Read Central Malay PENGINA'AN 19 Bible Online

PENGINA'AN 19 - Central Malay bible

PENGINA'AN 19

¹La udim itu aku ndengagh suarau bias jak di jemau banyak nianan di sergau, kataunyau, “Haleluya! Tepujila Allah! Allah kitau Allah diau nyelamatka. Diau agung ngan bekuasau.

²Diautu ngakimi ngan benagh ngan adil, Diautu la ngukum pelacur diau la merusakka deniau ngan kerjaunyau diau ja'attu. Allah pulau la ngukum tinautu, karnau diau mbunua budak-buda'Au.”

³Mangku ughangtu bekatau agi, “Haleluya, tepujila Allah! Asapau berembus, nidau ka mandak-mandak selelamaunyau.”

⁴Mangku duau pulua empat tuau-tuau ngan empat benatangtu nunduak nyemba Allah diau duduak di kerusi rajautu, kataunyau, “Amin, haleluya, tepujila Allah!”

⁵Mangku adau suarau jak di kerusi rajautu, kataunyau, “Pujila Allah kitau, ui, gegalau budak Allah, kamu diau ta'at ngan Diau, empuak keciak empuak besak!”

⁶La udim itu aku ndengagh muni luak suarau jemau banyak nianan, luak muni ayiak besak ngan gurua diau besak, kataunyau, “Haleluya, tepujila Allah! Karnau Tuhan Allah kitau diau Mahakuasau la njadi Rajau.

⁷Mela kitau beriang-riang ngan injiak, ngagungka Diau, karnau aghi nika Anak Bebiri la sampai, buntingAu la udim besiyuak.

⁸Buntingtu dienjuakka baju kain alus, la pakai baju putia beresia diau besinagh-sinagh!” [Baju putiatu kerjau iluak diau dikerjauka jemau diau la njadi hak Allah.]

⁹Mangku malaikat bekatau ngan aku, “Tuliskala, ‘Riangla jemau diau dijeghumi ke jamuan nika Anak Bebiritu.’ ” Kataunyau agi, “Katau itu katau benagh, katau jak di Allah.”

¹⁰Mangku aku nunduak nyemba diau, anyautu diau bekatau, “Jangan luak ini! Jangan nyemba aku! Aku pulau budak semegi ngan kaba ngan kantin-kantin kaba diau maju percayau ngan Yesus. Sembala Allah!” Karnau ceritau diau dikiciakka nabi ceritau benagh diau dinyatauka Yesustu.

¹¹Mangku aku nginak sergau tebukak, ngenian adau sikuak kudau putia. Jemau diau nayi'inyau benamau “Diau Setia ngan Benagh”. Diautu ngukum ngan beperang adil.

¹²MatauNyau luak maghak api. Di pucuak pala'Au banyak gitar emas. Di Diau ditulis namau diau nidau dikeruani sughang kiala lain jak di Diau itula.

¹³Diau makai baju lambing diau la diceghupka dalam dagha. NamauNyautu “Katau Allah”.

¹⁴Gegalau tentera di sergau ngikut Diau. Ughangtu nayiak kudau putia ngan makai kain alus diau putia beresia.

¹⁵Di mulut Jemau tadi adau sebila pedang tajam. Ngan pedangtu Diau ka ngalaka bangsau-bangsau. Diau ka nyayia ughangtu ngan tungkat besi. Mangku Diau ka ngancit anggur di kilangan anggur. Titu mara Allah diau Mahakuasau.

¹⁶Di bajuAu ngan di balungAu ditulis namau, “Rajau gegalau rajau ngan Tuan gegalau tuan.”

¹⁷Mangku aku nginak sughang malaikat betegak di matau-aghi ngiciak ngan suarau nyaghing ngan gegalau burung diau terbang di langit, kataunyau, “Mela ke sini, betunggalla endak ngikut makan jamuan Allah, jamuan besaktu.

¹⁸Mela, makan daging gegalau rajau, gegalau tenterahau ngan kepala'au. Mela, makan daging gegalau kudau ngan jemaunyau ngan daging gegalau jemau, empuak besak empuak keciak, empuak budak empuak tuan.”

¹⁹Mangku aku nginak benatangtu ngan gegalau rajau di deniau ngan tenterahau betunggal endak beperang melawan Jemau di kudau putiatu ngan tenteraHau.

²⁰Mangku benatangtu ditangkap serempak ngan cak nabi diau la ngerjauka tandau nyelia di adapan benatangtu. Ngan carau luak itu diautu nyesatka jemau diau nerimau tandau benatang ngan nyemba patungautu. Benatang ngan nabitu dicapakka idup-idup dalam laut api diau maghak ngan belirang.

²¹Mangku gegalau jemau lain dibunua ngan pedang diau di mulut Jemau diau di pucuak kudautu. Mangku gegalau burung la nyagu makan daging ughangtu.