Read Central Malay YAKUBUS 4 Bible Online

YAKUBUS 4 - Central Malay bible

YAKUBUS 4

¹Jak di manau asalau gegalau belagau ngan bebala? Apu ukan asalau jak di serilau kamu diau maju bekerjau di kamu?

²Kamu adau setu enda'au, anyautu nidau dapat, mangku kamu sengit endak mbunua. Kamu ncubau, anyautu nidau dapat setu diau kamu enda'au, mangku kamu bebala ngan belagau. Kamu nidau dapat tuapau-apau, karnau kamu nidau mintak ngan Allah.

³Mangku amun kamu bedu'a, kamu nidau ka dapat, karnau du'a kamu sala. Setu diau kamu pintaktu batan endak serilau kamu itula.

⁴Ui, kamu jemau diau nidau ta'at! Apu kamu nidau keruan, amun bekantin ngan deniau, njadi musua Allah? Jemau diau bekantin ngan deniau bemusuan ngan Allah.

⁵Jangan kamu sangkau, setu diau ditulis di Injil ca'au ajau, “Rua diau dienjuakka Allah ngan kitau dikenda'iNyau ngan sengit!”

⁶Empuak luak itu besakla sayang Allah ngan kitau. Itula sebapau di Injil ditulis, “Allah melawan jemau diau geduak, tapitu nyialka jemau diau ngensian.”

⁷Karnau itu tunduakla ngan Allah ngan lawanla Iblis, mangku diau ka larat jak di guak kamu.

⁸Pasighila Allah, mangku Allah masighi kamu. Beresiakala tangan kamu, ui, kamu diau bedusau! Beresiakala rupu'an kamu diau nidau tetap.

⁹Kamu mesti nyesal nian ngan nangis berandaian. Tetawau kamu gentila ngan nangis. Riang kamu gentila ngan bingung.

¹⁰Ngensianla di adapan Tuhan, mangku Diau ka ninggika kamu.

¹¹Kantin-kantinku, jangan kamu sangi buruakka ngan sangi salaka. Jemau diau mburuakka ngan nyalaka kantinau, diau mburuakka ngan nyalaka ukum Allah. Amun kamu nyalaka ukum Allah, kamu nidau na'ati ukumtu, tapitu kamu njadi akimau.

¹²Cuman sughang diau behak netapka ukum ngan ngadili manusiau. Itula Allah diau bekuasau nyelamatka ngan mbenasauka. Anyautu sapau kamu, mangku kamu endak nyalaka kantin kamu?

¹³Dengaghkala katauku ini, ui kamu diau bekiciak, “Saghini apu pagi kami ka pegi ke kuta anu. Kami endak mendam di situ setaun endak bedagang ngan ndalak tanci.”

¹⁴Kamu nidau keruan, tuapau diau ka tejadi ngan kamu pagi. Tuapau reti idup kamu? Kamu semegi luak embun. Diau kina'an jerang ajau mangku lengit.

¹⁵Semestiau kamu bekatau, “Amun Tuhan ngenda'inyau, kami gi idup ngan ngerjauka itu-ini.”

¹⁶Anyautu mbak kini kamu geduak ngan kiciak besak. Gegalau kici'an luak itu sala.

¹⁷Karnau itu jemau diau keruan setu diau iluak diau mesti dikerjaukanyau, anyautu nidau ngerjaukanyau, jemautu bedusau.