Read Central Tibetan Bible ཡོ་ཧ་ནན། 20 Bible Online

ཡོ་ཧ་ནན། 20 - Central Tibetan Bible bible

ཡོ་ཧ་ནན། 20

¹དེ་ནས་གཟའ་འཁོར་གྱི་ཉིན་དང་པོར་ནམ་ཤིན་ཏུ་སྔ་བ་ད་དུང་མུན་པ་ཡོད་དུས་མག་རྡལ་ནས་ཡིན་པའི་མིར་ཡམ་དུར་ཁང་གི་མདུན་དུ་ཡོང་སྟེ། ཁ་རྡོ་དེ་དུར་ཁང་ནས་ཕར་བསྒྲིལ་ཚར་ཡོད་པ་མཐོང་བས།

²བརྒྱུགས་ཏེ་སི་མོན་པེ་ཏྲོ་དང༌། ཡེ་ཤུས་དམིགས་བསལ་གྱིས་བྱམས་པ་གནང་བའི་ཉེ་གནས་གཞན་དེའི་རྩར་སོང་ནས་“ཁོ་ཚོས་གཙོ་བོ་དུར་ཁང་ནས་ཁྱེར་བ་དང༌། ཁོང་གང་དུ་བཞག་ཡོད་པ་ང་ཚོས་མི་ཤེས་”ཞེས་ཟེར།

³དེའི་ཕྱིར་པེ་ཏྲོ་དང་ཉེ་གནས་གཞན་པ་དེ་ཕྱི་རོལ་ཏུ་ཐོན་ནས་དུར་གྱི་ཕྱོགས་སུ་སོང༌།

⁴ཡང་དེ་གཉིས་མཉམ་དུ་བརྒྱུགས་པ་དང༌། པེ་ཏྲོ་ལས་ཉེ་གནས་གཞན་དེ་མགྱོགས་པར་བརྒྱུགས་པས་སྔོན་ལ་དུར་དུ་སླེབས་ཤིང༌།

⁵བསྒུར་ནས་ནང་དུ་བལྟས་ཏེ་རས་སྤུས་ལེགས་དེར་ཡོད་པ་མཐོང་ཡང་ནང་དུ་མ་ཞུགས།

⁶སི་མོན་པེ་ཏྲོ་ཡང་ཁོའི་རྗེས་སུ་དེར་སླེབས་པ་དང༌། དུར་ཁང་གི་ནང་དུ་ཞུགས་ནས་ཁོང་གིས་རས་སྤུས་ལེགས་དེར་ཡོད་པ་མཐོང་བ་མ་ཟད།

⁷ཡེ་ཤུའི་དབུ་ལ་གཡོགས་པའི་ཞལ་ཕྱིས་རས་དེ་གཞན་པ་རྣམས་དང་མཉམ་དུ་མེད་པར་གཅིག་པུ་གནས་གཞན་ཞིག་ན་བསྒྲིལ་ཏེ་ཡོད་པ་ཡང་མཐོང༌།

⁸དེ་ནས་ཉེ་གནས་གཞན་པ་དུར་དུ་སྔོན་ལ་སླེབས་པ་དེ་ཡང་ནང་དུ་ཞུགས་ནས་མཐོང་བས་ཡིད་ཆེས་བྱས།

⁹འོན་ཀྱང་དེ་གཉིས་ཀྱིས་དཀོན་མཆོག་གི་གསུང་རབ་ཀྱི་མདོ་ལས་ཁོང་གཤིན་པོའི་ནང་ནས་གསོན་པོར་བཞེངས་དགོས་པ་དེ་དུས་ད་དུང་མ་རྟོགས།

¹⁰དེ་ནས་ཉེ་གནས་དེ་གཉིས་རང་གི་ཁྱིམ་ལ་ཕྱིར་ལོག

¹¹མིར་ཡམ་ནི་དུར་ཁང་གི་ཕྱི་ལ་ལངས་ནས་བསྡད་དེ་ངུ་བཞིན། བསྒུར་ནས་དུར་ཁང་གི་ནང་དུ་བལྟས་པ་དང༌།

¹²ཡེ་ཤུའི་སྐུ་སྤུར་བཞག་ཡོད་པའི་གནས་ལ་དཀོན་མཆོག་གི་ཕོ་ཉ་གོས་དཀར་པོ་གྱོན་པ་གཉིས་དབུའི་ཕྱོགས་སུ་གཅིག་དང་ཞབས་ཀྱི་ཕྱོགས་སུ་གཅིག་བཞུགས་པར་མཐོང༌།

¹³ཁོང་ཚོས་མིར་ཡམ་ལ་“བུ་མོ། ཁྱོད་རང་ཅི་ལ་ངུ་”ཞེས་དྲིས་པས་ལན་དུ་ཁོ་མོས་“ཁོ་ཚོས་ངའི་གཙོ་བོ་ཕར་ཁྱེར་ནས་གང་དུ་བཞག་པ་མི་ཤེས་”ཞེས་བཤད།

¹⁴མིར་ཡམ་ཁ་ཕྱིར་ལོག་སྟེ་ཡེ་ཤུ་དེར་བཞེངས་ནས་བཞུགས་ཡོད་པ་མཐོང་ཡང༌། ཡེ་ཤུ་ཡིན་པ་མ་ཤེས།

¹⁵ཡེ་ཤུས་ཁོ་མོར་“བུ་མོ། ཁྱོད་ཅི་ལ་ངུ༌། ཁྱོད་སུ་འཚོལ་”ཞེས་གསུངས་པ་དང༌། མིར་ཡམ་གྱིས་ཁོང་ནི་ཚལ་སྲུང་མཁན་ཡིན་པར་བསམས་ཏེ་“སྐུ་ཞབས་ལགས། གལ་ཏེ་ཁྱེད་ཀྱིས་ཁོང་འདི་ནས་ཕར་ཁྱེར་བ་ཡིན་ན། གང་དུ་བཞག་པ་ཤོད་དང༌། ངས་ཕར་འཁྱེར་བར་བྱ་”ཞེས་བཤད།

¹⁶ཡེ་ཤུས་ཁོ་མོར་“མིར་ཡམ་”ཞེས་གསུངས་པ་དང༌། ཁོ་མོས་ཁོང་གི་ཕྱོགས་སུ་བསྒྱུར་ཏེ་ཡ་ཧུ་དཱ་པའི་སྐད་དུ་“རབ་བུ་ནི་”ཞེས་བརྗོད། (དེ་ནི་སྟོན་པ་ལགས་ཞེས་པའི་དོན་ཡིན་)

¹⁷ཡེ་ཤུས་“ང་ད་དུང་ཡབ་ཀྱི་དྲུང་དུ་ཡར་མ་ཕྱིན་པས། ཁྱོད་ཀྱིས་ང་ལ་མ་ཟུངས་ཤིག ངའི་སྤུན་རྣམས་ཀྱི་དྲུང་དུ་སོང་སྟེ་ཁོ་ཚོར་ང་ནི་ང་རང་གི་ཡབ་དང་ཁྱེད་ཚོའི་ཡབ། ངའི་དཀོན་མཆོག་དང་ཁྱེད་ཚོའི་དཀོན་མཆོག་གི་དྲུང་དུ་ཡར་འགྲོའོ་ཞེས་གཏམ་བྱོས་ཤིག་”ཅེས་གསུངས།

¹⁸མག་རྡལ་ནས་ཡིན་པའི་མིར་ཡམ་ཡོང་སྟེ་ཉེ་གནས་རྣམས་ལ་“ངས་གཙོ་བོ་མཇལ་བྱུང་”ཞེས་ཟེར་ཞིང༌། ཁོང་གིས་ཁོ་མོར་གང་གསུངས་པ་རྣམས་ཀྱང་ཁོ་ཚོ་ལ་བཤད།

¹⁹བདུན་ཕྲག་གི་ཞག་དང་པོའི་དགོང་མོ་ཉེ་གནས་རྣམས་ཡ་ཧུ་དཱ་པ་ལ་འཇིགས་པས་གནས་དེའི་སྒོ་རྣམས་ཨ་ཤིང་བརྒྱབ་ཡོད་དུས། ཡེ་ཤུ་དེར་བྱོན་ཏེ་ཁོ་ཚོའི་དཀྱིལ་དུ་བཞེངས་ནས་“ཁྱེད་ཚོ་ཞི་བདེ་དང་ལྡན་པར་གྱུར་ཅིག་”ཅེས་གསུངས།

²⁰ཁོང་གིས་དེ་ལྟར་གསུངས་ནས་རང་གི་ཕྱག་དང་གཞོགས་ཁོ་ཚོ་ལ་བསྟན་ཅིང༌། ཉེ་གནས་རྣམས་ཀྱིས་གཙོ་བོ་མཇལ་བས་སེམས་དགའ་བར་གྱུར་རོ།

²¹དེ་ནས་ཡེ་ཤུས་ཡང་བསྐྱར་“ཁྱེད་ཚོ་ཞི་བདེ་དང་ལྡན་པར་གྱུར་ཅིག ཡབ་ཀྱིས་ང་མངགས་པ་ལྟར་ངས་ཀྱང་ཁྱེད་ཚོ་མངག་”ཅེས་གསུངས་རྗེས།

²²ཁོ་ཚོ་ལ་ཕུ་བསྐྱོན་ཏེ་“ཁྱེད་རྣམས་ལ་དཀོན་མཆོག་གི་དམ་པའི་ཐུགས་ཉིད་འཐོབ་པར་གྱུར་ཅིག

²³ཁྱེད་ཀྱིས་སུའི་སྡིག་ཉེས་བསལ་ན། དེ་ཚོའི་སྡིག་ཉེས་བསལ་ཟིན་ནོ། སུའི་སྡིག་ཉེས་མི་བསལ་ན། དེ་ལུས་པར་འགྱུར་རོ་”ཞེས་གསུངས།

²⁴འོན་ཀྱང་ཉེ་གནས་བཅུ་གཉིས་པོའི་ནང་ནས་མཚེ་མ་ཟེར་བའི་ཐོ་མཱ་ནི་ཡེ་ཤུ་ཕེབས་པའི་ཚེ་ཁོ་རྣམས་དང་མཉམ་དུ་མེད་པས།

²⁵ཉེ་གནས་གཞན་པ་རྣམས་ཀྱིས་ཁོ་ལ་“ང་ཚོས་གཙོ་བོ་མཇལ་བྱུང་”ཞེས་ཟེར། འོན་ཀྱང་ཁོས་ཁོ་ཚོར་“གལ་ཏེ་ངས་ཁོང་གི་ཕྱག་ལ་གཟེར་གྱི་ཤུལ་མཐོང་བ་དང༌། ངའི་མཛུག་གུ་གཟེར་གྱི་ཤུལ་ལ་འཇུག་པ། ལག་པ་ཡང་ཁོང་གི་གཞོགས་ཀྱི་མདུང་ཤུལ་ནང་དུ་བཅུག་ན་མ་གཏོགས། ངས་རྩ་བ་ནས་ཡིད་ཆེས་མི་བྱེད་”ཅེས་བཤད།

²⁶དེ་ནས་ཉིན་བརྒྱད་སོང་བ་དང༌། ཁོང་གི་ཉེ་གནས་རྣམས་ཡང་བསྐྱར་ནང་ལ་ཡོད་ཅིང༌། ཐོ་མཱ་ཡང་ཁོ་ཚོ་དང་མཉམ་དུ་ཡོད་པ་ཡིན། སྒོ་རྣམས་ལ་ཨ་ཤིང་བརྒྱབ་ཡོད་ཀྱང་ཡེ་ཤུ་དེར་བྱོན་ནས་ཁོ་ཚོའི་དཀྱིལ་དུ་བཞེངས་ཏེ་“ཁྱེད་ཚོ་ཞི་བདེ་དང་ལྡན་པར་གྱུར་ཅིག་”ཅེས་གསུངས།

²⁷དེ་ནས་ཁོང་གིས་ཐོ་མཱ་ལ་“ད་ཁྱོད་ཀྱི་མཛུག་གུ་འདིར་ཞོག་ཅིག ངའི་ལག་པ་ལ་ལྟོས། ཁྱོད་ཀྱིས་ལག་པ་བརྐྱངས་ཏེ་ངའི་གཞོགས་ཀྱི་ནང་དུ་ཆུག་ཅིག དད་མེད་ཀྱི་སེམས་སྤོངས་ལ་དད་པ་བྱོས་ཤིག་”ཅེས་གསུངས།

²⁸ལན་དུ་ཐོ་མཱས་“ངའི་གཙོ་བོ་དང་ངའི་དཀོན་མཆོག་ལགས་”ཞེས་བཤད།

²⁹ཡེ་ཤུས་ཁོང་ལ་“ཁྱོད་ཀྱིས་ང་མཐོང་བས་དད་པ་བྱེད་པ་ཡིན་ནམ། ང་མི་མཐོང་ཡང་དད་པ་རྣམས་བདེའོ་”ཞེས་གསུངས།

³⁰ཡང་མདོ་འདི་ལ་མ་བྲིས་པའི་རྟགས་གཞན་མང་པོ་ཡེ་ཤུས་ཉེ་གནས་རྣམས་ཀྱི་མདུན་དུ་མཛད།

³¹འོན་ཀྱང་ཁྱེད་ཚོས་ཡེ་ཤུ་ནི་སྐྱབས་མགོན་མཱ་ཤི་ཀ་དང་དཀོན་མཆོག་གི་སྲས་དེ་ཡིན་པར་དད་པ་བྱེད་པའི་ཕྱིར་དོན་འདི་ཚོ་བྲིས་ཡོད་ཅིང༌། ཁོང་ལ་དད་པ་བྱེད་པའི་སྒོ་ནས་ཁྱེད་ཚོ་ཁོང་གི་མཚན་གྱི་ཐོག་ནས་དཔག་ཏུ་མེད་པའི་ཚེ་འཐོབ་པའི་ཕྱིར་རོ། །