Read Central Malay PENGINA'AN 8 Bible Online

PENGINA'AN 8 - Central Malay bible

PENGINA'AN 8

¹Mangku satu Anak Bebiritu mbukak sigil diau ketujua, sergau njadi suni nianan kekirau setenga jam lamaunyau.

²Mangku aku nginak tujua malaikat diau betegak di adapan Allah. Malaikattu dienju'i tujua terumpit.

³Mangku adau sughang malaikat agi mbatak bada keminyan emas. Diau datang betegak guak mija bada bekerbantu, dienjuakka banyak keminyan endak dikerbanka di bada bekerban emas diau di adapan kerusi rajautu serempak ngan du'a gegalau jemau diau la njadi hak Allah.

⁴Mangku asap keminyan nayiak jak di tangan malaikattu ke adapan Allah serempak ngan du'a jemau diau la njadi hak Allah.

⁵La udim itu malaikattu ngambiak bada keminyantu dimasuakkanyau api jak di mija bada bekerban tadi, mangku diumbanka ke deniau. Mangku adau muni gurua besak ngan kilat nyelanyar, mangku adau gempau.

⁶Mangku tujua malaikat diau adau terumpit tadi la siap endak ngembusau.

⁷Malaikat diau petamau ngembus terumpitau, mangku adau ujan es ngan api beundak dagha pulau. Gegalaunyautu diumbanka ke deniau. Mangku bagi tigau sebagi jak di deniau mutung, mangku bagi tigau sebagi jak di kekayuan mutung pulau ngan gegalau gheghumputan diau ijang mutung galau.

⁸La udim itu malaikat diau keduau ngembus terumpitau, mangku adau setu luak gunung besak diau maghak karnau api diumbanka ke laut. Mangku bagi tigau sebagi jak di lauttu njadi dagha,

⁹mangku bagi tigau sebagi jak di gegalau benatang diau adau di laut mati galau, mangku bagi tigau sebagi jak di kapal ancur pulau.

¹⁰La udim itu malaikat diau ketigau ngembus terumpitau, mangku sutiak bintang besak diau maghak luak ubur tumban jak di langit, ninggang bagi tigau sebagi jak di ayiak batang-aghi ngan matau-ayiak.

¹¹Namau bintang itu “Payit”. Mangku bagi tigau sebagi jak di ayiak njadi payit, mangku banyak jemau mati karnau minum ayiak diau la payittu.

¹²La udim itu malaikat diau keempat ngembus terumpitau, mangku bagi tigau sebagi jak di matau-aghi ngan bulan padam, mangku bagi tigau sebagi jak di bintang padam pulau. Mangku aghi siang bagi tigau sebagi nidau terang, luak itu pulau aghi malam.

¹³Mangku aku nginak, adau sikuak burung elang terbang di langit. Burungtu bekatau ngan suarau nyaghing, “Celakau, celakau, celakaula jemau diau adau di deniau, amun tigau malaikat agi ngembus terumpitau nanti.”