Read Central Malay PENGINA'AN 1 Bible Online

PENGINA'AN 1 - Central Malay bible

PENGINA'AN 1

¹Inila ceritau diau dinyatauka Yesus Keristus nceritauka setu diau ka tejadi. Allah ngiciakkanyau ngan Keristus, mangku diancakkaNyau ngan budak-budak Allah setu diau mesti tejadi. Diautu ngajung malaikatAu endak nyataukanyau ngan Yuhanis, buda'Autu.

²Yuhanistu la nceritauka gegalaunyau diau la tekinak. Mangku inila ceritaunyau ngiciakka katau Allah diau dinyatauka Yesus Keristus.

³Riangla jemau diau mbacauka katau ini ngan jemau diau ndengaghkanyau mangku na'ati setu diau ditulistu, karnau nidau lamau agi gegalaunyautu ka tejadi.

⁴Ngan kantin-kantin jemau Keristen diau di tujua kuta di daira Asia Keciak aku, Yuhanis, nulis ini. Aku bedu'a, supayau kamu meghasauka keilu'an ngan damai jak di Allah. Allahtu la adau jak di senitu enggut mbak kini ngan maju ka adau. Keilu'an ngan damaitu pulau jak di tujua rua diau adau di adapanNyau

⁵ngan jak di Yesus Keristus diau nyatauka setu diau pacak dipercayaui. Diautu dulu sekali ngulang idup jak di mati mangku nguasaui rajau-rajau di deniauni. Diautu nyayangi kitau ngan mbibaska kitau jak di dusau karnau daghaHau,

⁶mangku njadika kitau sebangsau, njadi imam diau bekerjau batan endak Allah, Bapa'Au. Yesus Keristustu agung ngan bekuasau selelamaunyau. Amin.

⁷Kina'ila, Diau datang ngan aban! Gegalau matau ka nginak Diau ngan pulau jemau diau la nuja ngan mbunua Diau ngan gegalau bangsau diau adau di deniauni ka nangis berandaian karnau Diau. Nyela nian, amin!

⁸“Akunila diau dulu sekali ngan mendian sekali,” katau Tuhan Allah diau Mahakuasau, diau adau jak di senitu enggut mbak kini ngan maju ka adau.

⁹Aku Yuhanis, kantin kamu diau semegi nanggungau luak diau dighasauka bilang anak-bua Keristus. Kitauni maju ta'an sengsarau karnau njadi umatAu. Aku dicapakka ke pulau Patmus, karnau aku ngiciakka katau Allah ngan ngiciakka Yesus Keristus.

¹⁰Masau aghi Tuhan aku dikuasaui Rua Allah, mangku aku ndengagh suarau diau bias luak muni terumpit ngiciak di belakangku.

¹¹Katau suarautu, “Setu diau kaba kinak tuliskala di sebua kitab, mangku kighimkala ngan jemau Keristen di tujua kuta, diautu Ipisus, Semirna, Pergamus, Tiatira, Sardis, Piladelpia ngan Laudikia.”

¹²Mangku aku nulia endak nginak sapau diau ngiciak ngan aku. La udim aku nulia, mangku tekinak tujua butiak tiang lampu jak di emas.

¹³Di pugan tiang lamputu adau sughang diau luak Anak Manusiau betegak di situ. BajuAu baju lambing enggut ke tumit. DadauNyau dililit emas.

¹⁴Pala'Au ngan gumba'Au putia nianan luak kapas. MatauNyau besinagh-sinagh luak api.

¹⁵KetingAu besinagh luak tembagau dalam api. SuarauNyau luak ayiak besak tumban ke cughup.

¹⁶Tangan kananAu ngecakka tujua bintang. Jak di mulutAu adau pedang tajam diau bematau duau. DayiAu besinagh-sinagh luak matau-aghi dang tengaghi.

¹⁷Masau aku nginak Diau, aku tejeghumus di adapan ketingAu luak jemau mati. Diau nepiakka tanganAu di aku mangku bekatau, “Nidau nanti takut! Aku diau dulu sekali ngan mendian sekali.

¹⁸Akunila idup. Aku la mati, anyautu kina'ila akuni idup selelamaunyau. Akuni megang kunci kematian ngan bada rua jemau mati.

¹⁹Karnau itu tuliskala setu diau la kaba kinak, empuak diau tejadi mbak kini, empuak diau ka tejadi nanti.

²⁰Mangku inila resiau tujua bintang diau kaba kinak di tangan kananKu ngan tujua tiang lampu emas ini: Tujua bintangtu malaikat jemau Keristen di tujua bada. Mangku tujua tiang lamputu tujua bada jemau Keristentu.”