Read Central Malay PENGINA'AN 11 Bible Online

PENGINA'AN 11 - Central Malay bible

PENGINA'AN 11

¹La udim itu dienjuakka ngan aku sebatang bulua diau luak pengukur, kataunyau, “Pegila, ukurla Ghuma Allah ngan bada bekerban, mangku bilangi jemau diau sembayang di dalamau.

²Anyautu tengalaman diau di luagh jangan diukur, karnau la dienjuakka ngan jemau diau nidau keruan Allah. Ughangtu ka nginja'i kuta diau beresiatu selamau empat pulua duau bulan.

³Mangku Aku ka ngajung duau ughang diau makai baju jak di kain karung endak ngiciakka katau Allah seribu duau ratus enam pulua aghi lamaunyau.”

⁴Ughang duautu duau batang saitun ngan duau tiang lampu diau adau di adapan Tuhan gegalau deniau.

⁵Amun adau jemau diau endak mbuati ughang duautu, adau api ngeluagh jak di mulutau mbenasauka gegalau musua. Gegalau musuau dibunua ngan carau luak itu.

⁶Ughang duautu adau kuasau nukup langit, mangku nidau ujan selamau ughangtu ngiciakka katau Allah. Ughangtu adau pulau kuasau nguba ayiak njadi dagha, adau pulau kuasau nyiksau deniau ngan gegalau mecam sengsarau, kebilau ajau ughang duautu endak ngerjaukanyau.

⁷Mangku la udim ughang duautu ngiciakka katau Allah, ughangtu ka diserangi benatang diau ngeluagh jak di jurang maut, mangku dikalaka ngan dibunua.

⁸Mangku mayat ughangtu ka adau di jalan di kuta besak itu, bada Tuhan ughangtu dipakuka di kayu saliptu. Namau lain kuta itu Sudum ngan Mesir.

⁹Jemau jak di gegalau bangsau ngan jungku ngan basau ngan pemili nginak mayatau selamau tenga empat aghi, mangku nidau ngajung mayattu dikuburka.

¹⁰Gegalau jemau di deniau injiak ngan riang, karnau ughang duautu la mati. Ughang ka ngadauka jamuan ngan sangi enju'i adia, karnau duau ughang nabitu banyak nyaraui jemau di deniauni.

¹¹La tenga empat aghi mangku adau agi nyawaunyau jak di Allah masu'i ughang duautu, mangku ughangtu ngulang idup agi. Gegalau jemau diau ngina'au takut galau.

¹²Mangku ughang duautu ndengagh suarau nyaghing jak di sergau mantaunyau, kataunyau, “Nayiakla ke sini!” Mangku nayiak ughang duautu ke sergau ditudungi aban. Musua ughangtu ngina'au galau.

¹³Masau itu pulau adau gempau besak, mangku bagi sepulua sebagi jak di kuta itu runtua. Tujua ribu ughang mati karnau gempautu. Jemau lain takut kematila mangku ngagungka Allah di sergau.

¹⁴Celakau ini la lalu pulau. Kina'ila celakau diau ketigau laka tejadi.

¹⁵La udim itu malaikat diau ketujua ngembus terumpitau, mangku adau suarau nyaghing di sergau, kataunyau, “Diau nguasaui deniauni Tuhan kitau ngan Rajau Penyelamat diau la dijanjikaNyau. Diau ka merinta luak rajau selelamaunyau.”

¹⁶Mangku duau pulua empat tuau-tuau diau duduak di kerusiau di adapan Allahtu nunduak nyemba Allah,

¹⁷kataunyau, “Tuhan Allah diau Mahakuasau diau la adau jak di senitu enggut mbak kini. Kami beterimau-kasia ngan Dighi, karnau Dighi la makai kuasau diau besaktu mangku la mulai merinta luak rajau.

¹⁸Gegalau bangsau diau nidau keruan Allah mara, anyautu la masaunyau Dighitu mara. La masaunyau Dighi ngadili jemau mati. La masaunyau pulau Dighi ngenjuakka upa ngan budak-budak Dighi ngan nabi-nabi, pulau ngan gegalau umat Dighi, jemau diau nyemba Dighi, besak keciak. La masaunyau mbenasauka jemau diau mbenasauka deniauni.”

¹⁹Mangku tebukak Ghuma Allah di sergau mangku kina'an di dalamau Peti Janji Allah. Mangku adau kilat nyelanyar ngan gurua gelugur ngan gempau besak ngan ujan es diau deghas.