Read Central Malay 1 PITRUS 5 Bible Online

1 PITRUS 5 - Central Malay bible

1 PITRUS 5

¹Aku mintak pengulu-pengulu jemau Keristen peratikala. Karnau aku sughang pengulu pulau ngan la nginak Keristus sengsarau ngan ngikut diagungka, amun keagungan Keristus dinyatauka nanti, mangku aku mintak nian,

²supayau kamu nyayia jemau Keristen diau di kamu luak rumbungan bebiri diau diseraka Allah ngan kamu. Sayiala ughangtu ngan riang, luak dikenda'i Allah. Jangan bemumut, jangan pulau karnau ndalak untung, tapitu karnau endak nian bekerjau batan endak Allah.

³Jangan pulau nguasaui jemau diau dipercayauka ngan kamu. Anyautu jadila penauan batan endak ughangtu.

⁴Mangku amun Keristus, tukang sayia bebiri diau agungtu, datang nanti, kamu ka nerimau adia menang diau alap nianan diau nidau ka beghuba.

⁵Luak itu pulau kamu diau gi mudau, tunduakla ngan jemau tuau, mangku gegalau kamu sangi tulungila ngan nganggap jemau lain lebia penting. Karnau di Injil ditulis luak ini, “Allah melawan jemau geduak, tapitu nyayangi jemau ngensian.”

⁶Karnau itu, tunduakla ngan Allah diau bekuasau, mangku Diau ka ninggika kamu, amun la masaunyau.

⁷Serakala gegalau keghega'an ngan Allah, karnau Diau njagaui kamu.

⁸Sepepadaula ngan maju siap-siagau, karnau Iblis musua kamu. Diau luak setuau bejalan ghatau sampai ngaum endak ndalak mangsaunyau.

⁹Lawanla diau ngan percayau nian ngan Keristus, karnau kamu keruan kantin kamu diau percayau di gegalau deniau sengsarau semegi ngan kamu.

¹⁰Udim kamu sengsarau jerang, mangku Allah ka ndandani kamu. Diau ka ngenjuakka pelapiak diau kuat ngan neguaka ati kamu, karnau Allahtu iluak. Diautu la milia kamu endak seghundak ngan Keristus, mangku kamu meghasauka keagunganNyau diau nidau ka udim-udim.

¹¹Diautula bekuasau selelamaunyau. Amin.

¹²Silas, kantinku diau pacak dipercayaui nulung aku nulis surat diau dikit ini. Aku endak neguaka ngan yakinka kamu, bansau gegalaunyau ini ngenian ceritau keilu'an Allah. Bepautla nian ngan pesan ini.

¹³Kantin-kantin kitau di Babilun diau pulau dipilia Allah bepesan ngan kamu. Luak itu pulau Markus diau luak anakku.

¹⁴Sangi bepesanla sughang ngan diau lain ngan sayang jak di Keristus. Aku bedu'a, supayau Tuhan njagaui gegalau kamu diau la seghundak ngan Keristus. Amin.