Read Central Malay PENGINA'AN 9 Bible Online

PENGINA'AN 9 - Central Malay bible

PENGINA'AN 9

¹La udim itu malaikat diau kelimau ngembus terumpitau, mangku aku nginak sutiak bintang tumban jak di langit ke deniau, mangku dienjuakka ngan diau anak kunci jurang maut,

²dibukakkanyau jurang mauttu, mangku asap ngeluagh jak di dalamau luak asap jak di tungku diau besak. Mangku matau-aghi ngan awang-awang njadi keleman karnau asap jak di jurangtu.

³Jak di asaptu beterbangan belalang ke deniau. Mangku belalangtu dienju'i kuasau semegi ngan kuasau kalau.

⁴Mangku nidau diajung merusakka gheghumputan, tetanaman ngan kekayuan, tapitu diajung nyerang jemau ajau diau nidau bediau tandau jak di Allah di keningau.

⁵Belalangtu nidau diajung mbunua jemau, tapitu diajung nyiksau jemau selamau limau bulan. Sengsarau itu luak jemau mengut disengat kalau.

⁶Masau itu jemau ndalak jalan mati, anyautu nidau pacak. Ughangtu endak nian mati, anyautu nidau mati-mati.

⁷Badan belalangtu luak kudau diau endak dipakai beperang. Di pucuak pala'au adau setu jak di emas. Dayiau luak dayi jemau.

⁸Gumba'au luak gumbak jemau tinau. Gigiau luak gigi setuau.

⁹Dadaunyau luak baju besi. Muni sayapau luak muni gerubak banyak diau ditaghiak kudau belaghi dang beperang.

¹⁰Iku'au luak ikuak kalau diau adau sengatau. Di iku'autu adau kuasau endak nyiksau manusiau selamau limau bulan.

¹¹Rajau diau merintaka belalangtu malaikat jurang maut. Namaunyau basau Ibrani Abadun, basau Yunani Apuliun, retiau “Perusak”.

¹²Celakau tadi la lalu. Mbak kini ka adau agi duau mecam celakau.

¹³La udim itu malaikat diau keenam ngembus terumpitau, mangku aku ndengagh suarau jak di empat tanduak di bada bekerban jak di emas diau adau di adapan Allah

¹⁴ngiciak ngan malaikat tadi diau adau terumpittu, kataunyau, “Legha'i empat malaikat diau dikebat di guak ayiak besak Iprat.”

¹⁵Mangku dilegha'i empat malaikattu diau la ditetapka masaunyau, jam, aghi, bulan ngan taun itu, endak mbunua bagi tigau sebagi jak di gegalau manusiau.

¹⁶Aku ndengagh, gegalau tentera diau pakai kudau duau ratus juta banya'au.

¹⁷Luak inila aku nginak kudau itu ngan jemau diau di pucu'au. Ughangtu pakai baju besi diau abang luak api ngan ijang ngan kuning luak belirang. Palak kudautu luak palak setuau. Jak di mulutau ngeluagh api ngan asap ngan belirang.

¹⁸Jak di tigau sengsarautu dibunua bagi tigau sebagi jak di gegalau manusiau, karnau api ngan asap ngan belirang diau ngeluagh jak di mulutautu.

¹⁹Kuasau kudautu adau di mulutau ngan di iku'au. Iku'au luak ulagh. Ngan palak ulaghtu diau nyiksau manusiau.

²⁰Anyautu jemau lain diau lum mati karnau sengsarautu, nidau nian ngubai jak di kerjaunyau. Ughangtu nidau mandak nyemba iblis, patung jak di emas, pirak, tembagau, batu ngan kayu diau nidau pacak nginak ngan ndengagh ngan bejalan.

²¹Ughangtu nidau ngubai jak di kerjau kuasau gelap, mbunua, menaugawia ngan maling.