Read Central Tibetan Bible ལུ་ཀཱ 21 Bible Online

ལུ་ཀཱ 21 - Central Tibetan Bible bible

ལུ་ཀཱ 21

¹དེ་ནས་ཡེ་ཤུས་དབུ་ཡར་བཏེགས་ནས་མི་ཕྱུག་པོ་རྣམས་ཀྱིས་དངུལ་འབུལ་སྒམ་ལ་འབུལ་བ་འཇོག་པར་གཟིགས་པ་དང༌།

²དབུལ་པོ་ཡུགས་མོ་ཞིག་གིས་ཟངས་ཀྱི་སྒོར་མོ་ཆུང་ཆུང་གཉིས་དེའི་ནང་དུ་བླུགས་པར་གཟིགས་ནས།

³ཁོང་གིས་“ངས་ཁྱེད་ཚོ་ལ་བདེན་པར་ཟེར་རྒྱུར། དངུལ་འབུལ་མཁན་ཐམས་ཅད་ལས་དབུལ་པོ་ཡུགས་མོ་འདིས་ཕུལ་བ་མང་ཤོས་ཡིན།

⁴གང་ལགས་ཟེར་ན། ཁོ་ཚོ་ཐམས་ཅད་ཀྱིས་ལོངས་སྤྱོད་ལྷག་མ་མང་པོ་ནས་ཕུལ་བ་ཡིན། འོན་ཀྱང་ཁོ་མོ་ནི་རང་ལ་མེད་ཀྱང་ཅི་ཡོད་པ་ཐམས་ཅད་ཕུལ་བ་ཡིན་ནོ་”ཞེས་གསུངས།

⁵དེ་ནས་མི་ལ་ལས་མཆོད་ཁང་ཆེན་མོ་ནི་ཅི་ལྟ་བུའི་རྡོ་མཛེས་པ་དང་དཀོན་མཆོག་ལ་ཕུལ་བའི་མཆོད་པ་རྣམས་ཀྱིས་རྒྱན་པའི་གཏམ་བཤད་དུས་ཁོང་གིས་

⁶“ཁྱེད་ཚོས་མཐོང་བའི་ཁང་པ་ཆེན་པོ་འདི་ནི༌༌༌༌། མ་འོངས་པའི་དུས་སུ་རྡོ་ཕ་བོང་གཅིག་གི་སྟེང་དུ་རྡོ་གཅིག་ཀྱང་མི་ལུས་པར་ཐམས་ཅད་གཞིག་པར་འགྱུར་རོ་”ཞེས་གསུངས།

⁷ཁོ་ཚོས་ཁོང་ལ་“སྟོན་པ་ལགས། དོན་འདི་རྣམས་དུས་ནམ་ཞིག་ལ་འབྱུང་ཞིང༌། དོན་འདི་ཚོ་འགྲུབ་པའི་ཚེ་རྟགས་གང་འཐོན་ཡོང་”ཞེས་ཞུས་པ་ན།

⁸ཁོང་གིས་“མི་སུས་ཀྱང་ཁྱེད་ཚོ་མི་སླུ་བའི་ཕྱིར་དོགས་ཟོན་བྱོས་ཤིག གང་ཡིན་ཞེ་ན། མི་མང་པོས་ངའི་མིང་ཐོག་ནས་ཡོང་སྟེ། ང་རང་ཡིན་ཟེར་ཞིང༌། ད་དུས་ལ་བབས་འདུག་ཅེས་ཟེར། ཁོ་ཚོའི་རྗེས་སུ་མ་འབྲོངས།

⁹ཁྱེད་ཚོས་དམག་འཁྲུག་དང༌། ཟིང་འཁྲུག་སྐོར་གྱི་གཏམ་ཐོས་པའི་སྐབས་སུ་མ་འཇིགས་ཤིག དོན་འདི་ཚོ་འབྱུང་ངེས་ཀྱང་དེ་ནི་དུས་རབས་ཀྱི་མཐའ་མ་ད་དུང་མ་ཡིན་”ཞེས་གསུངས།

¹⁰དེ་ནས་ཁོང་གིས་ཁོ་ཚོར་“མི་རིགས་དང་མི་རིགས་འཁྲུག་ཅིང༌། རྒྱལ་ཁམས་དང་རྒྱལ་ཁམས་འཁྲུག་ཡོང༌།

¹¹ས་གཡོམ་ཆེན་པོ་དང༌། ས་ཆ་མི་གཅིག་པར་ནད་ཡམས་དང་མུ་གེ་ཡང་འབྱུང་བར་འགྱུར། ནམ་མཁའ་ནས་འཇིགས་སྐྲག་སློང་བའི་སྔ་ལྟས་འབྱུང་ཡོང༌།

¹²དོན་དེ་ཚོ་ཐམས་ཅད་མ་འབྱུང་བའི་སྔོན་དུ་ཁོ་ཚོས་ཁྱེད་རྣམས་བཟུང་ནས་གནོད་འཚེ་བྱེད་པ་དང༌། ཡ་ཧུ་དཱ་པའི་འདུ་ཁང་དང་བཙོན་ཁང་ལ་གཏད་ཅིང༌། ངའི་མིང་གི་དོན་དུ་ས་གནས་དཔོན་པོ་དང་རྒྱལ་པོ་རྣམས་ཀྱི་མདུན་དུ་འཁྲིད་ཡོང༌།

¹³དེས་ན་ཁྱེད་རྣམས་ལ་དཔང་པོ་བྱེད་པའི་གོ་སྐབས་འབྱུང་ཡོང༌།

¹⁴དེའི་ཕྱིར་ཁྱེད་ཚོས་ལན་ཇི་ལྟར་འདེབས་པ་སྔོན་ལ་གྲ་སྒྲིག་མ་བྱེད་པར་ཐག་གཅོད་བྱོས་ཤིག

¹⁵རྒྱུ་མཚན་ནི་ངས་ཁྱེད་རྣམས་ལ་ཤེས་རབ་དང་ལྡན་པའི་གཏམ་སྤྲོད་པར་བྱ། ཁྱེད་ཀྱི་ཁ་གཏད་རྣམས་ཀྱི་ནང་ནས་སུ་ཞིག་གིས་དེ་ལ་ཁས་མི་ལེན་པའམ་དགག་པ་རྒྱག་པར་མི་ཐུབ།

¹⁶ཕ་མ་དང༌། སྤུན། གྲོགས་པོ་སོགས་ཀྱིས་ཀྱང་ཁྱེད་ཚོར་རྒྱབ་གཏོད་བྱེད་ལ། ཁ་གཏད་རྣམས་ཀྱིས་ཁྱེད་ཚོ་ལས་ཁ་ཤས་གསོད་པར་འགྱུར།

¹⁷ཡང་ངའི་མིང་གི་དོན་དུ་མི་ཐམས་ཅད་ཀྱིས་ཁྱེད་ཚོ་ལ་སྡང་བར་བྱ།

¹⁸འོན་ཀྱང་ཁྱེད་ཀྱི་མགོའི་སྐྲ་རྐང་གཅིག་ཀྱང་འཇིག་པར་མི་འགྱུར།

¹⁹བཟོད་པ་སྒོམ་པའི་སྒོ་ནས་ཁྱེད་ཚོའི་སྲོག་སྐྱོབ་ངེས་ཡིན་ནོ། །

²⁰ཁྱེད་རྣམས་ཀྱིས་ཡེ་རུ་ཤ་ལེམ་གྱི་ཕྱོགས་བཞི་ལ་དམག་དཔུང་གིས་སྐོར་བ་མཐོང་སྐབས། གྲོང་ཁྱེར་དེ་གཏོར་བའི་དུས་ལ་སླེབས་ཉེ་བ་ཤེས་པར་གྱིས་ཤིག

²¹དེའི་སྐབས་སུ་ཡ་ཧུ་དཱ་ཡུལ་དུ་ཡོད་པའི་མི་རྣམས་རི་ལ་འབྲོས་དགོས། གྲོང་ཁྱེར་ལ་ཡོད་པ་རྣམས་ཕྱིར་ཐོན་ཅིང༌། གྲོང་གསེབ་ཀྱི་མི་རྣམས་གྲོང་ཁྱེར་ནང་དུ་མ་འགྲོ་ཞིག

²²གང་ལགས་ཟེར་ན། གསུང་རབ་ལ་གང་བྲིས་པ་ཐམས་ཅད་འགྲུབ་སྟེ་དུས་དེ་ནི་ཆད་པ་གཅོད་པའི་ཉིན་མོ་ཡིན།

²³ཉིན་དེ་ཚོའི་རིང་ལ་བུད་མེད་ཕྲུ་གུ་འཁོར་བ་དང་བུ་ཕྲུག་ལ་འོ་མ་སྟེར་མཁན་རྣམས་ལ་སྙིང་རེ་རྗེ། ཡུལ་ལ་སྡུག་བསྔལ་ཆེན་པོ་འབྱུང་བ་དང༌། སྡིག་ཉེས་བྱས་པའི་རྐྱེན་གྱིས་མི་རིགས་འདི་ལ་དཀོན་མཆོག་གི་ཐུགས་ཁྲོ་འབབ་པར་འགྱུར།

²⁴ཁ་ཤས་རལ་གྲིའི་ཁ་ཡིས་གསད་པ་དང༌། ཁ་ཤས་བཙོན་པར་འགྱུར་ནས་མི་རིགས་ཐམས་ཅད་ཁྲོད་དུ་འཁྲིད། ཡ་ཧུ་དཱ་པ་མིན་པའི་མི་རིགས་ཀྱི་དུས་མ་ཚར་བའི་བར་དུ་ཡེ་རུ་ཤ་ལེམ་མི་དེ་ཚོའི་རྐང་འོག་ཏུ་རྫི་བར་འགྱུར།

²⁵ཡང་ཉི་མ་དང༌། ཟླ་བ། སྐར་མའི་རྟགས་འབྱུང་བར་འགྱུར་ལ། རྒྱ་མཚོ་དང་རྦ་རླབས་ཀྱི་འུར་སྒྲ་ཐོས་ནས་ས་གཞིའི་སྟེང་གི་མི་རིགས་སེམས་འཁྲུགས་ཏེ་སྡུག་བསྔལ་ཆེན་པོ་འབྱུང་བར་འགྱུར།

²⁶བར་སྣང་ཁམས་ཀྱི་དབང་ལྡན་རྣམས་གཡོ་བར་འགྱུར་བས་ས་གཞི་ལ་གང་འབྱུང་བར་འགྱུར་བ་ལ་འཇིགས་ནས་མི་རྣམས་དྲན་པ་འཐོར་བར་འགྱུར།

²⁷དེའི་དུས་སུ་མི་རྣམས་ཀྱིས་མིའི་རིགས་ཀྱི་བུ་ཁོང་རང་དབང་དང་གཟི་བརྗིད་ཆེན་པོ་དང་བཅས་སྤྲིན་པ་ཞིག་གི་ནང་དུ་འབྱོན་པར་མཐོང་ཡོང༌།

²⁸དོན་འདི་ཚོ་འབྱུང་སྐབས་ཁྱེད་ཚོ་ལངས་ནས་ཡར་ལྟོས་ཤིག གང་ཡིན་ཞེ་ན། ཁྱེད་ཀྱི་ཐར་བའི་དུས་ཐོན་ལ་ཉེ་བ་ཡིན་”ཞེས་གསུངས།

²⁹དེ་ནས་ཁོང་གིས་“བསེ་ཡབ་ལ་སོགས་པའི་ཤིང་ནས་དཔེ་ཞིག་ལོངས།

³⁰དེའི་ལོ་མ་འབུས་མ་ཐག་ཁྱེད་ཚོས་དེ་མཐོང་བ་དང༌། དབྱར་ཁའི་དུས་ཉེ་བར་ཡོད་པ་རང་ཤུགས་ཀྱིས་ཤེས།

³¹དེ་བཞིན་དུ་ཁྱེད་ཚོས་དོན་དེ་རྣམས་བྱུང་བ་མཐོང་ཚེ། དཀོན་མཆོག་གི་རྒྱལ་སྲིད་ཉེ་བར་སླེབས་ཡོད་པ་རྟོགས་པར་འགྱུར།

³²ངས་ཁྱེད་ཚོར་བདེན་པར་ཟེར་རྒྱུར། མི་རབས་འདི་མེད་པར་མ་གྱུར་བའི་སྔོན་ལ་དོན་འདི་ཐམས་ཅད་འབྱུང་བར་འགྱུར།

³³གནམ་ས་གཉིས་ནི་འདའ་བར་འགྱུར་ཡང་ངའི་བཀའ་འདའ་བར་མི་འགྱུར་རོ། །

³⁴སྤྱོད་པ་ངན་པ་དང༌། ར་བཟི་བ། འཚོ་བའི་སྐོར་གྱི་སེམས་ཁྲལ་སོགས་ཀྱིས་ཁྱེད་མི་གནོན་པའི་ཕྱིར་དང༌། ཉིན་མོ་དེས་རྙི་ལྟར་ཁྱེད་ཚོ་འཛིན་པར་མི་འགྱུར་བའི་ཆེད་དུ་དོགས་ཟོན་གྱིས་ཤིག

³⁵གང་ལགས་ཟེར་ན། ཉིན་མོ་དེ་ནི་ས་གཞིའི་སྟེང་གི་མི་ཀུན་ལ་འབབ་པར་འགྱུར་ངེས་ཡིན།

³⁶འབྱུང་བར་འགྱུར་བའི་དོན་དེ་ཐམས་ཅད་ལས་ཐར་ཐུབ་པའི་སྟོབས་ཡིན་པ་དང༌། མིའི་རིགས་ཀྱི་བུའི་སྐུ་མདུན་དུ་ལངས་ནས་སྡོད་ཐུབ་པའི་སྨོན་ལམ་འདེབས་ཏེ། དུས་རྟག་ཏུ་དོགས་ཟོན་བྱོས་ཤིག་”ཅེས་གསུངས།

³⁷ཉིན་ལྟར་ཁོང་གིས་མཆོད་ཁང་ཆེན་མོའི་ཁྱམས་རར་ཆོས་བསྟན་གནང་བ་དང༌། མཚན་མོར་ཁོང་ཕྱི་རོལ་ཏུ་ཕེབས་ནས་སྐྱུར་རུ་ཟེར་བའི་ཤིང་གི་རི་ལ་བཞུགས།

³⁸ཡང་ཁོང་གི་གསུང་ལ་ཉན་པའི་ཕྱིར་མི་ཐམས་ཅད་སྔ་པོ་ལངས་ནས་མཆོད་ཁང་ཆེན་མོར་འགྲོ་མྱོང་ངོ༌། །