Read Central Malay PENGINA'AN 7 Bible Online

PENGINA'AN 7 - Central Malay bible

PENGINA'AN 7

¹La udim itu aku nginak empat ughang malaikat betegak di empat bucu deniau. Ughangtu na'anka empat angin di deniau, mangku nidau bediau angin, empuak di daghat, empuak di laut, empuak di kekayuan.

²Mangku aku nginak sughang malaikat lainau datang jak di sebela matau-aghi idup. Malaikattu mbatak tandau jak di Allah diau idup. Ngan suarau bias diau bekatau ngan empat malaikat tadi diau diajung merusakka deniau ngan laut.

³“Jangan kudai merusakka deniau ngan laut ngan kekayuan, amun kami lum nandaui kening jemau diau la njadi hak Allah.”

⁴Mangku aku ndengagh bilangan jemau diau ditandauitu. Gegalaunyau seratus empat pulua empat ribu ughang jak di duau belas jungku jemau Israil.

⁵Jak di jungku Yahudi duau belas ribu ughang diau ditandaui, jak di jungku Ruben duau belas ribu, jak di jungku Gad duau belas ribu,

⁶jak di jungku Asir duau belas ribu, jak di jungku Naptali duau belas ribu, jak di jungku Manasi duau belas ribu,

⁷jak di jungku Simiun duau belas ribu, jak di jungku Liwi duau belas ribu, jak di jungku Isakar duau belas ribu,

⁸jak di jungku Sibulun duau belas ribu, jak di jungku Yusup duau belas ribu, jak di jungku Benyamin duau belas ribu pulau diau ditandauitu.

⁹La udim itu aku nginak, mangku adau tunggalan jemau banyak diau nidau kebilangan agi. Ughangtu jak di gegalau bangsau ngan jungku ngan pemili ngan basau betegak di adapan kerusi rajau ngan di adapan Anak Bebiritu. Ughangtu makai baju putia, mangku adau daun paku bindu di tanganau.

¹⁰Ngan suarau nyaghing ughangtu bekatau, “Keselamatan kitau jak di Allah diau duduak di kerusi rajau ngan jak di Anak Bebiritu!”

¹¹Mangku gegalau malaikat betegak ngelilingi kerusi rajautu ngan tuau-tuau ngan empat benatangtu. Ughangtu nunduak di adapan kerusi rajautu mangku nyemba Allah,

¹²kataunyau, “Amin! Tepujila Allah diau agung ngan bepengertian. Diau pantas dipuji ngan diregaui. Diautu bekuasau ngan kuat selelamaunyau. Amin!”

¹³Mangku sughang jak di tuau-tuautu bekiciak ngan aku, “Sapau ughangni diau makai baju putiatu? Jak di manau ughangni datang?”

¹⁴Katauku, “Tuan, aku nidau keruan. Dighitu ngeruaninyau.” Mangku diau bekiciak agi, “Ughangni jemau diau la beta'an di masau penanggungan diau beghat nian. Ughangni la nesa bajuau njadi putia ngan dagha Anak Bebiritu.

¹⁵Itula sebapau ughangni betegak di adapan kerusi Allah mangku sembayang nyemba Diau siang malam di Ghuma Allah. Mangku Allah diau duduak di kerusi rajautu ka ngantini ngan njagaui ughangtu.

¹⁶Ughangtu nidau ka meghasauka agi lapagh ngan aus. Ughangtu nidau ka kenau panas matau-aghi agi.

¹⁷Karnau Anak Bebiri diau adau di tetengaan kerusi rajautu ka nyayia ughangtu ngan mbata'i ughangtu ke matau-ayiak diau ngenjuakka idup. Mangku Allah ka ngusu'i ayiak matau jak di matau ughangtu.”