Read Central Malay PENGINA'AN 12 Bible Online

PENGINA'AN 12 - Central Malay bible

PENGINA'AN 12

¹Mangku tekinak di langit setu diau nyelia. Adau sughang tinau diselimuti matau-aghi diau betegak di bulan. Di pala'au adau gitar jak di duau belas bintang.

²Tinautu dang ngandung, laka masaunyau endak merunggu, mangku diau tegauk kesakitan.

³Mangku tekinak agi di langit setu diau nyelia. Adau sikuak nagau abang diau besak nianan. Pala'au tujua, tandu'au sepulua. Di pala'autu adau tujua gitar.

⁴Iku'au naghiak bagi tigau sebagi jak di bintang di langit, mangku diumbankanyau ke deniau. Nagautu betegak di guak tinau diau endak merunggutu endak makan Ana'au, amun Diau la adau.

⁵Mangku adau Anak lanang diau ka merinta gegalau bangsau ngan tungkat besi. Mangku Anaktu diambiak dibatak belaghi guak Allah ngan guak kerusi rajautu.

⁶Mangku tinautu belaghi ke padang bungin, bada diau la disediauka Allah batan endak diau. Di situ diau disayia selamau seribu duau ratus enam pulua aghi.

⁷Mangku adau perang di sergau. Mikail ngan malaikat-malaikatau beperang melawan nagautu. Nagautu pulau beperang ditulung anak-buahau.

⁸Anyautu nagautu dikalaka, mangku nidau diajung agi mendam di sergau.

⁹Mangku nagau besaktu dicapakka keluagh. Diautu ulagh tuau diau dikiciakka Iblis ngan Sitan diau nyesatka gegalau deniau. Mangku diau diumbanka ke deniau. Luak itu pulau anak-buahautu.

¹⁰La udim itu aku ndengagh suarau diau nyaghing di sergau bekatau, “Mbak kini la masaunyau Allah nyelamatka umatAu. Mbak kini la nyatau kuasau Allah diau merinta luak Rajau. Mbak kini Rajau Penyelamat diau dijanjikatu la nyatauka kuasauNyau. Karnau Iblis diau mburuakka kantin-kantin kitau di adapan Allah siang malam la dilaratka jak di sergau.

¹¹Ughangtu la ngalaka diau ngan dagha Anak Bebiritu, dikalaka ngan ceritau iluak jak di Allah diau dikiciakka ughangtu. Ughangtu rila nyeraka nyawaunyau enggut mati.

¹²Karnau itu riangla, ui sergau ngan gegalau kamu diau adau di dalamau. Celakaula kamu, ui deniau ngan laut, karnau Iblis la tughun guak kamu. Diau mara kematila, karnau la keruan masaunyau tigha jerang agi.”

¹³Satu nagautu la jagau, bansau diau dicapakka ke deniau, diau njagal tinau diau melahirka Anak lanang tadi.

¹⁴Mangku tinautu dienju'i kidau bela sayap elang diau besak, mangku diau terbang ke badahau di padang bungin. Di situ diau disayia selamau tenga empat taun jawua ngan nagau itu.

¹⁵Mangku mulut nagautu nyemburka ayiak besak luak batang-ayiak merampus ke ara tinautu, supayau diau anyut.

¹⁶Anyautu deniau nulung tinautu ngan mbukak mulutau ngisap ayiak diau disemburka jak di mulut nagautu.

¹⁷Nagautu mara kematila ngan tinautu, mangku diau nyerangi pengadaunyau diau lain diau na'ati ukum Allah ngan ngiciakka ceritau Yesus.

¹⁸Mangku nagautu mendam di tepi laut.