Read Central Tibetan Bible མཛད་པ། 13 Bible Online

མཛད་པ། 13 - Central Tibetan Bible bible

མཛད་པ། 13

¹ཨན་ཏི་ཡོག་ཡཱ་གྲོང་ཁྱེར་གྱི་ཆོས་ཚོགས་ལ་པར་ན་པཱ་དང༌། ནེ་གེར་ཞེས་བྱ་བའི་སི་མེ་ཡོན་དང༌། ད་དུང་སེ་རེ་ནཱ་གྲོང་ཁྱེར་ནས་ཡིན་པའི་ལུ་ཀི་ཡཱུ་དང༌། ས་གནས་དཔོན་པོ་ཧེ་རོ་དཱེ་ཡི་ཕོ་བྲང་ལ་འཚར་ལོངས་བྱུང་བའི་མཱ་ནཱ་ཧེན་དང༌། ཤ་ཨུལ་ཞེས་པའི་ལུང་སྟོན་པ་དང་ཆོས་སྟོན་མཁན་ཡོད།

²ཁོང་ཚོས་གཙོ་བོ་ལ་བསྙེན་བཀུར་བྱེད་ཅིང་སྨྱུང་གནས་སྲུང་བའི་དུས་སུ་དམ་པའི་ཐུགས་ཉིད་ཀྱིས་ཁོ་ཚོར་“ངའི་ཆེད་དུ་ཁྱོད་རྣམས་ཀྱིས་པར་ན་པཱ་དང་ཤ་ཨུལ་གཉིས་ང་ཡིས་འདེམས་པའི་ལས་སྒྲུབ་པའི་ཕྱིར་སྐོས་ཤིག་”ཅེས་གསུངས།

³དེ་ནས་ཁོ་ཚོས་སྨྱུང་གནས་བསྲུངས་ཏེ་སྨོན་ལམ་བཏབ་པ་དང༌། ཁོང་ཚོ་གཉིས་ཀྱི་ལུས་ལ་ལག་པ་བཞག་ནས་བཏང་ངོ༌། །[35]

⁴ཁོང་གཉིས་དམ་པའི་ཐུགས་ཉིད་ཀྱིས་མངགས་ཏེ་གྲུ་ཁའི་གྲོང་ཁྱེར་སེ་ལུ་ཀི་ཡཱ་ལ་ཕེབས་པ་དང༌། གྲུ་གཟིངས་ལ་བསྡད་ནས་ཀིབ་རུ་གླིང་ཕྲན་དུ་སླེབས།

⁵སཱ་ལ་མཱི་གྲོང་ཁྱེར་ལ་སླེབས་ནས་ཡ་ཧུ་དཱ་པའི་འདུ་ཁང་རྣམས་ལ་དཀོན་མཆོག་གི་བཀའ་བསྒྲགས། ཡང་ཡོ་ཧ་ནན་གྱིས་ཁོང་ཚོ་ལ་ལས་གྲོགས་བྱེད་བཞིན་ཡོད།[36]

⁶གླིང་ཕྲན་ཡོངས་སུ་བརྒྱུད་ནས་པཱ་ཕོ་གྲོང་ཁྱེར་ཙམ་ལ་ཕེབས་སྐབས། ཁོང་རྣམས་ལ་པཱར་ཡེ་ཤུ་ཞེས་ཟེར་བའི་སྔགས་པ་སྟེ་ཡ་ཧུ་དཱ་པའི་ལུང་སྟོན་པ་རྫུན་མ་ཞིག་དང་ཕྲད།

⁷མི་འདི་ནི་སྤྱི་ཁྱབ་སྟེ་བློ་གྲོས་ཅན་སེར་གིའུ་པའུ་ལུ་དང་མཉམ་དུ་འགྲོགས་པ་ཞིག་ཡིན། དཀོན་མཆོག་གི་བཀའ་ཐོས་པར་སྤྱི་ཁྱབ་དེས་པར་ན་པཱ་དང་ཤ་ཨུལ་གཉིས་བོས་ན་ཡང༌།

⁸སྔགས་པ་དེས་(གྷི་རིག་སྐད་དུ་ཨེ་ལི་མཱ་ཡང་ཟེར་) ཁོང་ཚོར་ངོ་རྒོལ་བྱས་པ་དང༌། སྤྱི་ཁྱབ་དད་པ་ལས་ཟློག་པའི་ཐབས་བཙལ།

⁹འོན་ཀྱང་ཤ་ཨུལ་(པའུ་ལུ་ཡང་ཟེར་) དཀོན་མཆོག་གི་དམ་པའི་ཐུགས་ཉིད་ཀྱིས་གང་བར་གྱུར་ཏེ་ཁོ་ལ་ནན་གྱིས་བལྟས་ཏེ།

¹⁰ཁོ་ལ་“ཁྱོད་ནི་བདུད་ཀྱི་བུ་ཡིན་ཏེ་དྲང་བ་ཐམས་ཅད་ཀྱི་དགྲ་བོ་ཡིན། གཡོ་སྒྱུ་དང་ངན་སེམས་ཀུན་གྱིས་གང་སྟེ་ཁྱོད་ཀྱིས་གཙོ་བོ་ཡེ་ཤུའི་ལམ་དྲང་པོ་འཁྱོག་པར་བྱེད་པ་མི་སྤོང་ངམ།

¹¹ད་ལྟོས་ཤིག དཀོན་མཆོག་གི་ནུས་མཐུ་ཁྱོད་ལ་བཏབ་ནས་ལོང་བར་འགྱུར་བས་རེ་ཞིག་ཁྱོད་ཀྱིས་ཉི་མའི་འོད་མཐོང་མི་ཐུབ་”ཅེས་གསུངས་པ་དང༌། འཕྲལ་དུ་ཁོའི་མིག་ལ་སྨུག་པ་དང་མུན་པ་ཡིས་འཐིབས་པས་ཁོས་ལག་པ་ནས་འཇུས་ཏེ་འཁྲིད་མཁན་བཙལ།

¹²སྤྱི་ཁྱབ་ཀྱིས་གང་བྱུང་བ་མཐོང་ནས་དད་པ་སྐྱེས། གཙོ་བོ་ཡེ་ཤུའི་བསྟན་པ་ཐོས་ནས་ངོ་མཚར་བར་གྱུར་རོ། །

¹³དེ་ནས་པའུ་ལུ་དང་ཁོང་གི་རོགས་པ་རྣམས་གྲུ་གཟིངས་ལ་བསྡད་དེ་པཱ་ཕོ་ནས་ཕམ་ཕིལ་ཡཱ་ཡུལ་གྱི་གྲོང་ཁྱེར་པེར་གཱ་ལ་ཕེབས་པ་དང༌། དེར་སླེབས་ནས་ཡོ་ཧ་ནན་ཁོང་རྣམས་དང་ཁ་བྲལ་ཏེ་ཡེ་རུ་ཤ་ལེམ་ལ་ཕྱིར་ལོག

¹⁴ཁོང་ཚོ་པེར་གཱ་ནས་ཕར་སོང་སྟེ་པི་སི་དི་ཡཱ་ཡུལ་གྱི་གྲོང་ཁྱེར་ཨན་ཏི་ཡོག་ཡཱ་ལ་ཕེབས་པ་དང༌། དེར་ངལ་གསོའི་ཉིན་མོར་ཁོང་རྣམས་འདུ་ཁང་ལ་ཕེབས་ནས་བཞུགས།

¹⁵བཀའ་ཁྲིམས་དང་ལུང་སྟོན་པའི་མདོ་ལས་བཀླགས་རྗེས་འདུ་ཁང་གི་དཔོན་པོས་“སྤུན་ཟླ་རྣམས། གལ་ཏེ་མི་རྣམས་ཀྱི་ཆེད་དུ་ཁྱེད་ལ་སྐུལ་བའི་གཏམ་ཞིག་ཡོད་ན་གསུངས་ཤིག་”ཅེས་པའི་ལན་ཁོང་རྣམས་ལ་བསྐུར།

¹⁶པའུ་ལུ་ཡར་ལངས་ཏེ་ལག་བརྡ་བྱས་ནས་འདི་ལྟར་གསུངས་“ཡི་སི་ར་ཨེལ་པ་དང་དཀོན་མཆོག་ལ་བསྙེན་བཀུར་བྱེད་མཁན་རྣམས། ང་ལ་ཉོན་དང༌།

¹⁷ཡི་སི་ར་ཨེལ་མི་རིགས་འདིའི་དཀོན་མཆོག་གིས་ང་ཚོའི་མེས་པོ་བདམས་ཤིང༌། ཨེ་ཇེབ་ཡུལ་ལ་སྡོད་པའི་དུས་སུ་ཁོ་རྣམས་ཤིན་ཏུ་མང་པོར་འཕེལ་བར་མཛད། ནུས་མཐུ་དང་ལྡན་པའི་ཕྱག་གིས་ཁོ་ཚོ་ཡུལ་དེ་ནས་ཕྱི་རོལ་ཏུ་འཁྲིད།

¹⁸ལོ་བཞི་བཅུ་ཙམ་གྱི་བར་དུ་འབྲོག་སྟོང་ལ་ཁོང་གིས་ཁོ་ཚོའི་སྤྱོད་པ་བཟོད་པར་མཛད།

¹⁹ཀ་ནཱན་ཡུལ་གྱི་མི་རིགས་བདུན་མེད་པར་མཛད་ནས་དཀོན་མཆོག་གིས་མེས་པོ་རྣམས་ལ་ཁོ་ཚོའི་ཡུལ་བགོས་སྐལ་དུ་གནང༌།

²⁰དོན་དེ་རྣམས་ལོ་བཞི་བརྒྱ་ལྔ་བཅུ་ཙམ་འགོར་བ་ཡིན། དེའི་རྗེས་སུ་ལུང་སྟོན་པ་ཤ་མུ་ཨེལ་གྱི་བར་དུ་ཁོང་གིས་ཁོ་ཚོར་ཁྲིམས་དཔོན་གྱི་ལམ་ལུགས་བཙུགས།

²¹དེ་ནས་ཁོ་ཚོས་རྒྱལ་པོ་སྐོ་བའི་ཞུ་བ་ཞུས་པས་དཀོན་མཆོག་གིས་ཡི་སི་ར་ཨེལ་གྱི་ཚོ་ཁག་པེན་ཡ་མཱིན་གྱི་ཚོ་ཁག་ནས་ཀི་སི་ཡི་བུ་ཤ་ཨུལ་རྒྱལ་པོར་བསྐོས་པར་མཛད། ཁོས་ལོ་བཞི་བཅུའི་རིང་རྒྱལ་པོ་བྱས།

²²དེ་ནས་དཀོན་མཆོག་གིས་ཁོ་གོ་གནས་ལས་འབེབས་པར་མཛད་པ་དང༌། དཱ་བིད་ཁོ་ཚོའི་རྒྱལ་པོར་བསྐོས། དཀོན་མཆོག་གིས་དཱ་བིད་ཀྱི་སྐོར་དཔང་པོ་མཛད་དེ་ཡེ་སེ་ཞེས་བྱ་བའི་བུ་དཱ་བིད་ནི་ངའི་སེམས་དང་མཐུན་པ་ཞིག་ཡིན་ཞིང༌། ཁོས་ངའི་བསམ་པ་ཐམས་ཅད་སྒྲུབ་པར་འགྱུར་རོ་ཞེས་གསུངས།

²³དཀོན་མཆོག་གིས་ཞལ་ཆད་གནང་བ་ལྟར། དཱ་བིད་ཀྱི་རྒྱུད་པ་རྣམས་ལས་ཁོང་གིས་ཡི་སི་ར་ཨེལ་ལ་སྐྱབས་མགོན་ཡེ་ཤུ་གནང་བ་ཡིན།

²⁴ཁོང་མ་འབྱོན་པའི་སྔོན་ལ་ཁྲུས་གསོལ་མཁན་ཡོ་ཧ་ནན་གྱིས་ཡི་སི་ར་ཨེལ་གྱི་མི་ཐམས་ཅད་ལ་སྤྱོད་པ་ངན་པ་སྤངས་ནས་སེམས་བསྒྱུར་བའི་རྟགས་སུ་ཁྲུས་གསོལ་ལེན་དགོས་པའི་འཕྲིན་བསྒྲགས་ཤིང༌།

²⁵ཡོ་ཧ་ནན་གྱིས་ལས་ཚར་བའི་སྐབས་ལ་ཁོང་གིས་ཁྱེད་ཀྱིས་ང་རང་སུ་རེད་སྙམ། ང་ཁོང་མ་ཡིན། ལྟོས་ཤིག ངའི་རྗེས་ལ་ཕེབས་མཁན་ནི་ཁོང་གི་ལྷམ་སྒྲོག་ཀྱང་འགྲོལ་བར་མི་འོས་ཞེས་གསུངས།

²⁶ཨབ་ར་ཧམ་གྱི་རྒྱུད་པ་སྟེ་ངའི་སྤུན་ཡིན་ཞིང༌། ཁྱེད་ཚོའི་ནང་ནས་དཀོན་མཆོག་ལ་བསྙེན་བཀུར་བྱེད་མཁན་རྣམས། ཐར་པ་འདིའི་འཕྲིན་ངེད་རྣམས་ལ་མངགས་ཡོད།

²⁷ཡེ་རུ་ཤ་ལེམ་པ་དང་ཁོ་ཚོའི་དཔོན་པོ་རྣམས་ཀྱིས་གཙོ་བོ་ཡེ་ཤུ་སྐྱབས་མགོན་ཡིན་པ་ངོ་མི་ཤེས་པ་དང༌། ངལ་གསོ་བའི་ཉིན་རེ་རེར་ལུང་སྟོན་པའི་བཀའ་གང་ཀློག་པའང་མི་ཤེས་པས། ཁོང་ལ་ཁྲིམས་གཅོད་གཏོང་བའི་སྒོ་ནས་བཀའ་དེ་རྣམས་བསྒྲུབས།

²⁸སྲོག་ཁྲིམས་གཏོང་དགོས་པའི་རྒྱུ་རྐྱེན་ཅི་ཡང་མ་རྙེད་ཀྱང༌། ཁོ་ཚོས་པི་ལ་ཏུ་ལ་ཁོང་སྲོག་གཅོད་གཏོང་བའི་ཞུ་བ་ཞུས།

²⁹ཁོ་ཚོས་ཁོང་གི་སྐོར་གང་བྲིས་ཡོད་པ་ཐམས་ཅད་བསྒྲུབས་ནས། མི་རྣམས་ཀྱིས་ཁོང་གི་སྐུ་ཕུང་རྒྱང་ཤིང་སྟེང་ནས་མར་ཕབ་སྟེ་དུར་ཁང་ལ་བཅུག

³⁰འོན་ཀྱང་དཀོན་མཆོག་གིས་ཁོང་འཆི་བ་ནས་སླར་གསོན་པར་མཛད།

³¹སྔར་ཁོང་དང་མཉམ་དུ་ག་ལིལ་ཡུལ་ནས་ཡེ་རུ་ཤ་ལེམ་ལ་ཡོང་བ་རྣམས་ཀྱིས་ཉིན་མང་པོའི་རིང་ཁོང་མཐོང་ཞིང༌། ད་ལྟ་ཁོ་རྣམས་ནི་མི་རྣམས་ལ་ཁོང་གི་དཔང་པོ་བྱེད་མཁན་ཡིན།

³²ང་ཚོས་ཁྱེད་རྣམས་ལ་འཕྲིན་བཟང་སྒྲོག་སྟེ། དཀོན་མཆོག་གིས་ང་ཚོའི་མེས་པོ་རྣམས་ལ་གང་ཞལ་གྱིས་བཞེས་པ་དེ།

³³གཙོ་བོ་ཡེ་ཤུ་ཡར་སློང་བར་མཛད་པའི་སྒོ་ནས་ཁོ་ཚོའི་རྒྱུད་པ་སྟེ་ངེད་རྣམས་ཀྱི་ཕྱིར་སྒྲུབ་པར་མཛད། གསུང་མགུར་གཉིས་པ་ལ་འཁོད་པ་བཞིན། ཁྱེད་ནི་ང་ཡི་བུ་ཉིད་ཡིན་པས་ན། ། དེ་རིང་ང་ནི་ཁྱེད་ཀྱི་ཕ་རུ་གྱུར། །[37]

³⁴ཡང་དཀོན་མཆོག་གིས་ཁོང་འཆི་བ་ནས་སླར་གསོན་པར་མཛད་དེ་ཡང་བསྐྱར་འགྲོངས་མི་སྲིད་པའི་སྐོར་འདི་ལྟར་གསུངས། ང་ཡིས་དཱ་བིད་ཉིད་ལ་སྤྲད་པ་བཞིན། ། ཡང་དག་བདེན་པའི་བྱིན་རླབས་ཁྱེད་ལ་སྦྱིན། །[38]

³⁵དེའི་ཕྱིར་ཁོང་གིས་གསུང་མགུར་གྱི་མདོ་གཞན་པ་ལས། ཁྱེད་ཀྱིས་རང་གི་སྐྱེས་བུ་དམ་པ་ཉིད། ། དུར་དུ་རུལ་བར་འཇུག་པ་ག་ལ་སྲིད། །[39] ཅེས་གསུངས།

³⁶རྒྱལ་པོ་དཱ་བིད་ནི་རང་གི་མི་རབས་ཀྱི་དུས་སུ་དཀོན་མཆོག་གི་དགོངས་པ་བསྒྲུབས་པའི་རྗེས་སུ་སྐུ་ཚེ་ལས་འདས་ཤིང༌། ཁོའི་མེས་པོའི་དུར་ཁང་གི་ཁྲོད་དུ་བཞག་ནས་སྐུ་སྤུར་རུལ་བར་གྱུར།

³⁷འོན་ཀྱང་དཀོན་མཆོག་གིས་བསླངས་པ་ནི་རུལ་བར་མ་གྱུར།

³⁸ངའི་སྤུན་ཟླ་རྣམས། དེའི་ཕྱིར་ཁོང་གི་ཐོག་ནས་སྡིག་ཉེས་སེལ་བ་ཁྱེད་རྣམས་ལ་སྒྲོག་པ་དེ་ཤེས་པར་གྱིས་ཤིག

³⁹ཁོང་ལ་དད་པ་བྱེད་མཁན་ཐམས་ཅད་ནི་མོ་ཤེའི་བཀའ་ཁྲིམས་ཀྱི་སྒོ་ནས་སེལ་མི་སྲིད་པའི་སྡིག་ཉེས་ཐམས་ཅད་ལས་ཐར་བར་འགྱུར་རོ།

⁴⁰ལུང་སྟོན་པས་གང་གསུངས་པ་ཁྱེད་རྣམས་ལ་མི་ཕོག་པའི་ཕྱིར་དོགས་ཟོན་གྱིས་ཤིག

⁴¹ང་ཡིས་ཁྱོད་ཀྱི་དུས་སུ་ལས་ཤིག་བྱེད། ། གཞན་གྱིས་དེ་དག་ཁྱོད་ལ་འཆད་གྱུར་ཀྱང༌། ། ཁྱོད་ཀྱིས་དེ་ལ་ནམ་ཡང་ཡིད་མི་ཆེས། ། ཁྱོད་ཚོ་འཕྱ་བར་བྱེད་མཁན་ལྟོས་ཤིག་ཨང༌། ། ངོ་མཚར་འགྱུར་ཞིང་འཇིག་པར་ཡང་འགྱུར་འོང༌། །”[40] ཞེས་གསུངས།

⁴²པའུ་ལུ་དང་པར་ན་པཱ་འདུ་ཁང་ནས་ཕྱིར་ཐོན་སྐབས། མི་རྣམས་ཀྱིས་ཁོང་གཉིས་ལ་ངལ་གསོ་བའི་ཉིན་རྗེས་མར་དོན་དེའི་སྐོར་ཡང་བསྐྱར་གསུང་དགོས་པར་བསྐུལ།

⁴³འདུ་ཁང་གི་ཚོགས་འདུ་གྲོལ་བའི་རྗེས་སུ་ཡ་ཧུ་དཱ་པ་དང༌། ཡ་ཧུ་དཱ་པའི་ཆོས་ལུགས་ལ་ཞུགས་པའི་ཡ་ཧུ་དཱ་པ་མིན་པ་སྟེ་དཀོན་མཆོག་ལ་བསྙེན་བཀུར་བྱེད་མཁན་རྣམས་ལས་མང་པོ་ཞིག་གིས་པའུ་ལུ་དང་པར་ན་པཱ་ཡི་རྗེས་སུ་འབྲངས། ཁོང་གཉིས་ཀྱིས་ཁོ་ཚོར་དཀོན་མཆོག་གི་ཐུགས་རྗེ་ལ་གནས་པར་བསྐུལ།

⁴⁴ངལ་གསོ་བའི་ཉིན་རྗེས་མར་གྲོང་ཁྱེར་གྱི་མི་མང་ཆེ་བ་གཙོ་བོ་དཀོན་མཆོག་གི་བཀའ་ཉན་པར་འདུས།

⁴⁵འོན་ཀྱང་ཡ་ཧུ་དཱ་པ་རྣམས་ཀྱིས་མི་ཚོགས་མཐོང་བས་ཕྲག་དོག་སྐྱེས་ཤིང༌། འཕྱ་དམོད་བྱས་ཏེ་པའུ་ལུས་གསུངས་པ་ལ་རྒོལ་བར་བྱས།

⁴⁶པའུ་ལུ་དང་པར་ན་པཱ་གཉིས་ཀྱིས་བློ་སྟོབས་ཆེན་པོས་“ང་ཚོས་དཀོན་མཆོག་གི་བཀའ་ཁྱེད་རྣམས་ལ་དང་པོར་བཤད་འོས་པ་ཡིན། འོན་ཀྱང་ཁྱེད་ཀྱིས་དཔག་ཏུ་མེད་པའི་ཚེ་འཐོབ་པ་མི་འོས་པ་ཡིན་པར་བསམས་ཏེ་དང་ལེན་མི་བྱེད་པས། ལྟོས་ཤིག ང་ཚོས་ད་ལྟ་ཡ་ཧུ་དཱ་པ་མིན་པ་རྣམས་ལ་ཆོས་བཤད་རྒྱུ་ཡིན།

⁴⁷གང་ཡིན་ཞེ་ན། གཙོ་བོས་ང་ཚོར་འདི་ལྟར་བཀའ་གནང་སྟེ། ང་ཡིས་ཁྱོད་ཉིད་ཕྱི་པ་རྣམས་ཀྱི་ཆེད། ། འཕྲོ་བར་བྱེད་པའི་འོད་དུ་བསྐོས་པ་ཡིན། ། དེ་ནི་ཁྱོད་ཀྱིས་ས་མཐའི་བར་དུ་ནི། ། ཆོས་དག་བསྒྲགས་ཅིང་ཐར་པ་འཐོབ་པའི་ཕྱིར། །”[41] ཞེས་གསུངས།

⁴⁸དེ་ཐོས་ནས་ཡ་ཧུ་དཱ་པ་མིན་པ་རྣམས་དགའ་བར་གྱུར་ཞིང་དཀོན་མཆོག་གི་བཀའ་ལ་བསྟོད་པ་ཕུལ། དཀོན་མཆོག་གིས་སྔར་ནས་དཔག་ཏུ་མེད་པའི་ཚེ་འཐོབ་པར་བསྐོས་པའི་མི་ཐམས་ཅད་དད་པར་གྱུར།

⁴⁹དེ་ལྟར་དཀོན་མཆོག་གི་བཀའ་ཡུལ་དེའི་ས་ཕྱོགས་གང་སར་ཁྱབ།

⁵⁰འོན་ཀྱང་ཡ་ཧུ་དཱ་པ་རྣམས་ཀྱིས་ཆོས་ལ་དགའ་བའི་རིགས་མཐོ་བའི་བུད་མེད་དང་གྲོང་ཁྱེར་གྱི་འགོ་ཁྲིད་བྱེད་པའི་སྐྱེས་པ་རྣམས་ལ་ངན་བསྐུལ་བྱས་ནས། པའུ་ལུ་དང་པར་ན་པཱ་གཉིས་ལ་གནོད་བསྐྱལ་ཏེ་ཁོ་ཚོའི་ཡུལ་ནས་ཕར་བསྐྲད།

⁵¹ཁོ་རྣམས་ལ་དོན་དེར་འགན་ཁུར་དགོས་པར་སྟོན་པའི་ཕྱིར་ཁོང་རྣམས་ཀྱིས་རྐང་པའི་སྟེང་གི་ས་རྡུལ་ཁོ་ཚོའི་ཕྱོགས་སུ་སྤྲུགས་ནས་ཨི་ཀོན་ཡཱུ་ཞེས་པའི་གྲོང་ཁྱེར་ལ་ཕེབས།

⁵²ཡང་ཉེ་གནས་རྣམས་ནི་དགའ་སྤྲོ་དང༌། དཀོན་མཆོག་གི་དམ་པའི་ཐུགས་ཉིད་ཀྱིས་གང་བར་འགྱུར་རོ། །