Read Central Tibetan Bible མར་ཀུ 16 Bible Online

མར་ཀུ 16 - Central Tibetan Bible bible

མར་ཀུ 16

¹ངལ་གསོའི་ཉིན་མོ་རྫོགས་རྗེས་གྲོང་ཁྱེར་མག་དལ་ནས་ཡིན་པའི་མིར་ཡམ་དང་ཡ་ཀོབ་ཀྱི་ཨ་མ་མིར་ཡམ། ས་ལོ་མེ་བཅས་ཀྱིས་ཡེ་ཤུའི་སྐུ་ཕུང་ལ་འབྱུག་ཆེད་ཀྱི་དྲི་ཞིམ་འབྱུག་རྫས་ཉོས་ནས།

²བདུན་ཕྲག་གཅིག་གི་ཉིན་དང་པོའི་ཞོགས་པ་ཉི་མ་ཤར་ཙམ་ལ་ཁོང་ཚོ་དུར་ཁང་ལ་ཕྱིན།

³ཁོང་ཚོས་ཕན་ཚུན་“སུས་ང་ཚོར་དུར་ཁང་གི་ཁའི་རྡོ་དེ་བསྒྲིལ་ནས་ཕར་ཕྱེ་ཡོང་”ཞེས་སྐད་ཆ་བཤད།

⁴ཁོང་ཚོས་ཡར་ལྟ་དུས་རྡོ་ཧ་ཅང་ཆེན་པོ་དེ་བསྒྲིལ་ཚར་ཡོད་པ་མཐོང༌།

⁵དུར་ཁང་གི་ནང་ལ་འཛུལ་སྐབས་གཞོན་ནུ་གོས་དཀར་པོ་གྱོན་པ་ཞིག་གཡས་ཕྱོགས་སུ་བསྡད་ཡོད་པ་མཐོང་བས་ཁོང་ཚོ་འཇིགས་པ་རེད།

⁶གཞོན་ནུ་དེས་ཁོང་ཚོར་“ཞེད་མི་དགོས། ཁྱེད་ཚོས་འཚོལ་བའི་ན་ཙ་རེལ་པ་ཡེ་ཤུ་རྒྱང་ཤིང་སྟེང་བཀལ་བ་ཁོང་སྐུ་གསོན་པོར་བཞེངས་སུ་འགྱུར་ཏེ་འདིར་མེད། ལྟོས་དང༌། སྐུ་ཕུང་བཞག་ས་འདི་རེད།

⁷ཁྱེད་ཚོ་ཕྱིན་ནས་ཁོང་གི་ཉེ་གནས་པེ་ཏྲོ་དང་བཅས་པ་ལ་འདི་ལྟར་ཤོད། ཡེ་ཤུས་ཁྱེད་ཚོའི་སྔོན་ལ་ག་ལིལ་ཡུལ་དུ་ཕེབས་ནས་སྔར་གསུངས་པ་བཞིན་དེར་ཁོང་མཇལ་ཡོང་”ཞེས་བཤད།

⁸ཁོང་ཚོ་འདར་ཞིང་དངངས་འཚབ་ཆེན་པོ་སྐྱེས་ནས་དུར་ཁང་ནས་ཕྱིར་བྲོས་ཏེ་སུ་ལའང་མ་བཤད། གང་ལགས་ཟེར་ན། ཁོང་ཚོ་ཧ་ཅང་འཇིགས་པས་སོ། །

⁹དེ་ཡང་བདུན་ཕྲག་གཅིག་གི་ཉིན་དང་པོའི་ཞོགས་པ་སྔ་པོར་ཡེ་ཤུ་སྐུ་གསོན་པོར་བཞེངས་ནས། ཐོག་མར་དེ་སྔ་ཁོང་གིས་གདོན་འདྲེ་བདུན་བསྐྲད་མྱོང་བའི་མག་དལ་མ་མིར་ཡམ་ལ་སྐུ་གཟུགས་མངོན་སུམ་དུ་བསྟན་པས།

¹⁰དེས་ཕྱི་རུ་སོང་ནས་ཡེ་ཤུའི་རྗེས་སུ་འབྲང་མཁན་རྣམས་ཀྱི་དྲུང་དུ་ཕྱིན་ཏེ་དེ་རྣམས་ངུ་ཞིང་མྱ་ངན་བྱེད་བཞིན་ཡོད་པ་ལ་གཏམ་དེ་སྨྲས་ནའང༌།

¹¹ཁོང་ཚོས་ཡེ་ཤུ་འཆི་བ་ལས་སླར་གསོན་པ་དང་མིར་ཡམ་གྱིས་ཁོང་མཐོང་བ་ཡིན་ཞེས་པ་དེ་ལ་ཡིད་མ་ཆེས།

¹²དེའི་རྗེས་སུ་འབྲང་བ་རྣམས་ལས་མི་གཉིས་གྲོང་སྡེ་གཞན་ཞིག་ཏུ་འགྲོ་བའི་ལམ་བར་དུ། ཁོང་གིས་རང་གི་སྐུ་གཟུགས་རྣམ་པ་གཞན་དུ་བསྒྱུར་ཏེ་ཁོ་ཚོ་ལ་མངོན་སུམ་དུ་བསྟན།

¹³ཁོ་ཚོ་ལོག་ནས་རྗེས་སུ་འབྲང་བ་གཞན་རྣམས་ལ་གནས་ཚུལ་དེ་བཤད་ནའང་སུས་ཀྱང་ཁོ་ཚོ་ལ་ཡིད་མ་ཆེས།

¹⁴དེའི་རྗེས་ཉེ་གནས་བཅུ་གཅིག་པོས་ཟས་བཞེས་བཞིན་པའི་སྐབས་སུ། ཁོང་གིས་དེ་རྣམས་ལ་རང་གི་སྐུ་གཟུགས་མངོན་སུམ་དུ་བསྟན་སྟེ། རང་ཉིད་འཆི་བ་ལས་སླར་གསོན་རྗེས་དེ་རྣམས་རང་ཉིད་མཐོང་མཁན་རྣམས་ཀྱིས་སྨྲས་པའི་གཏམ་ལ་ཡིད་མ་ཆེས་པས། ཁོང་གིས་དེ་རྣམས་ལ་དད་པ་མེད་པ་དང་སེམས་འཁྲེགས་པོ་ཡིན་པར་བཀའ་བཀྱོན་མཛད།

¹⁵ཡེ་ཤུས་ཉེ་གནས་རྣམས་ལ་“ཁྱེད་ཚོས་འཇིག་རྟེན་ཀུན་ཏུ་ཕྱིན་ནས་མི་ཐམས་ཅད་ལ་འཕྲིན་བཟང་ཁྱབ་བསྒྲགས་གྱིས་ཤིག

¹⁶སུ་ཡང་དད་པ་བྱས་ནས་ཁྲུས་གསོལ་ཐོབ་པ་དེ་ཐར་བར་འགྱུར། སུ་ཡང་དད་པ་མི་བྱེད་པ་དེ་ལ་ཆད་པ་གཅོད་པར་འགྱུར།

¹⁷དད་པ་བྱེད་པ་རྣམས་ལ་ངོ་མཚར་ཆེ་བའི་ནུས་པ་འདི་ལྟར་ཡོད། ཁོང་ཚོས་ངའི་མིང་ཐོག་ནས་གདོན་འདྲེ་སྐྲོད་ཐུབ་ཅིང་སྐད་རིགས་གཞན་ཤོད་པ།

¹⁸དུག་སྦྲུལ་རྣམས་ལག་པས་ལེན་པ། སྲོག་གཅོད་པའི་དུག་འཐུང་ཡང་གནོད་པ་མི་འབྱུང་བ། ལག་པས་ནད་པར་རེག་ན་ནད་འཇོམས་པར་འགྱུར་རོ་”ཞེས་གསུངས།

¹⁹དེ་ལྟར་གཙོ་བོ་ཡེ་ཤུས་ཁོང་ཚོར་བཀའ་མོལ་གནང་ཚར་རྗེས། དཀོན་མཆོག་གི་ཞིང་ཁམས་སུ་བཞེངས་པར་གྱུར་ཏེ་དཀོན་མཆོག་གི་ཕྱག་གཡས་ངོས་སུ་བཞུགས།

²⁰ཉེ་གནས་རྣམས་གང་སར་ཕྱིན་ནས་དཀོན་མཆོག་གི་བཀའ་ཁྱབ་བསྒྲགས་བྱས། གཙོ་བོས་ཁོང་ཚོ་དང་མཉམ་དུ་འཕྲིན་ལས་མཛད་ཅིང་ངོ་མཚར་བའི་རྟགས་མཚན་བསྟན་པའི་སྒོ་ནས་འཕྲིན་བཟང་དེ་བདེན་པ་ཡིན་པར་ར་སྤྲོད་གནང་ངོ༌། ། ། །