Read Central Malay 1 YUHANIS 4 Bible Online

1 YUHANIS 4 - Central Malay bible

1 YUHANIS 4

¹Kantin-kantinku diau kusayangi. Jangan percayau ngan gegalau jemau diau ngiciakka, diau adau Rua Allah. Anyautu ujila kudai jemautu, mangku kamu keruan, apa rua diau adau di jemautu asalau jak di Allah apu ukan, karnau banyak nabi tiruan la adau di manau-manau.

²Luak inila caraunyau kitau ngeruani, apu itu Rua Allah apu ukan: Jemau diau ngaku'i Yesus Keristus datang ke deniau nyerupaui manusiau, jemautu adau rua jak di Allah.

³Mangku jemau diau nidau ngaku'i Yesus, jemautu nidau bediau Rua Allah. Diautu adau rua jak di Musua Keristus. Kamu la ndengagh, bansau rua itu ka datang. Mbak kini diau la adau di deniauni.

⁴Ui anak-buaku, kamuni asal jak di Allah, mangku kamu la ngalaka nabi tiruantu, karnau bekuasaula rua diau adau di kamu sangkan rua diau adau di deniauni.

⁵Ughangtu asalau jak di deniau. Ughangtu ngiciakka setu diau adau di deniauni, mangku deniau ndengaghka kici'an ughangtu.

⁶Kitauni asalau jak di Allah. Jemau diau keruan Allah ndengagh kici'an kitau. Jemau diau ukan asalau jak di Allah nidau ndengaghka kici'an kitau. Luak itula kitau pacak mbidaka rua diau ngiciakka diau benagh ngan rua diau nyesatka.

⁷Kantin-kantinku diau kusayangi. Mela kitau sangi sayangi, karnau sayang asalau jak di Allah. Jemau diau nyayangi, jemautu anak Allah ngan keruan Allah.

⁸Jemau diau nidau sayang nidau keruan Allah, karnau gegalau kerjau Allah dikerjaukaNyau, karnau Diau sayang.

⁹Allah nyatauka ngan kitau, bansau Diau nyayangi kitau, karnau Diau ngajung Ana'Au diau gi sughang itula datang ke deniau, supayau kitau bulia idup karnau Ana'Autu.

¹⁰Luak inila kitau keruan, bansau Allah nyayangi kitau nian: Ukan kitau diau la nyayangi Allah, tapitu Allah la nyayangi kitau ngan ngajung Ana'Au, supayau dusau kitau pacak diabiska karnau Diau.

¹¹Kantin-kantinku, amun Allah nyayangi kitau luak itu, mangku kitau pulau mesti sangi sayangi.

¹²Nidau bediau sughang kiala diau kekela nginak Allah. Anyautu amun kitau sangi sayangi, Allah maju seghundak ngan kitau, mangku kitau pacak nyayangi nian.

¹³Allah la ngenjuakka ngan kitau RuaHau, mangku kitau keruan, bansau kitau idup seghundak ngan Allah, Allah seghundak ngan kitau.

¹⁴Kami la nginak Anak Allah, mangku kami ngiciakka ngan jemau lain, bansau Diau diajung Allah Bapak njadi Rajau Penyelamat deniauni.

¹⁵Amun jemau ngaku'i Yesus itu Anak Allah, Allah idup seghundak ngan diau, diau seghundak ngan Allah.

¹⁶Mangku kitau keruan ngan percayau Allah nyayangi kitau. Allah itu nyayangi. Jemau diau maju nyayangi maju seghundak ngan Allah, Allah seghundak ngan diau.

¹⁷Karnau kitau disayangi Allah nian, mangku kitau nidau endak takut masau aghi kiamat, karnau idup kitau luak idup Keristus di deniauni.

¹⁸Jemau diau meghasauka disayangi nidau nanti takut. Nyela, sayangAu melengitka gegalau peghasauan takut. Jadi, jemau diau gi takut ngadap aghi kiamat lum meghasauka nian sayang Allah, karnau diau gi takut diukum.

¹⁹Kitau nyayangi jemau, karnau Allah la dulu nyayangi kitau.

²⁰Amun jemau bekatau, “Aku nyayangi Allah”, anyautu luat ngan kantinau, jemautu pembu'ung. Karnau jemau diau nidau nyayangi kantinau diau kina'an, manau ka pacak nyayangi Allah diau nidau kina'an.

²¹Mangku perinta inila dienjuakka Tuhan ngan kitau: Jemau diau nyayangi Allah, mesti nyayangi kantinau pulau.