Read Central Malay 1 PITRUS 3 Bible Online

1 PITRUS 3 - Central Malay bible

1 PITRUS 3

¹Luak itu pulau kamu diau njadi bini, kamu mesti tunduak ngan laki kamu, supayau amun adau diau nidau percayau ngan ceritau jak di Allah, kerjau kamu pacak mbuat diau percayau, nidau nanti ngiciak tuapau-apau,

²karnau diau nginak kerjau kamu diau beresia ngan alim nian.

³Jangan kualapan kamu di luagh ajau ngan carau kamu meriasi gumbak ngan makai periasan emas ngan bebaju alap-alap.

⁴Anyautu kualapan kamu semestiau nimbul jak di ati ngan carau diau iluak ngan tenang. Itu kualapan diau tetap diau beregau nian di adapan Allah.

⁵Ngan carau luak itula tinau-tinau senitu diau buagamau ngan ngaghapka Allah meriasi diriau ngan carau tunduak ngan lakiau.

⁶Sara pulau luak itu. Diau ta'at ngan Abraham ngan ngiciakka diau tuanau. Kamu mbak kini anak-anak Sara, amun kamu ngerjauka setu diau iluak ngan nidau penakut.

⁷Mangku kamu pulau diau njadi laki, kamu semestiau idup ngan bini kamu ngan jagau, bansau diautu jemau nidau kuat. Regauila diau, karnau diau pulau luak kamu ka dienjuakka Allah idup selelamaunyau. Kerjaukala itu, mangku nidau bediau diau ngalangi du'a kamu.

⁸Mangku kamu mesti suijauan ngan semegi peghasauan. Sangi sayangila kamu luak jemau duau beghading, mangku sangi sialka kamu ngan jangan sangi gedu'i.

⁹Jangan mbalas setu diau ja'at ngan ja'at, apu maki ngan maki. Anyautu balaskala ngan mintak setu diau iluak jak di Allah. Karnau batan endak itula kamu dipilia Allah, supayau kamu nerimau setu diau iluak jak di Diau.

¹⁰Karnau di Injil ditulis luak ini, “Jemau diau endak meghasauka idup diau lemak ngan meghasauka masau diau iluak, jemautu jangan ngiciak setu diau ja'at ngan jangan ngiciak setu diau mbu'ung.

¹¹Jemautu mesti njawuhi setu diau ja'at ngan ngerjauka setu diau iluak. Jemautu mesti beusaha nian endak idup ngan damai.

¹²Karnau Tuhan maju njagaui jemau diau nuruti kenda'Au. Tuhan maju ndengagh du'a ughangtu. Anyautu Tuhan maju melawan jemau diau ngerjauka setu diau ja'at.”

¹³Sapau diau endak mbuat ja'at ngan kamu, amun kamu maju mbuat diau iluak?

¹⁴Anyautu amun nyela kamu sengsarau karnau ngerjauka setu diau iluak, riangla kamu. Jangan kamu takut ngan sapau kila, jangan ghegak.

¹⁵Dalam ati kamu regauila Keristus, karnau Diau Tuhan. Mangku kamu mesti maju siap-siagau nimbali jemau diau betanyau nanyauka aghapan diau adau di kamu.

¹⁶Kerjaukala titu ngan iluak ngan meregaui pendapat jemau. Ati keciak kamu mesti beresia, mangku amun kamu dikiciakka ja'at ikak ngerjauka diau iluak karnau percayau ngan Keristus, mangku jemau diau ngiciakka setu diau ja'attu ka maluan nian.

¹⁷Amun nyela kendak Allah kamu nanggung, iluakla nanggung karnau kerjau iluak sangkan nanggung karnau kerjau ja'at.

¹⁸Keristustu mati sekali batan endak dusau manusiau, jemau diau nidau besala batan endak jemau besala. Keristus ngerjauka titu, supayau Diau pacak mbimbing kamu njenguak Allah. Diautu la dibunua masau njadi manusiau, tapitu la diidupka agi nurut rua.

¹⁹Dalam ruatu Diau pegi ngiciakka ceritau jak di Allah ngan rua-rua diau di kawalan,

²⁰diautu rua jemau diau nidau ta'at ngan Allah timpau Nua. Masau itu Allah nunggu ngan ngaligh, masau Nua mbuat kapalau. Cuman jemau diau adau di kapaltu, gegalaunyau delapan ughang, diau diilakka karnau ayiak merampus.

²¹Gegalaunyautu umpamau baptisan diau mbak kini nyelamatka kamu. Baptisantu ukan batan endak mberesiaka badan jak di gegalaunyau diau kumua, anyautu njadi janji ngan Allah jak di ati keciak diau iluak. Baptisantu nyelamatka kamu, karnau Yesus Keristus la idup jak di mati

²²ngan la nayiak ke sergau. Mbak kini Diau duduak di sebela kanan Allah ngan merinta gegalau malaikat ngan penguasau ngan rua.