Read Central Tibetan Bible ལུ་ཀཱ 11 Bible Online

ལུ་ཀཱ 11 - Central Tibetan Bible bible

ལུ་ཀཱ 11

¹ཡེ་ཤུས་ས་ཆ་ཞིག་ལ་གསོལ་བ་བཏབ་པ་དང༌། དེ་ཚར་རྗེས་ཉེ་གནས་ཤིག་གིས་ཁོང་ལ་“གཙོ་བོ། ཡོ་ཧ་ནན་གྱིས་ཁོང་གི་ཉེ་གནས་རྣམས་ལ་སྨོན་ལམ་འདེབས་པར་བསླབས་པ་ལྟར། ང་ཚོ་ལའང་སྨོན་ལམ་འདེབས་པར་སློབས་དང་”ཞེས་སྨྲས་པ་ལ།

²ཁོང་གིས་ཁོ་ཚོར་“ཁྱེད་ཚོས་སྨོན་ལམ་འདེབས་སྐབས་འདི་ལྟར་ཤོད། ཡབ་ལགས། ཁྱེད་མཚན་དམ་པར་སྲུང་བར་ཤོག ། ཁྱེད་ཀྱི་རྒྱལ་སྲིད་འོང་བར་ཤོག །[21]

³ངེད་ཀྱི་ཉིན་རེའི་ཁ་ཟས་དེ། ། ཁྱེད་ཀྱིས་ང་ཚོར་གནང་བར་མཛོད། །

⁴ངེད་ཚོས་གཞན་གྱི་སྡིག་ཉེས་རྣམས། ། གུ་ཡངས་གཏོང་བ་ཇི་བཞིན་དུ། ། ངེད་ཀྱི་སྡིག་བུན་སེལ་བར་མཛོད། ། ཉམས་ཚོད་ནང་དུ་འཇུག་མ་མཛོད། །”[22] ཞེས་གསུངས།

⁵ཁོང་གིས་ཁོ་ཚོར་“དཔེར་ན་ཁྱེད་ཚོའི་ནང་ནས་གཅིག་ལ་གྲོགས་པོ་ཡོད་ན། ནམ་ཕྱེད་ལ་ཁོའི་རྩར་ཕྱིན་ནས་ཁོ་ལ་གྲོགས་པོ། བག་ལེབ་གསུམ་ང་ལ་གཡར་དང༌།

⁶གང་ལགས་ཟེར་ན། ཐག་རིང་ནས་ངའི་གྲོགས་པོ་ཞིག་སླེབས་པ་དང༌། ཁོ་ལ་སྟེར་བའི་ཟས་གང་ཡང་མེད་ཅེས་སྨྲས།

⁷ལན་དུ་ནང་ལ་ཡོད་པའི་མི་དེས་ང་ལ་སུན་པོ་མ་བཟོས། སྒོ་བརྒྱབ་ཚར་ཏེ་ངའི་ཕྲུ་གུ་ང་དང་མཉམ་དུ་ཉལ་ཡོད་པས་ཁྱོད་ལ་གང་ཞིག་སྟེར་བའི་ཕྱིར་ཡར་ལང་མི་ཐུབ་ཅེས་ཟེར་”ཞེས་གསུངས།

⁸ཡེ་ཤུས་“ངས་ཁྱེད་ཚོ་ལ་ཟེར་རྒྱུར། ནང་ལ་ཡོད་པའི་མི་དེ་གྲོགས་པོ་ཡིན་པས་ལངས་ནས་མི་སྟེར་ན་ཡང༌། ཕྱི་ལོགས་ཀྱི་མིས་ཡང་ཡང་ཞུ་བའི་རྐྱེན་གྱིས་ཡར་ལངས་ནས་གང་ཙམ་དགོས་པ་ཁོ་ལ་སྟེར་ངེས་ཡིན།

⁹དེའི་ཕྱིར་ངས་ཁྱེད་ཚོར་ཟེར་རྒྱུར་ཞུས་ན་གནང་བར་འགྱུར། བཙལ་ན་རྙེད་པར་འགྱུར། སྒོ་བརྡུངས་ན་འབྱེད་པར་འགྱུར།

¹⁰གང་ལགས་ཟེར་ན། ཞུ་མཁན་ཐམས་ཅད་ལ་འཐོབ་པ་དང༌། འཚོལ་མཁན་ཐམས་ཅད་ལ་རྙེད། སྒོ་རྡུང་མཁན་ཐམས་ཅད་ལ་སྒོ་འབྱེད་པར་འགྱུར་བས་སོ།

¹¹དཔེར་ན་ཁྱེད་ཚོ་ལས་སུ་ཞིག་ཕ་ཡིན་པ་དེས་བུ་ཉ་ཤ་དགོས་ཞེས་ཞུས་ན་སྦྲུལ་སྟེར་བར་བྱའམ།[23]

¹²ཡང་ན་བུ་ཡིས་སྒོ་ང་དགོས་ཞེས་ཞུས་ན་སྡིག་པ་རྭ་ཉག་ཅིག་སྟེར་རམ།

¹³ཁྱོད་ཚོ་ངན་པ་ཡིན་ཡང་ཁྱོད་ཀྱི་ཕྲུ་གུ་རྣམས་ལ་ལག་རྟགས་བཟང་པོ་སྤྲོད་པར་ཤེས་ན། ཁྱེད་ཀྱི་ཡབ་ཞིང་ཁམས་སུ་བཞུགས་པ་ཡིས་ཁོང་ལ་གསོལ་འདེབས་བྱེད་མཁན་རྣམས་ལ་དམ་པའི་ཐུགས་ཉིད་དེ་བས་ཀྱང་གནང་བར་འགྱུར་”ཞེས་གསུངས།

¹⁴དེའི་རྗེས་སུ་ཁོང་གིས་གདོན་འདྲེ་ཁ་མི་གྲགས་པ་ཞིག་བསྐྲད། དེ་ཐོན་ཚར་ནས་ཁ་ལྐུགས་པས་སྐད་ཆ་བཤད་པ་དང༌། མི་ཚོགས་ཡ་མཚན་སྐྱེས།

¹⁵འོན་ཀྱང་མི་དེ་ཚོའི་ནང་ནས་ལ་ལས་“བདུད་ཀྱི་རྒྱལ་པོ་པེ་ཨིལ་བཟི་པད་ལ་བརྟེན་ནས་ཁོས་གདོན་འདྲེ་སྐྲོད་”ཅེས་སྨྲས།

¹⁶ཁོང་ལ་ཉམས་ཚོད་ལེན་པའི་ཕྱིར་གཞན་པ་རྣམས་ཀྱིས་དཀོན་མཆོག་གི་ཞིང་ཁམས་ནས་ངོ་མཚར་བའི་རྟགས་སྟོན་ཞུ་བ་ཡང་ཡང་ཞུས།

¹⁷ཁོ་ཚོའི་བསམ་པ་མཁྱེན་ནས་ཁོང་གིས་ཁོ་ཚོར་“རྒྱལ་ཁམས་ཤིག་གི་ནང་ལ་ནང་འཁྲུག་བྱུང་ན་འཇིག་པར་འགྱུར་ལ། ཁྱིམ་ཚང་ནང་ལའང་ནང་འཁྲུག་བྱུང་ན་ཉམས་པར་འགྱུར།

¹⁸དེ་བཞིན་དུ་བདུད་སཱ་ཏན་གྱིས་རང་ལ་ནང་འཁྲུག་བསླངས་ན། ཁོའི་རྒྱལ་ཁམས་ཅི་ལྟར་གནས། དེ་ནི་ཁྱོད་ཚོས་ངས་བདུད་ཀྱི་རྒྱལ་པོ་པེ་ཨིལ་བཟི་པད་ལ་བརྟེན་ནས་གདོན་འདྲེ་སྐྲོད་ཅེས་སྨྲ་བའི་ཕྱིར་ཡིན།

¹⁹གལ་ཏེ་པེ་ཨིལ་བཟི་པད་ལ་བརྟེན་ནས་ངས་གདོན་འདྲེ་བསྐྲད་ན། ཁྱོད་རྣམས་ཀྱི་བུ་ཡིས་སུ་ལ་བརྟེན་ནས་གདོན་འདྲེ་སྐྲོད་དམ། དེའི་ཕྱིར་ཁོ་ཚོ་ནི་ཁྱོད་ཚོའི་ཁྲིམས་དཔོན་དུ་འགྱུར་ངེས་ཡིན།

²⁰འོན་ཀྱང་ངས་དཀོན་མཆོག་གི་ཕྱག་མཛུབ་ལ་བརྟེན་ནས་གདོན་འདྲེ་བསྐྲད་ན། དཀོན་མཆོག་གི་རྒྱལ་སྲིད་ཁྱོད་ཚོའི་རྩར་སླེབས་ཡོད།

²¹མཚོན་ཆ་འཁྱེར་བའི་མི་སྟོབས་ཤུགས་ཆེན་པོ་ཞིག་གིས་རང་གི་ཁང་པ་བསྲུངས་ན། ཁོའི་ཅ་ལག་འཕྲོག་མི་ཐུབ།

²²འོན་ཀྱང་ཁོ་ལས་སྟོབས་ཤུགས་ཆེ་བ་ཞིག་ཡོང་ནས་མི་སྟོབས་ཤུགས་ཅན་བཅོམ་ན། ཁོས་བརྟེན་པར་བྱས་པའི་མཚོན་ཆ་ཕྲོགས་ནས་སྟོབས་ཤུགས་ཆེ་བ་དེས་འཕྲོག་ནོར་བགོ་བཤའ་རྒྱག

²³སུས་ཀྱང་ང་ཡི་ཕྱོགས་མི་བྱེད་པ་དེས་ང་ལ་རྒོལ་ཞིང༌། སུས་ཀྱང་ང་དང་མཉམ་དུ་མི་སྡུད་བ་དེས་གཏོར།”

²⁴“མི་ཞིག་ནས་གདོན་འདྲེ་མི་གཙང་བ་འཐོན་སྐབས། ངལ་གསོ་འཚོལ་བའི་ཕྱིར་ཆུ་མེད་པའི་ས་བརྒྱུད་དེ་ཕྱིན་ནས། མ་རྙེད་པས་ང་ཐོན་པའི་ཁང་པ་དེ་ལ་ཕྱིར་ལོག་ཅེས་ཟེར།

²⁵དེར་སླེབས་དུས་གད་བརྒྱབ་ནས་གཙང་བ་དང་ལེགས་པར་བསྒྲིགས་ཡོད་པ་མཐོང་སྟེ།

²⁶སོང་ནས་དེ་ལས་ཀྱང་ངན་པ་གདོན་འདྲེ་བདུན་ཁྲིད་དེ་ཁང་པ་དེར་འཛུལ་ནས་བསྡད། མི་དེའི་གནས་ཚུལ་སྔ་མ་ལས་ཕྱི་མ་སྡུག་གོ་”ཞེས་གསུངས།

²⁷ཡེ་ཤུས་དེ་ལྟར་གསུང་དུས་མི་ཚོགས་ནང་ནས་བུད་མེད་གཅིག་གིས་སྐད་ཆེན་པོས་ཁོང་ལ་“ཁྱེད་བཞུགས་པའི་ལྷུམས་དང་ཁྱེད་ལ་ཆབ་ཞོ་སྟེར་བའི་ནུ་མ་བདེའོ་”ཞེས་ཟེར་བ་ན།

²⁸ཁོང་གིས་“དེ་བས་དཀོན་མཆོག་གི་བཀའ་ཐོས་ནས་ཁ་ལ་ཉན་པ་རྣམས་ལས་བདེ་བ་མེད་”ཅེས་གསུངས།

²⁹མི་ཚོགས་མང་པོ་ཁོང་གི་དྲུང་དུ་འཛོམས་སྐབས་ཁོང་གིས་“མི་རབས་འདི་ནི་མི་རབས་ངན་པ་ཞིག་ཡིན། མི་རབས་འདིས་རྟགས་ཤིག་ཞུས་ན་ཡང༌། ལུང་སྟོན་པ་ཡོ་ནཱ་ཡི་རྟགས་མ་གཏོགས་པར་གཞན་ཅི་ཡང་སྟེར་བར་མི་འགྱུར།

³⁰རྒྱུ་མཚན་ནི་ལུང་སྟོན་པ་ཡོ་ནཱ་ནི་གནའ་བོའི་གྲོང་ཁྱེར་ནུ་ནེ་ཝཱ་ཡི་མི་རྣམས་ལ་རྟགས་ཤིག་ཏུ་གྱུར་བ་ལྟར། མིའི་རིགས་ཀྱི་བུ་ཡང་མི་རབས་འདི་ལ་རྟགས་སུ་འགྱུར་ཡོང༌།

³¹ཁྲིམས་གཅོད་པའི་ཉིན་མོར་ལྷོ་ཡུལ་གྱི་རྒྱལ་མོ་ལངས་ནས་མི་རབས་འདིའི་མི་རྣམས་ལ་ཉེས་སྐྱོན་འདོན་པར་བྱ། གང་ཡིན་ཞེ་ན། རྒྱལ་པོ་སོ་ལོ་མོན་གྱི་ཤེས་རབ་ཐོས་པའི་ཕྱིར་ཁོ་མོ་ས་གཞིའི་མཐའ་ནས་ཡོང༌། ལྟོས་ཤིག ད་ལྟ་སོ་ལོ་མོན་ལས་ཆེ་བ་ཞིག་འདིར་ཡོད།

³²ཁྲིམས་གཅོད་པའི་ཉིན་མོར་གྲོང་ཁྱེར་ནུ་ནེ་ཝཱ་ཡི་མི་རྣམས་ལངས་ནས་མི་རབས་འདིའི་མི་རྣམས་ལ་ཉེས་སྐྱོན་འདོན་པར་བྱ། གང་ལགས་ཤེ་ན། ལུང་སྟོན་པ་ཡོ་ནཱའི་གསུང་ཐོས་ནས་དེ་ཚོས་སྤྱོད་པ་ངན་པ་རྣམས་སྤངས་ནས་སེམས་བསྒྱུར། ལྟོས་ཤིག ད་ལྟ་ཡོ་ནཱ་ལས་ཆེ་བ་ཞིག་འདིར་ཡོད།”

³³“མི་སུས་ཀྱང་མར་མེ་སྤར་ནས་ས་འོག་ཁང་མིག་ཡང་ན། བྲེ་འོག་ཏུ་མི་འཇོག་སྟེ་ནང་ལ་ཡོང་མཁན་རྣམས་ཀྱིས་འོད་མཐོང་བའི་ཕྱིར་སྟེགས་བུའི་སྟེང་དུ་འཇོག

³⁴མིག་ནི་ལུས་ཀྱི་སྒྲོན་མེ་ལྟར་ཡིན། མིག་བཟང་པོ་ཡིན་ན་ལུས་ཧྲིལ་པོ་འོད་ཀྱིས་གང༌། མིག་བཟང་པོ་མིན་ན་ལུས་ཧྲིལ་པོ་མུན་ནག་གིས་གང༌།

³⁵དེའི་ཕྱིར་ཁྱེད་ཀྱི་ནང་ན་ཡོད་པའི་འོད་ནི་མུན་ནག་ཡིན་མིན་བསམ་བློ་ཞིབ་ཕྲ་གཏོང༌།

³⁶ཁྱེད་ཀྱི་ལུས་ཧྲིལ་པོ་འོད་ཀྱིས་གང་ནས་མུན་ནག་ཅི་ཡང་མེད་ན། སྒྲོན་མེས་ཁྱེད་ལ་འོད་འཕྲོ་བ་ལྟར་ཁྱེད་ཡོངས་སུ་འོད་ཅན་དུ་འགྱུར་”ཞེས་གསུངས།

³⁷དེ་ལྟར་གསུངས་ནས་ཕཱ་རུ་ཤི་པ་ཞིག་གིས་དྲངས་ཏེ་ཁོང་དེའི་ཁྱིམ་ལ་ཕེབས་ནས་གསོལ་བ་བཞེས་སུ་བཞུགས།

³⁸ཕཱ་རུ་ཤི་པ་དེས་ཁོང་ཡ་ཧུ་དཱ་པའི་ཆོས་ཁྲིམས་དང་མི་མཐུན་པར་གསོལ་བ་མ་བཞེས་པའི་སྔོན་ལ་ཕྱག་མ་བཀྲུས་པ་མཐོང་ནས་ཡ་མཚན་སྐྱེས།

³⁹འོན་ཀྱང་གཙོ་བོས་“ཕཱ་རུ་ཤི་པ་ཁྱོད་རྣམས་ཕོར་པ་དང་སྡེར་མའི་ཕྱི་ཕྱོགས་གཙང་བར་བྱེད་ནའང༌། ནང་ཕྱོགས་སུ་ཁྱོད་ཚོ་སེར་སྣ་དང་ངན་སེམས་ཀྱིས་ཁེང་འདུག

⁴⁰བླུན་པོ་ཁྱོད། ཕྱི་ཕྱོགས་འགོད་པ་གནང་མཁན་གྱིས་ནང་ཕྱོགས་ཀྱང་མ་བཀོད་དམ།

⁴¹འོན་ཀྱང་ནང་ན་ཡོད་པ་དེ་སྦྱིན་པ་བཏང་ན། ཁྱོད་རྣམས་ལ་ཐམས་ཅད་གཙང་བར་འགྱུར།

⁴²ཕཱ་རུ་ཤི་པ་ཁྱོད་ཚོ་ཆད་པ་ཕོག་པར་འགྱུར་ངེས་ཡིན། གང་ལགས་ཟེར་ན། ལྡུམ་རའི་རྩྭ་དྲི་ཞིམ་དང་སྔོ་ཚོད་ཆུང་ཆུང་སྣ་ཚོགས་ཀྱི་བཅུ་ཆ་གཅིག་དཀོན་མཆོག་ལ་ཕུལ་ན་ཡང༌། ཁྱོད་ཚོས་དྲང་བ་ཉིད་དང་དཀོན་མཆོག་གི་བྱམས་པ་སྣང་མེད་དུ་རྩི་པས་སོ། འདི་ནི་བསྲུངས་ཏེ་གཞན་རྣམས་དོར་བར་མི་རུང༌།

⁴³ཕཱ་རུ་ཤི་པ་ཁྱོད་ཚོ་ཆད་པ་ཕོག་པར་འགྱུར་ངེས་ཡིན། གང་ལགས་ཟེར་ན། འདུ་ཁང་ལ་གྲལ་མགོའི་གལ་ཆེ་སར་སྡོད་པ་དང༌། ཁྲོམ་ལ་མི་རྣམས་ཀྱིས་བརྩི་བཀུར་ལྡན་པའི་འཚམས་འདྲི་ལ་དགའ་བས་སོ།

⁴⁴ཁྱོད་ཚོ་ཆད་པ་ཕོག་པར་འགྱུར་ངེས་ཡིན། གང་ལགས་ཟེར་ན། ཁྱོད་ཚོ་རྟགས་མེད་པའི་དུར་ཁང་ལྟར་ཡིན། མི་རྣམས་ཀྱིས་མི་ཤེས་པར་དེའི་སྟེང་ལ་འགྲོ་བས་སོ་”ཞེས་གསུངས།

⁴⁵ལན་དུ་ཆོས་ཁྲིམས་ལ་མཁས་པའི་མི་ཞིག་གིས་“སློབ་དཔོན་ལགས། དེ་ལྟར་གསུངས་ནས་ཁྱེད་ཀྱིས་ང་ཚོ་ལའང་སྨོད་བཞིན་འདུག་”ཅེས་སྨྲས་པ་ན།

⁴⁶ཡེ་ཤུས་“ཆོས་ཁྲིམས་ལ་མཁས་པའི་མི་ཁྱོད་ཚོ་ལའང་སྡུག་བསྔལ་ཆེན་པོ་འབྱུང་ངེས་ཡིན། རྒྱུ་མཚན་ནི་ཁྱོད་ཚོས་མི་གཞན་ལ་ཁུར་ཆེན་པོ་འགེལ། འོན་ཀྱང་རང་གི་མཛུབ་མོ་གཅིག་ཙམ་གྱིས་དེ་ལ་མི་རེག

⁴⁷ཁྱོད་ཚོར་སྡུག་བསྔལ་ཆེན་པོ་འབྱུང་ངེས་ཡིན། ཁྱོད་རྣམས་ཀྱིས་ཁྱོད་ཀྱི་མེས་པོས་བསད་པའི་ལུང་སྟོན་པའི་དུར་ཁང་རྩིག

⁴⁸དེའི་ཕྱིར་ཁྱོད་ཀྱི་མེས་པོས་བྱས་པའི་ལས་ལ་མོས་མཐུན་བྱེད་ཅིང་དཔང་པོ་བྱེད། མེས་པོས་དེ་རྣམས་བསད་ཅིང་ཁྱོད་ཚོས་དུར་ཁང་རྩིག

⁴⁹དེའི་ཕྱིར་དཀོན་མཆོག་གི་ཤེས་རབ་ཀྱིས་ངས་ལུང་སྟོན་པ་དང་སྐུ་ཚབ་མངག་པར་བྱ། ཁོ་ཚོས་ཁ་ཤས་གསོད་དང་ཁ་ཤས་གནོད་སྐྱེལ་བར་འགྱུར་ཞེས་གསུངས།

⁵⁰དེ་བས་འཇིག་རྟེན་བཀོད་པ་ནས་བཟུང་བསད་པའི་ལུང་སྟོན་པ་ཐམས་ཅད་ཀྱི་ཁྲག་ནི་མི་རབས་འདིས་འགན་ཁུར་ལེན་དགོས།

⁵¹ངས་ཁྱེད་ཚོར་ཟེར་རྒྱུར། ཧ་བེལ་ནས་མཆོད་ཁྲི་དང་དཀོན་མཆོག་གི་ཕོ་བྲང་གཉིས་བར་དུ་བསད་པའི་ཟེ་ཀ་རི་ཡཱ་ཙམ་གྱི་ཁྲག་དེ་ཐམས་ཅད་མི་རབས་འདིས་འགན་ཁུར་ལེན་དགོས།

⁵²ཆོས་ཁྲིམས་ལ་མཁས་པའི་མི་ཁྱོད་ཚོ་ལ་སྡུག་བསྔལ་ཆེན་པོ་འབྱུང་ངེས་ཡིན། ཁྱོད་ཚོས་ཤེས་རབ་ཕོ་བྲང་གི་ལྡེ་མིག་ཕར་ཁྱེར་ཏེ་ཁྱོད་ཚོ་རང་ནང་དུ་མ་ཞུགས་པ་དང༌། ནང་ལ་འགྲོ་བཞིན་པ་རྣམས་ཀྱང་བཀག་”ཅེས་གསུངས།

⁵³ས་ཆ་དེ་དང་ཁ་བྲལ་ནས་ཆོས་ཁྲིམས་ལ་མཁས་པའི་མི་དང་ཕཱ་རུ་ཤི་པ་རྣམས་ཀྱིས་ཁོང་དགྲར་འཛིན་ཏེ་རྩོད་པའི་དྲི་བ་སྣ་ཚོགས་དྲིས་པ་དང༌། ཡེ་ཤུ་ཁྲིམས་དང་འགལ་བའི་གཏམ་བཤད་ནང་དུ་འཇུག་ཆེད་ཇུས་ངན་བཏིང་ངོ༌། །