Read Central Malay IBRANI 8 Bible Online

IBRANI 8 - Central Malay bible

IBRANI 8

¹Inti gegalau kici'an tadi kitau adau Imam Besak diau duduak di sebela kanan Allah diau Mahabesak di sergau.

²Diautu ngerjauka tugasAu di bada diau Mahasuci dalam kima Tuhan diau asli diau ditegakka Tuhan, ukan ditegakka manusiau.

³Bilang imam besak kerjaunyau ngenjuakka ngan Allah enju'an ngan kerban. Luak itu pulau Imam Besak kitau, Diautu mesti adau setu diau endak dikerbanka.

⁴Misalau Diau di deniauni, Diau nidau nian ka njadi imam, karnau la adau imam diau ngenjuakka kerban nurut ukum Taurat.

⁵Kerjau imam diau dikerjauka ughangtu sebenaghau cuman mbayangka setu diau adau di sergau. Itu la dikiciakka Allah ngan Musa, masau diau endak negakka kima Tuhan. Katau Allah ngan diau, “Ingatkala, gegalaunyau mesti kaba kerjauka nurut cuntau diau la ditunjuakka ngan kaba di pucuak gunung.”

⁶Anyautu mbak kini Yesus dapat tugas imam diau jawua lebia penting jak di kerjau imam-imam tadi, karnau pejanjian diau dibuatAu di antarau Allah ngan manusiau jawua lebia penting, karnau setu diau dijanjikatu lebia iluak.

⁷Misalau janji diau petamau la iluak, mangku nidau penting agi janji diau keduau.

⁸Anyautu Allah la ngiciakka sala umatAu, mangku Diau bekatau, “Ngenian, masaunyau ka sampai, Aku ka bejanji agi janji diau empai ngan jemau Israil ngan jemau Yahudi.

⁹Ukan luak janji diau Kujanjika ngan niniak puyangau, masau Aku nulung ughangtu ngeluagh jak di Mesir. Ughangtu nidau nuruti janji diau Kujanjika ngan ughangtu. Karnau itu Aku nidau nyanauka ughangtu.” Luak itula katau Tuhan.

¹⁰“Mangku inila janji diau Kujanjika ngan umat Israil,” katau Tuhan, “Masaunyau ka sampai, Aku ka mbuat ughangtu maju merupuakka perintaKu, mangku ati ughangtu ka maju ngingatkanyau. Aku ka njadi Allah ughangtu, mangku ughangtu ka njadi umatKu.

¹¹Mangku ughangtu nidau nanti ngajagh denga-sana'au ngan kantinau agi, ngan ngiciakka ngan diau, ‘Keruanila Tuhan!’ Karnau gegalau ughangtu, besak keciak, ka ngeruani Aku.

¹²Aku ka ngabiska sala ughangtu, ngan nidau agi ngingatka dusau-dusaunyau.”

¹³Allah la ngiciakka janji diau empai, mangku janji diau dulu njadi tuau ngan nidau begunau agi. Mangku setu diau la tuau ka gasip lengit.