Read Central Malay PENGINA'AN 18 Bible Online

PENGINA'AN 18 - Central Malay bible

PENGINA'AN 18

¹Udim itu aku nginak sughang malaikat lain agi tughun jak di sergau. Kuasaunyau besak ngan keagungannyau nerangi gegalau deniau.

²Ngan suarau nyaghing diau bekatau, “La rubua, la rubua galau kuta Babil diau besaktu. Diau la njadi bada iblis, bada rua ja'at nyemuni galau, bada gegalau burung diau makan buntang diau diluatka jemau,

³karnau gegalau bangsau la minum anggur serilaunyau diau ja'attu. Rajau deniau la menaugawia ngan diau. Pedagang di deniau la njadi kayau, karnau diau nidau pacak na'an serilaunyau diau besaktu.”

⁴Mangku aku ndengagh suarau lain jak di sergau bekatau, “Keluaghla, ui umatKu, pegila jak di situ! Jangan kamu ngikuti dusaunyau! Mangku jangan kamu ngikut diukum.

⁵Karnau dusaunyau la telungguak setinggi langit. Allah ngingatka gegalau keja'atannyau.

⁶Buatila diau luak diau la mbuati kamu. Balaskala duau kali lipat gegalaunyau diau la dikerjaukanyautu. Isila mangku'au ngan minuman diau duau kali lebia keghas jak di minuman diau disediaukanyautu.

⁷Enjuakka ngan diau penanggungan ngan dukau sebanyak keagungannyau ngan kekayauannyau diau la dighasaukanyautu, karnau diau la ngiciak dalam atiau, ‘Aku ratu diau bekuasau! Aku ukan randau. Aku nidau kekela ka kemada'an.’

⁸Itula sebapau, timpau saghi ajau diau ka celakau, buidapan ngan kemada'an ngan kelapaghan. Mangku diau ka disilap ngan api, karnau bekuasaula Tuhan Allah diau ngukumau.”

⁹Mangku rajau-rajau di deniau diau la menaugawia ngan diau ngan la meghasauka kekayauannyau ka nangis berandaian merandai kutatu, amun ughangtu nginak asap berembus jak di api diau mutungkanyautu.

¹⁰Ughangtu ka betegak jawua-jawua karnau takut kenau sengsaraunyautu ngan bekatau, “Celakau, celakau kaba, ui kuta diau besaktu, ui Babil, kuta diau kuattu! Masau sejam ajau kaba la diukum.”

¹¹Mangku pedagang deniau nangis berandaian ikak diau, karnau nidau bediau agi jemau diau endak mbeli barang dagangan ughangtu.

¹²Nidau bediau diau mbeli barang jak di emas, pirak, permatau, mutiara ngan pulau kain putia, kain ungu, sutera, kain abang, gegalau mecam barang jak di kayu ghum, kayu mahal, paying, jak di tembagau, besi ngan pualam,

¹³kulit kayu manis, rerempahan, minyak ghum, mur, keminyan, anggur ngan minyak, ghebuak diau alus ngan gendum, sapi ngan bebiri, kudau ngan gerubak, budak ngan nyawau jemau pulau nidau dibeli agi.

¹⁴Pedagangtu ka bekatau, “Gegalau bebuahan diau dikenda'i ati kaba la abis. Gegalau kekayauan ngan setu diau alap nidau bediau agi di kaba, nidau ka dapat agi.”

¹⁵Pedagang diau la njadi kayau karnau bedagang barang tadi ka betegak jak di jawua, karnau ughangtu takut ka kenau sengsaraunyau. Ughangtu ka nangis berandaian

¹⁶sampai bekatau, “Celakau, celakau nian kuta besaktu. Senitu diau pakai kain alus, kain ungu ngan kain abang, diau diperiasi emas, permatau ngan mutiara.

¹⁷Timpau sejam ajau kekayauannyautu abis.” Gegalau kepalak kapal laut ngan jemau nayiak ngan jemau kerjau kapal ngan gegalau jemau diau pencariannyau di laut betegak jak di jawua.

¹⁸Ughangtu tegauk, satu nginak asap berembus jak di api diau nyilap kutatu, kataunyau, “Selamau ini nidau bediau kuta luak kuta besak ini!”

¹⁹Mangku ughangtu ngamburka debu di pala'au, tandau ughangtu kemada'an, mangku tegauk ngan nangis berandaian, kataunyau, “Aiyai, celakau nian kuta besaktu! Kekayauannyau la mbuat gegalau jemau diau adau kapal laut njadi kayau, la njadi kayau ngan barangau diau mahal. Anyautu timpau sejam ajau abis galau!”

²⁰Riangla kamu, ui sergau, ngan kamu, ui umat Allah ngan nabi-nabi ngan rasul-rasul! Allah la ngukum diau karnau kamu.

²¹La udim itu sughang malaikat diau bekuasau ngatangka batu besak luak batu piri'an diau besak nian, dicapakkanyau ke dalam laut sampai bekatau, “Luak inila caraunyau kuta Babil diau besaktu ka dicapakka ke bawa ngan kuat, mangku nidau bediau agi.

²²Nidau bediau agi muni pemain kecapi, muni jemau nyanyi, muni seruling ngan muni terumpit. Nidau bediau agi muni jemau betukang. Mangku muni nutuak nidau ka bediau agi di kaba.

²³Nidau ka kina'an agi sinagh lampu di kaba. Nidau ka kedengaghan agi reramian jemau nika. Senitu pedagang kaba jemau penting di deniauni. Ngan kuasau gelap kamu nipuka gegalau bangsau di deniau.

²⁴Di dalam kutatu kedapatan dagha nabi-nabi ngan dagha jemau diau la njadi hak Allah ngan dagha gegalau jemau diau dibunua di deniauni.”