Read Central Malay PENGINA'AN 20 Bible Online

PENGINA'AN 20 - Central Malay bible

PENGINA'AN 20

¹La udim itu aku nginak sughang malaikat tughun jak di sergau. Di tanganau adau kunci jurang maut ngan rantai besak.

²Malaikattu nangkap nagau, ulagh tuautu, diautu Iblis ngan Sitan, dikebat selamau seribu taun,

³mangku dicapakka dalam jurang maut. Jurangtu dikunci ngan disigil, mangku nidau pacak agi nyesatka bangsau-bangsau, antak ka masau seribu taun lum abis. La udim itu dilepaska agi jerang ajau.

⁴Mangku aku nginak kerusi-kerusi rajau ngan jemau diau duduak di pucu'autu dienju'i kuasau endak ngakimi. Aku pulau nginak jiwa jemau diau la dipancung liaghau karnau nceritauka Yesus ngan ngiciakka katau Allah. Ughangtu nidau nyemba benatang ngan patungautu ngan pulau nidau nerimau tandaunyau di keningau ngan di tanganau. Ughangtu idup agi mangku merinta luak rajau serempak ngan Keristus selamau seribu taun.

⁵Anyautu jemau lain lum diidupka, antak ka masau seribu tauntu lum abis. Itu masau jemau dulu sekali ngulang idup.

⁶Mujurla ngan riangla jemau diau ngikut diidupka dulu sekali. Kematian diau keduau nidau bekuasau di ughangtu. Ughangtu ka njadi imam Allah ngan imam Keristus, mangku merinta luak rajau serempak ngan Diau selamau seribu taun.

⁷Mangku la udim abis seribu tauntu, Iblis ka dibibaska jak di kawalan.

⁸Mangku diau ka pegi nyesatka gegalau bangsau di deniau, di Gug ngan Magug, ditunggalkanyau ughangtu endak beperang. Banya'au ughangtu luak bungin di tepi laut.

⁹Mangku ughangtu pegi ke gegalau deniau ngepung kima jemau diau la njadi hak Allah ngan kuta diau disayangi Allahtu. Anyautu adau api tughun jak di langit nyilap ughangtu.

¹⁰Mangku Iblis diau nyesatka ughangtu dicapakka dalam laut api ngan belirang, bada benatang ngan nabiautu, disiksau siang malam enggut selelamaunyau.

¹¹La udim itu aku nginak adau kerusi rajau diau putia ngan besak ngan Allah duduak di pucu'au. Langit ngan deniau lengit di adapanNyau mangku nidau bediau agi.

¹²Mangku aku nginak jemau mati, besak-keciak, betegak di adapan kerusi rajautu. Gegalau kitab dibukak, dibukak pulau sebua kitab lain, diautu kitab jemau idup. Mangku gegalau jemau diadili nurut perembak sesughangan, luak ditulis dalam kitab-kitabtu.

¹³Mangku laut nyeraka jemau mati diau adau dalamau. Maut ngan bada jemau mati nyeraka jemau mati diau adau di situ. Ughangtu diadili nurut perembak sesughangan.

¹⁴Mangku maut ngan bada jemau mati dicapakka ke dalam laut apitu. Itula kematian diau keduau, laut api itula.

¹⁵Mangku bilang jemau diau nidau ditulis namaunyau dalam kitab jemau iduptu dicapakka ke dalam laut apitu.