Read Central Malay PENGINA'AN 13 Bible Online

PENGINA'AN 13 - Central Malay bible

PENGINA'AN 13

¹La udim itu aku nginak sikuak benatang ngeluagh jak di laut. Pala'au tujua, tandu'au sepulua. Di tanduaktu adau sepulua gitar, mangku di pala'autu ditulis namau-namau diau nggelakka Allah.

²Benatang diau kukinaktu semegi ngan setuau tutul. Ketingau luak keting beghuang. Mulutau luak mulut setuau. Mangku nagautu ngenjuakka ngan diau kekuatannyau ngan kuasaunyau diau besaktu.

³Mangku aku tekinak luak adau lukau diau mbayauka idupau di sala sutiak pala'au, anyautu lukau diau mbayaukatu ghadu. Gegalau deniau kemangan mangku ngikut benatangtu.

⁴Mangku ughangtu nyemba nagautu, karnau diau ngenjuakka kuasau ngan benatang tadi. Mangku ughangtu nyemba benatangtu ngan bekiciak, “Nidau bediau diau semegi ngan benatang itu! Nidau bediau diau pacak beperang melawan diau!”

⁵Kici'an benatangtu geduak nianan ngan nggelak. Diau bekuasau selamau empat pulua duau bulan.

⁶Mangku diau nggelakka Allah ngan namau Allah ngan Ghuma Allah ngan gegalaunyau diau adau di sergau.

⁷Mangku diau dibuliaka pulau melawan jemau diau la njadi hak Allah mangku dikalakanyau. Diau dienjuakka kuasau nguasaui bilang jungku, nenggeri, bangsau ngan basau.

⁸Mangku gegalau jemau di deniau nyemba diau, gegalau jemau diau namaunyau nidau ditulis jak deniau la adau. Namaunyautu nidau ditulis di kitab jemau idup diau adau di Anak Bebiri diau la disembeliatu.

⁹Jemau diau betelingau dengaghkala!

¹⁰Jemau diau la ditetapka endak dijilka cetau ka dijilka. Jemau diau la ditetapka endak dibunua ngan pedang cetau ka dibunua ngan pedang. Diau penting supayau jemau percayau maju tekun ngan ngaligh ngan maju percayau.

¹¹Mangku aku nginak sikuak benatang agi ngeluagh jak di dalam tana. Benatangtu adau tanduak duau butiak luak anak bebiri, anyautu diau ngiciak luak nagau.

¹²Diau adau kuasau luak benatang diau ngeluagh jak di laut tadi, karnau la dienjuakka ngan diau. Mangku diau mbuat gegalau jemau di deniau nyemba benatang diau lukaunyau mbayauka tadi la ghadu.

¹³Benatangtu mbuat tandau nyelia diau besak. Diau ngajung api tughun jak di langit dikina'i gegalau jemau.

¹⁴Mangku gegalau jemau di deniauni ditipuka ngan tandau nyelia diau dikerjauka di adapan benatang tadi karnau kuasaunyau. Mangku diajungau negakka patung endak nyemba benatang diau la lukau ngan pedang anyautu maju idup.

¹⁵Diau dienjuakka kuasau endak ngenjuakka nyawau ngan patungtu, mangku patung benatangtu pacak ngiciak ngan mbunua gegalau jemau diau enggup nyemba diau.

¹⁶Mangku diau ngajung gegalau jemau, besak keciak, kayau ngan serik, budak ngan jemau bibas, gegalaunyau ditandaui tangan kananau madak keningau.

¹⁷Mangku nidau sughang kiala pacak njual beli, amun nidau bediau tandau itu, diautu namau benatang tadi madak angkau namaunyau.

¹⁸Diau pentingtu pengertian. Jemau diau bepengertian pacak ngitung angkau namau benatangtu. Angkautu angkau manusiau, diautu enam ratus enam pulua enam.