Read Central Malay PENGINA'AN 21 Bible Online

PENGINA'AN 21 - Central Malay bible

PENGINA'AN 21

¹La udim itu aku nginak langit empai ngan deniau empai. Langit diau lamau ngan deniau diau lamau la abis. Laut pulau nidau bediau agi.

²Mangku aku nginak kuta diau beresia, diautu Yerusalim empai, tughun jak di sergau jak di Allah. Kutatu luak bunting diau la didandani endak betemu pengantinan.

³Mangku aku ndengagh suarau bias jak di kerusi rajautu, kataunyau, “Mbak kini bada Allah di guak manusiau, mangku Diau ka seghundak ngan ughangtu. Ughangtu ka njadi umatAu, mangku Diau ka njadi Allah ughangtu.

⁴Diau ka ngusu'i gegalau ayiak-matau jak di matau ughangtu, mangku jemau nidau ka mati agi. Nidau bediau agi kemada'an ngan berandaian, karnau gegalaunyau diau lamau la lalu.”

⁵Allah duduak di kerusi rajautu ngan bekatau, “Kina'ila, Aku njadika gegalaunyau empai!” KatauNyau, “Tuliskala ini, karnau gegalau kici'anni benagh ngan pacak dipercayaui.”

⁶KatauNyau agi ngan aku, “La udim! Akunila Alpa ngan Umiga, diau dulu sekali ngan diau mendian sekali. Jemau diau aus ka Kuenju'i minum jak di matau-ayiak diau ngenjuakka idup, nidau nanti dibayighi.

⁷Jemau diau menang ka bulia gegalaunyautu. Aku ka njadi Allahau, diautu ka njadi anakKu.

⁸Anyautu jemau diau penakut, jemau diau nidau percayau, jemau najis, pembunua, jemau menaugawia, dukun, jemau nyemba diwau, ngan gegalau pembu'ung ka dicapakka ke dalam laut api diau maghak ngan belirangtu. Itula kematian diau keduau.”

⁹La udim itu datang sughang jak di tujua malaikat tadi diau mbatak tujua pan diau penua ngan tujua sengsarau diau mendian, mangku diau bekatau ngan aku, “Mela ke sini. Aku ka nunjuakka ngan kaba bunting Anak Bebiri.”

¹⁰La udim itu aku dikuasaui Rua Allah mangku dibatak malaikattu ke gunung diau besak lagi tinggi, ditunjuakkanyau ngan aku kuta diau beresiatu, diautu Yerusalim diau tughun jak di sergau jak di Allah.

¹¹Kutatu penua ngan keagungan Allah. Sinaghau semegi ngan permatau diau alap sekali, luak permatau yaspis, jeghenia luak kacau diau alap.

¹²Dindingau besak lagi tinggi. Mukau lawangau duau belas. Di pucuak mukau lawangtu adau duau belas malaikat, mangku adau namau duau belas jungku Israil ditulis di situ.

¹³Di sebela matau-aghi idup adau tigau mukau lawang. Di sebela utara adau tigau mukau lawang. Di sebela selatan adau tigau mukau lawang. Di sebela matau-aghi tumban adau pulau tigau mukau lawang.

¹⁴Di dinding kutatu adau duau belas batu pelapiak, mangku di batutu ditulis namau duau belas rasul Anak Bebiritu.

¹⁵Malaikat diau ngiciak ngan akutu adau tungkat pengukur jak di emas batan endak ngukur kutatu ngan duaghaunyau ngan dindingau.

¹⁶Bentuak kutatu segi empat, panjangau semegi ngan libaghau, diukurau kutatu ngan tungkatau. Panjangau ngan libaghau ngan tinggiau duau ribu empat ratus kilu.

¹⁷Mangku dindingau diukur, tenyatau tinggiau enam pulua mitir. Ukuran diau dipakai malaikattu ukuran diau dipakai manusiau pulau.

¹⁸Dindingtu dibuat jak di permatau yaspis. Kutatu dibuat jak di emas asli, besinagh luak kacau.

¹⁹Batu pelapiak kutatu diperiasi ngan gegalau mecam permatau. Pelapiak diau petamau diperiasi batu yaspis, diau keduau batu nilam, diau ketigau batu mira, pelapiak diau keempat batu samrut,

²⁰diau kelimau batu unam, diau keenam batu sardis, pelapiak diau ketujua batu ratna cempaka, diau kedelapan batu beril, diau kesembilan batu kerisulit, pelapiak diau kesepulua batu kerisuperas, diau kesebelas batu lasuardi, diau keduau belas batu kecubung.

²¹Duau belas mukau lawangtu duau belas mutiara. Bilang mukau lawang sutiak mutiara. Mangku jalan kutatu jak di emas asli, besinagh luak kacau.

²²Aku nidau tekinak Ghuma Allah di kuta itu, karnau Ghuma Allahtu Tuhan itula, Allah diau Mahakuasau ngan Anak Bebiri itu.

²³Mangku kutatu nidau merluka terang matau-aghi ngan bulan neranginyau, karnau keagungan Allah neranginyau ngan Anak Bebiritu njadi lampuau.

²⁴Bangsau-bangsau ka bejalan dalam terangau ngan rajau di deniau mbatak retau bendaunyau ke kuta itu.

²⁵Mukau lawangau nidau ka dikatupka agi, ka maju tebukak, karnau nidau bediau aghi malam di situ.

²⁶Keagungan ngan kekayauan bangsau-bangsau ka dibatak ke situ.

²⁷Anyautu jemau diau ngerjauka setu diau meghegingka ngan penipu ngan tuapau kila diau najis nidau ka masuak ke dalamau. Diau masuak cuman jemau diau namaunyau ditulis dalam kitab jemau idup diau adau di Anak Bebiritu.