anak Allah, jemau diau nggelakka dagha pejanjian Allah, itu kematian Keristus diau mberesiaka jak di dusau. Jemau itu nggelakka keilu'an Rua Allah. Beghatla ukuman jemautu.

³⁰Kitau la keruan Allah diau bekatau luak ini, “Aku ka mbalas! Aku ka ngukum!” ngan pulau, “Tuhan ka ngadili umatAu.”

³¹Alaka nanggungau, amun diukum Allah.

³²Ingatkala senitu, masau kamu empai percayau ngan Yesus, kamu banyak tanggungan. Anyautu kamu maju beta'an.

³³Adau masau kamu dimadakka di mukau jemau banyak, adau masau kamu ngikut sengsarau ngan jemau diau dimadakka luak itu.

³⁴Kamu ngikut meghasauka kemada'an jemau diau dijilka. Masau gegalau retau kamu diambiak jemau, kamu maju riang, karnau kamu keruan, kamu adau setu diau lebia iluak agi diau ka ta'an selelamaunyau.

³⁵Karnau itu jangan ncapakka aghapan kamutu, karnau amun kamu maju percayau, adau upa diau besak.

³⁶Kamu mesti tekun, supayau kamu pacak ngerjauka kendak Allah, mangku kamu nerimau setu diau dijanjikaNyau.

³⁷Di Injil ditulis, “Tigha jerang agi, Keristus diau ka datangtu sampai. Diau nidau ka lambat datang.

³⁸Mangku umatKu diau la dibenaghka ka idup karnau percayau. Amun adau diau nidau percayau agi, Aku nidau riang ngan jemau itu.”

³⁹Kitauni jemau diau percayau mangku bulia idup, ukan jemau diau ngelipat mangku benasau.