Read Central Malay IBRANI 13 Bible Online

IBRANI 13 - Central Malay bible

IBRANI 13

¹Sangi sayangila kamu, ui jemau Keristen!

²Terimaula di ghuma kamu jemau diau lum kecinauan ngan kamu, karnau ngan kerjau luak itu adau jemau nidau keruan la njamu malaikat.

³Peratikala jemau diau dalam jil, mbak asau kamu pulau di dalam jil ngan ughangtu. Peratikala pulau jemau diau dibuati, mbak asau kamutu dibuati luak itu.

⁴Gegalau kamu mesti meregaui pekawinan. Laki bini mesti sangi sayangi. Jemau nakal ngan jemau diau menaugawia ka diukum Allah.

⁵Jangan kamu tetancian, tapitu cukupkala ngan setu diau adau di kamu, karnau Allah la bekiciak, “Aku nidau ka ngenangka ngan ninggalka kaba.”

⁶Itula sebapau kitau pacak ngiciak ngan beghani, “Tuhan itula penulungku. Aku nidau takut ngan setu diau pacak dikerjauka jemau mbuati aku.”

⁷Ingatkala pengulu kamu diau ngiciakka ceritau jak di Allah ngan kamu. Peratikala carau idupau ngan carau diau mati. Penaula carau ughangtu percayau.

⁸Yesus Keristus nidau beghuba, empuak senitu empuak mbak kini enggut selelamaunyau.

⁹Jangan kamu disesatka ngan bemecam-mecam ajaghan. Ati kitau diteguaka karnau keilu'an Allah, ukan karnau peraturan makanan. Nuruti peraturan makanantu nidau bediau gunaunyau.

¹⁰Kitau adau mija bada bekerban, mangku imam-imam diau bekerjau di Ghuma Tuhan nidau behak makan jak di bada itu.

¹¹Dagha benatang diau dikerbanka batan endak ngabiska dusau dibatak imam besak ke bada diau Mahasuci, anyautu buntang benatangtu disilap di luagh dusun.

¹²Itula sebapau Yesus pulau mati di luagh kuta endak mberesiaka umatAu jak di dusaunyau ngan daghaHautula.

¹³Karnau itu mela kitau pegi njenguak Diau di luagh kuta ngikut meghasauka tanggunganNyautu.

¹⁴Di deniauni kitau nidau bediau bada netap. Kitau dang ndalak bada selelamaunyau.

¹⁵Karnau itu mela kitau maju muji Allah karnau Yesus. Titu njadi kerban beterimau-kasia ngan Diau, diau kitau enjuakka ngan mulut kitau endak ngagungka Diau.

¹⁶Mangku majula kerjauka diau iluak ngan sangi tulungi, karnau itula kerban diau melemakka ati Allah.

¹⁷Ta'ati pengulu kamu ngan tunduak ngan ughangtu, karnau ughangtu maju njagaui kamu ngan nanggung-jawabkanyau ngan Allah. Amun kamu ta'at, ughangtu pacak bekerjau ngan riang. Amun nidau, ughangtu bekerjau ngan dayi mangut, mangku carautu nidau nulung kamu.

¹⁸Majula du'aka kami. Kami yakin ati keciak kami beresia, karnau kami maju endak ngerjauka setu diau iluak.

¹⁹Lagi aku mintak nian, supayau kamu ndu'aka aku, mangku aku pacak cepat ngulang guak kamu.

²⁰Allah la ngidupka Yesus, Tuhan kitau, jak di mati. Mangku karnau Diau matitu, Diau njadi tukang sayia kitau diau agung. DaghaHautu pulau ngesahka janji diau dijanjika Allah ngan kitau. Aku bedu'a, supayau Allah diau ngenjuakka damai ndandani kamu ngan serbau diau iluak, mangku kamu pacak ngerjauka kenda'Au.

²¹Aku bedu'a, supayau Allah ngajung Yesus Keristus ngerjauka di kitau setu diau melemakka atiAu. Tepujila Diau selelamaunyau! Amin.

²²Mangku, kantin-kantinku, aku mintak, supayau kamu nerimau petua itu tadi ngan riang, karnau surat ini nidau panjang nian.

²³Aku endak, supayau kamu keruan, bansau kantin kitau Timutius la dibibaska, mangku amun diau la sampai, aku ka cepat berayak ngan kamu serempak ngan diau.

²⁴Sampaikala pesan kami ngan gegalau pengulu kamu ngan gegalau jemau Keristen. Adau pulau pesan jak di kantin-kantin kitau di Italia.

²⁵Aku bedu'a, supayau Allah iluak ngan gegalau kamu.