Read Central Malay PENGINA'AN 22 Bible Online

PENGINA'AN 22 - Central Malay bible

PENGINA'AN 22

¹Mangku malaikattu nunjuakka ngan aku ayiak batang-aghi diau ngenjuakka idup diau jeghenia luak kacau. Diau melilia keluagh jak di kerusi Allah ngan Anak Bebiritu

²di tetengaan jalan kutatu. Di tepi ayiaktu di sebeghang ini ngan di sebeghang sanau adau batang kayu diau ngenjuakka idup. Batangtu bebua duau belas kali setaun, sekali sebulan. Daunau dipakai endak meghaduka bangsau-bangsau.

³Mangku nidau bediau agi diau didawaika. Kerusi Allah ngan Anak Bebiritu ka adau di dalamau, mangku budak-buda'Au ka nyemba Diau

⁴ngan nginak dayiAu. Mangku namauNyau ka ditulis di kening ughangtu.

⁵Malam nidau ka bediau agi di situ, mangku ughangtu nidau ka merluka terang lampu ngan terang matau-aghi, karnau Tuhan Allah ka nerangi ughangtu. Mangku ughangtu ka merinta luak rajau enggut selelamaunyau.

⁶Mangku malaikattu bekatau ngan aku, “Kici'an ini benagh ngan pacak dipercayaui. Tuhan Allah ngenjuakka RuaHau ngan nabi-nabi. Diau la ngajung malaikatAu endak ngancakka ngan buda'Au setu diau laka tejadi.”

⁷“Ngenian, Aku laka datang. Riangla jemau diau nuruti ceritau kitab ini.”

⁸Mangku akuni, Yuhanis, la ndengagh ngan nginak gegalaunyautu. La udim aku ndengagh ngan nginak, aku nunduak di adapan malaikat diau ngancakka gegalaunyautu endak nyemba diau.

⁹Anyautu diautu ngiciak ngan aku, “Jangan kaba luak itu! Akuni budak semegi luak kaba ngan kantin-kantin kaba ngan nabi-nabi ngan gegalau jemau diau nuruti ceritau kitab ini. Sembala Allah!”

¹⁰Mangku kataunyau agi, “Jangan meresiauka ceritau kitab ini, karnau laka masaunyau.

¹¹Jemau diau ngerjauka diau ja'at, nengkela diau maju ngerjauka diau ja'attu. Jemau diau kumua nengkela diau maju ngumuaka diriau. Jemau diau benagh nengkela diau maju ngerjauka diau benagh. Mangku jemau diau idup batan endak Allah nengkela diau maju idup batan endak Allah.”

¹²“Peratikala nian,” katau Yesus, “Aku ka cepat datang, mangku mbatak upa endak mbalas bilang jemau nurut kerjaunyau.

¹³Akunila Alpa ngan Umiga, diau dulu sekali ngan diau mendian sekali, penembaian ngan pengabisan.”

¹⁴Riangla jemau diau nesa bajuau. Ughangtu bulia hak makan bua jak di batang diau ngenjuakka idup mangku masuak kutatu wuan mukau lawangau.

¹⁵Anyautu anjing ngan dukun, jemau diau menaugawia ngan mbunua ngan nyemba diwau, penipu ngan pembu'ung, gegalau ughangtu nidau pacak masuak.

¹⁶“Aku, Yesus, la ngajung malaikat endak ngiciakka gegalaunyautu ngan kamu batan endak jemau Keristen. Akunila pengadau Daud, bintang timur diau terang nian.”

¹⁷Rua Allah ngan buntingtu bekatau, “Mela!” Bilang jemau diau ndengaghkanyau bekatau pulau, “Mela!” Jemau diau aus datangla, mangku jemau diau endak ayiak diau ngenjuakka idup, ngambiakla, nidau nanti dibayighi!

¹⁸Ngan bilang jemau diau ndengagh ceritau kitab ini aku bekatau, “Amun adau jemau diau namba katau isi kitabni, Allah ka namba sengsarau diau la ditulis dalam kitabni.

¹⁹Mangku amun adau jemau diau ngurangka katau isi kitabni, mangku Allah ka ngambiak bagiannyau jak di batang diau ngenjuakka idup ngan ha'au masuak kuta sucitu, luak la ditulis dalam kitabni.”

²⁰Diau ngiciakka gegalaunyauni bekatau, “Nyela, Aku ka cepat datang!” Nyela nian. Datangla Tuhan Yesus!

²¹Aku bedu'a, supayau Tuhan Yesus iluak ngan gegalau kamu. Amin!