Read Central Malay IBRANI 4 Bible Online

IBRANI 4 - Central Malay bible

IBRANI 4

¹Itula sebapau iluakla kitauni sepepadau, supayau jangan sughang kiala jak di kamu diau ketinggalan, empungan gi adau janji bulia bada gheghadu.

²Ceritau iluak itu la dikiciakka ngan kitau luak diau la dikiciakka ngan ughangtu. Anyautu nidau bediau gatiau ceritautu dikiciakka, amun jemau diau ndengaghau nidau percayau.

³Mangku kitau diau percayau ka bulia gheghadu luak diau la dijanjika Allah. Titu dikiciakka Allah luak ini, “Aku mara mangku besumpa, ‘Ughangtu nidau bulia gheghadu di badaKu.’ ” Allah ngiciak luak itu, empuak bada itu la adau jak deniau dijadika.

⁴Nyela, ceritau aghi ketujua ditulis di Injil luak ini, “Aghi ketujua Allah gheghadu jak di gegalau kerjauNyau.”

⁵Mangku ceritautu pulau dikiciakka luak ini, “Ughangtu nidau bulia gheghadu di badaKu.”

⁶Mangku jelas, bansau jemau diau senitu ndengagh ceritau iluaktu nidau bulia gheghadu karnau nidau ta'at. Mangku adau jemau lain diau bulia gheghadu.

⁷Allah la netapka aghi lain diau dikiciakka “mbak kini”. La lamau udim itu Allah ngajung Daud ngiciakkanyau luak itu tadi, “Mbak kini amun kamu ndengagh suarau Allah, jangan ngeghaska ati kamu.”

⁸Amun Yusua la mbatak ughangtu ke bada gheghadu, cengki Allah nidau ngiciakka ceritau aghi lain pulau.

⁹Mangku batan endak umat Allah gi adau aghi gheghadu, aghitu aghi ketujua.

¹⁰Mangku jemau diau bulia bada gheghadu, jemautu la gheghadu jak di gegalau kerjaunyau luak Allah gheghadu.

¹¹Karnau itu mela kitau beusaha bulia bada gheghadutu. Jangan adau diau urung luak ughang senitu ikak nidau ta'at.

¹²Katau Allahtu bekuasau ngan ngenjuakka idup. Tajamla katautu sangkan pedang bematau duau. Diau nusuak dalam nian endak nceghaika jiwa ngan rua, sendi-sendi ngan beghesi, mangku diau ngeruani serilau ngan rupu'an ati jemau.

¹³Nidau bediau diau pacak nyemuni di adapan Allah. Gegalaunyau kina'an ngan matauNyau. Ngan Diautu kitau mesti nanggung-jawabka gegalau kerjau kitau.

¹⁴Mela kitau maju ngandalka ngan kepercayauan kitau, karnau kitau adau Imam Besak diau agung diau la sampai guak Allah, diautu Yesus, Anak Allah.

¹⁵Imam Besak kitautu pacak meghasauka kekilapan kitau, karnau Diau pulau dicubaui ngan gegalaunyau, anyautu nidau bedusau.

¹⁶Karnau itu mela kitau beghani ngadap Allah diau iluak atiAu. Allahtu iluak ngan kitau ngan nyayangi kitau, mangku kitau ditulung, kebilau kitau merlukanyau.