Read Central Malay 2 PITRUS 3 Bible Online

2 PITRUS 3 - Central Malay bible

2 PITRUS 3

¹Kantin-kantinku diau kusayangi. Inila surat diau keduau diau kutulis ngan kamu. Di duau surat itu aku la beusaha nimbulka rupu'an diau benagh di kamu ngan peringatan.

²Aku endak, supayau kamu ngingatka kici'an diau la senitu dikiciakka nabi-nabi Allah ngan perinta Tuhan, Rajau Penyelamattu, diau la dikiciakka rasul-rasul ngan kamu.

³Diau penting diau mesti kamu keruani, bansau masau pengabisan saman ka adau jemau diau idupau dikuasaui serilaunyau. Ughangtu ka nggelakka kamu.

⁴Katau ughangtu, “Kataunyau Tuhan bejanji ka datang! Mbak kini di manau Diau? Jak niniak puyang kitau mati gegalaunyau gi semegi luak masau deniau dijadika.”

⁵Ughangtu sajauka nidau endak keruan, bansau senitu langit ngan deniau dijadika ngan katau Allah. Daghatan nimbul jak di ayiak, dibentuak ngan ayiak,

⁶mangku ngan ayiak pulau deniau senitu dibenasauka ngan ayiak diau merampustu.

⁷Anyautu langit ngan deniau diau adau mbak kini disayia ngan katau Allah, ka dibenasauka pulau ngan api. Diau gi nunggu enggut masau jemau diau nidau keruan Allah diukum ngan dibenasauka.

⁸Anyautu kantin-kantinku, jangan kamu lupau ini: Amun Tuhan, saghi semegi ngan seribu taun, seribu taun semegi ngan saghi.

⁹Tuhan nidau lambat nepati janjiAu, empuak adau diau nganggap luak itu. Anyautu Diau ngaligh ngan kamu, karnau Diau endak, supayau jangan adau diau benasau. Diau endak, supayau gegalau jemau ngubai jak di dusaunyau.

¹⁰Anyautu aghi Tuhan datang ka sampai nidau disangkau, luak pemaling. Masau itu langit ka lengit ngan muni gurua diau besak. Setu diau adau di langit ka abis galau mutung ngan api. Deniau ngan gegalau isiau ka abis galau.

¹¹Amun gegalaunyau ka abis ngan carau luak itu, mangku kamu mesti idup beresia batan endak Allah ajau ngan ta'at ngan Diau,

¹²semasau kamu nunggu ngan beusaha Tuhan cepat datang. Masau itu langit ka abis mutung, deniau ka ancur karnau angatau.

¹³Anyautu kitauni nantika setu diau la dijanjika Allah, langit diau empai ngan deniau diau empai. Di situ kendak Allah ka dituruti galau.

¹⁴Karnau itu, kantin-kantinku diau kusayangi, penarau nantika gegalaunyautu, beusahala nian, supayau kamu idup beresia ngan nidau becacat di adapan Allah ngan maju idup damai ngan Allah.

¹⁵Tuhan kitau ngaligh. Anggapla masau ini diau dienjuakka ngan kitau, supayau pacak selamat. Paulus, kantin kitau diau disayangi, la nulis pulau luak itu ngan kamu. Diau nulis titu nurut pengertian diau dienjuakka Allah ngan diau.

¹⁶Di gegalau suratau diau nulis ceritau itu. Nyela, dalam suratautu adau diau segau dikeruani, mangku jemau diau nidau ngeruaninyau ngan nidau tegua imanau ngubai retiau. Ughangtu ngerjauka titu ngan gegalaunyau diau ditulis dalam Injil, mangku ughangtu ka benasau.

¹⁷Anyautu kamu diau kusayangi la keruan gegalaunyautu. Karnau itu sepepadaula. Jangan kamu tebatak sesat ngan jemau diau nidau keruan ukum, ngan jangan kelengitan aghapan diau tegua.

¹⁸Kamu mesti tamba meghasauka keilu'an Tuhan, Rajau Penyelamat kitau Yesus Keristus, ngan tamba ngeruani Diau. Tepujila Diau mbak kini enggut selelamaunyau. Amin.