Read Central Malay 1 YUHANIS 2 Bible Online

1 YUHANIS 2 - Central Malay bible

1 YUHANIS 2

¹Ui, anak-buaku! Aku nulis itu ngan kamu, supayau kamu jangan mbuat dusau. Anyautu amun adau diau mbuat dusau, kitau adau sughang Penulung diau adil, diautu Yesus Keristus, diau endak mbenaghka kitau di adapan Allah Bapak.

²Karnau Yesus Keristus njadi kerban, mangku dusau kitau pacak diabiska. Ukan dusau kitau ajau, tapitu pulau dusau gegalau umat manusiau.

³Tandau kitau ngeruani Allah, kitau na'ati perintaHau.

⁴Jemau diau bekatau, “Aku keruan Allah,” anyautu nidau na'ati perintaHau, jemautu pembu'ung, Allah nidau bediau dalam atiau.

⁵Jemau diau na'ati katau Allah nyayangi Allah nian. Itula tandaunyau kitau idup seghundak ngan Diau.

⁶Jemau diau bekatau, bansau diau idup seghundak ngan Allah, jemautu mesti menau Keristus.

⁷Kantin-kantinku diau kusayangi. Diau kutulis itu ukan perinta diau empai, tapitu perinta diau lamau diau la dikiciakka ngan kamu jak di senitu. Perinta itu katau Allah diau la kamu dengagh.

⁸Anyautu perinta diau empai kutulis pulau ngan kamu, diau la dinyatauka benagh ngan Keristus ngan kamu pulau, karnau keleman laka lengit ngan terang diau benagh mulai besinagh.

⁹Jemau diau bekatau, bansau diau adau dalam terang, anyautu meluatka jemau Keristen diau lain, jemautu gi dalam keleman enggut mbak kini.

¹⁰Jemau diau nyayangi jemau lain, jemautu maju idup dalam terang, mangku di diau nidau bediau setu nyesatka.

¹¹Anyautu jemau diau meluatka jemau lain, jemautu adau dalam keleman. Diau bejalan di keleman, nidau keruan ke manau diau pegi, karnau kelemantu mbuat nidau pacak nginak.

¹²Aku nulis ngan kamu, ui anak-buaku, bansau dusau kamu la diabiska karnau Keristus.

¹³Aku nulis ngan kapu dighi, tuau-tuau, karnau kapu dighi la keruan, bansau Diau la adau jak di penembai. Aku nulis ngan kamu diau gi mudau, karnau kamu la ngalaka diau ja'attu.

¹⁴Aku nulis ngan kamu, anak-buaku, karnau kamu keruan Bapak. Aku nulis ngan kapu dighi, tuau-tuau, karnau kapu dighi keruan Diau la adau jak di penembai. Aku nulis ngan kamu, memudau, karnau kamu tegua, katau Allah adau di ati kamu ngan kamu la ngalaka diau ja'at itu.

¹⁵Jangan nyayangi deniau ngan setu diau di deniauni. Amun kamu nyayangi deniau, kamu nidau nyayangi Allah Bapak.

¹⁶Karnau gegalaunyau diau adau di deniauni, kendak ati kendak matau, gegalaunyautu asalau jak di deniau, ukan jak di Allah Bapak.

¹⁷Deniau ngan gegalau setu diau adau di dalamau diau diibauka manusiau ka lengit. Anyautu jemau diau ngerjauka kendak Allah maju idup selelamaunyau.

¹⁸Ui anak-buaku, aghi kiamat la pasigh. La dikiciakka ngan kamu, bansau Musua Keristus ka datang. Mbak kini la datang banyak jemau diau bemusuan ngan Keristus. Itula tandaunyau, bansau aghi kiamat la pasigh.

¹⁹Ughangtu jak di kitau, anyautu la ninggalka kitau, karnau ughangtu ukan jemau kitau nian. Amun ughangtu jemau kitau nian, cengki ughangtu maju seghundak ngan kitau. Anyautu ughangtu la ninggalka kitau, mangku tenyatau, bansau nidau sughang kia jak di ughangtu jemau kitau.

²⁰Kamu la nerimau Rua Allah jak di Keristus, mangku kamu la keruan diau benagh.

²¹Aku nulis itu ngan kamu, ukan karnau kamu nidau keruan diau benagh, tapitu karnau kamu la ngeruaniNyau nian, mangku kamu keruan, bansau ajaghan diau benaghtu nidau mbu'ung.

²²Sapau pembu'ung, amun ukan jemau diau ngiciakka, Yesus ukan Mesias, Rajau Penyelamat, diau dijanjika Allahtu? Jemau itu musua Keristus, nidau ngaku'i Allah Bapak ngan Anak.

²³Karnau jemau diau nidau ngaku'i Yesus, nidau pulau ngeruani Allah Bapak. Jemau diau ngaku'i Yesus ngeruani pulau Allah Bapak.

²⁴Mangku kamutu, ceritau diau la kamu dengagh jak di senitu mesti kamu jagaui iluak-iluak dalam ati. Amun katau diau la kamu dengagh jak di senitu maju di kamu, mangku kamu maju seghundak ngan Anak ngan Allah Bapak pulau.

²⁵Mangku inila janjiAu: idup selelamaunyau.

²⁶Aku nuliska titu ngan kamu ceritau jemau diau ncubau nyesatka kamu.

²⁷Mangku kamu la nerimau Rua Allah diau dienjuakka ngan kamu. Karnau itu nidau nanti kamu diajaghi jemau lain, karnau Ruatu ngajaghka gegalaunyau ngan kamu. Setu diau diajaghkatu benagh ukan mbu'ung. Mangku kamu mesti ta'at ngan setu diau diajaghkaNyautu. Luak itula kamu maju seghundak ngan Keristus.

²⁸Mangku, ui anak-buaku, majula seghundak ngan Keristus, mangku amun Diau datang nanti, kitau nidau takut ngadap Diau ngan nidau nanti nyemuni karnau maluan.

²⁹Kamu la keruan, bansau Keristus idup nurut kendak Allah, mangku kamu mesti keruan pulau, bansau bilang jemau diau idup nurut kendak Allah asalau jak di Allah.