Read Central Malay IBRANI 5 Bible Online

IBRANI 5 - Central Malay bible

IBRANI 5

¹Bilang imam besak dipilia jak di guak kantin-kantinau, ditetapka bekerjau batan endak Allah nggentika ughangtu. Tugasau endak ngenjuakka ngan Allah enju'an ngan kerban karnau dusau.

²Imamtu adau pulau banyak kekilapan, mangku diau ngerti jemau diau nidau keruan ngan sesat.

³Diautu mesti ngenjuakka kerban karnau dusau, ukan ajau karnau dusau jemau, tapitu pulau karnau dusaunyautula.

⁴Nidau bediau jemau diau njadika diriau imam. Diautu dipilia Allah batan endak tugas itu, luak Harun senitu.

⁵Luak itu pulau Keristus. Diautu nidau ngagungka diriAu njadi Imam Besak, tapitu Allah itula diau milia Diau, katauNyau, “Kabanila AnakKu. Saghini Aku njadi Bak Kaba.”

⁶Mangku Diau bekatau pulau, “Kaba imam selelamaunyau, nurut carau imam Melkisidik.”

⁷Masau Yesus adau di deniauni, Diau bedu'a sampai nangis, mintak ngan Allah diau pacak ngilakkaNyau jak di mati. Mangku Diau didengaghka, karnau Diau nunduak takut ngan Allah.

⁸Empuak Diautu Anak Allah, mangku ngan sengsarauNyautu Diau belajagh ta'at.

⁹Mangku la udim Diau njadi sempernau, Diau pacak nyelamatka enggut selelamaunyau jemau diau nurutiNyau.

¹⁰Mangku Diautu ditetapka Allah njadi Imam Besak nurut carau imam Melkisidik.

¹¹Adau banyak ceritau diau mesti kami kiciakka, anyautu segau diretika, karnau kamu lambat nian ngerti.

¹²Sebenaghau la masaunyau kamu ngajagh jemau, tenyatau kamutu diau mintak diajagh setu diau dulu sekali diajaghka ceritau ajaghan Allah. Kamu gi minum puan, lum pacak makan makanan keghas.

¹³Jemau diau gi minum puan gi budak keciak, lum ngerti ceritau diau benagh ngan diau sala.

¹⁴Makanan keghas batan endak jemau besak. Mangku karnau diau la belajagh, diau pacak mbidaka manau diau iluak ngan manau diau ja'at.