Read Central Malay IBRANI 6 Bible Online

IBRANI 6 - Central Malay bible

IBRANI 6

¹Karnau itu mela kitau jangan ngina'i ajau setu diau diajaghka senitu. Mela kitau belajagh banyak-banyak ceritau ajaghan jak di Keristus. Jangan kitau maju ngajaghka ceritau ngubai jak di kerjau diau nidau begati mangku percayau ngan Allah,

²ceritau baptisan, ceritau nepiakka tangan di pucuak palak jemau, ceritau jemau ngulang idup ngan ceritau ukuman selelamaunyau.

³Mangku itula diau mesti kitau kerjauka, amun Allah ngajung.

⁴Adau jemau diau senitu la nerimau terangAu ngan meghasauka keilu'an Allah ngan nerimau kuasau Rua Allahtu.

⁵Jemautu la keruan, bansau Katau Allahtu iluak ngan la meghasauka kuasau diau ka nyatau di masau diau ka datangtu.

⁶Mangku amun jemautu ngelipat, nidau ka adau diilu'i agi mangku ngubai jak di peremba'au, karnau diautu luluak makuka agi Anak Allah di kayu salip ngan mbuat Diau digelakka di mukau jemau banyak.

⁷Allah itu iluak ngan tana diau ngisap ayiak ujan diau rajin mbasainyau mangku ngasilka tanaman diau begunau batan endak jemau diau ngerjaukanyau.

⁸Anyautu amun tanatu ngasilka gheghumputan bedughi diau nidau begati, mangku ka didawaika ngan disilap ngan api.

⁹Kantin-kantinku diau kusayangi, empuak kami ngiciak luak itu, kami percayau ngan kamu. Kami yakin, bansau kamu ka milia jalan diau iluak mangku kamu ka selamat.

¹⁰Allah ukan Allah nidau adil. Diau maju teghingat kerjau kamu senitu batan endak Diau. Diau teghingat pulau sayang kamu diau kamu nyatauka ngan carau kamu nulung kantin-kantin diau percayau. Mangku kamu maju ngerjaukanyau enggut mbak kini.

¹¹Kami endak supayau bilang kamu maju ngerjaukanyau nian enggut mati, mangku kamu ka nerimau setu diau kamu aghapkatu.

¹²Kami enggup kamu njadi malas. Kami endak, supayau kamu idup luak jemau diau nunggu ngan ngaligh endak nerimau setu diau dijanjika Allah, karnau percayau ngan Diau.

¹³Masau Allah bejanji ngan Abraham, Diau besumpa, bansau Diau ka ngerjauka setu diau la dijanjikaNyautu. Mangku Diau besumpa demi diriAu, karnau nidau bediau diau lebia bekuasau jak di Diautu.

¹⁴Diau bekiciak, “Aku bejanji endak iluak nianan ngan kaba ngan njadika pengadau kaba banyak nian.”

¹⁵Abrahamtu nunggu ngan ngaligh mangku nerimau setu diau dijanjikatu.

¹⁶Amun jemau besumpa, diau besumpa demi jemau diau lebia bekuasau, mangku sumpatu mandakka balahan.

¹⁷Allah endak negaska ngan jemau diau nerimau janjiAutu, bansau Diau nidau ka ngubai rencanauNyau. Itula sebapau Diau nambai sumpaHau ngan janjiAutu.

¹⁸Duau mecamtu nidau pacak beghuba, diautu janji ngan sumpa. Allah nidau ka adau mbu'ung ceritautu. Mangku kitau diau la njenguak Allah endak selamat diteguaka nian, supayau maju ngaghapka setu diau dijanjikatu ngan kitau.

¹⁹Aghapan kitautu njadi pegangan diau kuat ngan aman batan endak idup kitau luak sauh, alat diau mendamka kapaltu. Aghapantu masuak enggut ke belakang tabir duaghau, ke dalam biliak diau Mahasuci di Ghuma Allah.

²⁰Yesus la mbuat jalan batan endak kitau ke bada itu. Diau la masuak ke situ njadi Imam Besak batan endak kitau selelamaunyau nurut carau imam Melkisidik.