Read Central Tibetan Bible མཛད་པ། 20 Bible Online

མཛད་པ། 20 - Central Tibetan Bible bible

མཛད་པ། 20

¹འཁྲུག་པ་དེ་ཞི་བར་གྱུར་བའི་རྗེས་སུ་པའུ་ལུས་ཉེ་གནས་རྣམས་བོས་ཏེ་བསྐུལ་བར་མཛད་ཅིང༌། གྱེས་མཚམས་ཞུས་ནས་མ་ཀེ་དོན་ཡཱ་ཡུལ་དུ་ཕེབས།

²དད་ལྡན་རྣམས་ལ་སྐུལ་མ་མང་པོ་གནང་སྟེ་ཡུལ་དེ་རྣམས་བརྒྱུད་ནས་ཕེབས་ཤིང༌། དེའི་རྗེས་སུ་ཁོང་གྷི་རིག་ཡུལ་དུ་སླེབས་ནས།

³ཟླ་བ་གསུམ་དེར་བཞུགས། ཁོང་གྲུ་གཟིངས་ལ་བསྡད་ནས་སི་རི་ཡཱ་ཡུལ་ལ་ཕེབས་གྲབས་ཡོད་པའི་སྐབས་སུ། ཡ་ཧུ་དཱ་པ་རྣམས་ཀྱིས་ཁོང་གསོད་པའི་ཇུས་ངན་བརྩམས་པས་ཁོང་གིས་མ་ཀེ་དོན་ཡཱ་ཡུལ་བརྒྱུད་ནས་ཕྱིར་ཕེབས་རྒྱུར་ཐག་བཅད་དོ།

⁴ཁོང་དང་མཉམ་དུ་འགྲོ་མཁན་ནི་པིར་རུ་ཡི་བུ་པུ་རེ་ཡཱ་ནས་ཡིན་པའི་སཱོ་པ་ཏེར་དང༌། ཐེ་ས་ལོ་ནི་ཀེ་ནས་ཡིན་པའི་ཨ་རིས་ཐར་ཀུ་དང་སེ་ཀུན་ཊུ་གཉིས། ཌེར་པེ་ནས་ཡིན་པའི་ག་ཡུ། ཐི་མོ་ཐེ། ཨེ་ཞེ་ཡཱ་ཞིང་ཆེན་ནས་ཡིན་པ་ཏི་ཀི་ཀུ་དང་ཏྲོ་ཕེ་མུ་བཅས་ཡིན།

⁵ཁོ་ཚོ་ཚང་མ་སྔོན་དུ་ཕྱིན་ནས་ང་ཚོ་མ་སླེབས་པའི་བར་དུ་ཏྲོ་ཡཱ་གྲོང་ཁྱེར་དུ་བསྒུགས།

⁶སྐྱུར་རྩི་མེད་པའི་བག་ལེབ་དུས་ཆེན་གྱི་རྗེས་སུ་ང་ཚོ་ཕི་ལིབ་པཱི་གྲོང་ཁྱེར་ནས་གྲུ་གཟིངས་ལ་ཉི་མ་ལྔ་བསྡད་རྗེས་ཏྲོ་ཡཱ་ལ་ཁོ་ཚོ་དང་ཐུག་ཅིང༌། ཉི་མ་བདུན་དེར་བསྡད།

⁷བདུན་ཕྲག་གི་ཉིན་དང་པོར་ང་ཚོ་བག་ལེབ་བགོ་བཤའ་རྒྱག་པར་འཛོམས་པའི་ཚེ། པའུ་ལུས་དེའི་སང་ཉིན་ཕར་ཕེབས་པར་དགོངས་པས་ནམ་ཕྱེད་བར་དུ་ཆོས་བསྟན་ཏེ་བཞུགས།

⁸ང་ཚོ་ལྷན་དུ་འཛོམས་པའི་ཐོག་ཁང་ལ་མར་མེ་མང་པོ་ཡོད།

⁹ཡང་སྒེའུ་ཁུང་གི་འཁྲིས་སུ་བསྡད་པའི་ཡུ་ཏི་ཀུ་ཞེས་ཟེར་བའི་གཞོན་ནུ་ཞིག་ཡོད་དེ། པའུ་ལུས་ཡུན་རིང་པོར་ཆོས་བསྟན་དུས་ཁོ་གཉིད་ལྗིད་པོ་ཁུགས་པས་ཐོག་ས་གསུམ་པ་ནས་སར་ལྷུངས་པ་དང༌། མི་གཞན་གྱིས་འཁྱེར་དུས་ཤི་ཟིན་ཡོད་དོ།

¹⁰པའུ་ལུ་མར་ཕེབས་ནས་རོའི་སྟེང་ལ་བཀབ་ནས་འཐམས། ཁོང་གིས་“གསོན་པོར་འདུག་པས་དངངས་སྐྲག་མ་བྱེད་ཅིག་”ཅེས་གསུངས།

¹¹ཐོག་ཁང་དུ་ཕྱིར་ཕེབས་ནས་ཁོང་གིས་གཙོ་བོའི་དྲན་རྟེན་གྱི་ཞལ་ཟས་སྤྱོད་པ་དང་ཁ་ལག་བཟས་ཤིང༌། ནམ་ལངས་པའི་བར་དུ་ཁོ་ཚོ་དང་གསུང་གླེང་མང་པོ་མཛད་ནས་ཕར་ཕེབས།

¹²གསོན་པོའི་གཞོན་ནུ་དེ་ནང་ལ་འཁྲིད་པས་ཁོ་ཚོ་སེམས་ཤིན་ཏུ་གསོ་བར་གྱུར།

¹³པའུ་ལུའི་བཀོད་སྒྲིག་ལྟར་ང་ཚོ་སྔོན་དུ་ཕྱིན་ནས་ཨ་སཱོ་ཞེས་པའི་གྲོང་ཁྱེར་བར་དུ་གྲུ་གཟིངས་ལ་བསྡད་དེ་དེར་པའུ་ལུ་དང་ཕྲད་ནས་ང་ཚོ་ཚང་མ་གྲུ་གཟིངས་ལ་བཞུགས་ནས་ཕར་འགྲོ་བར་བསམས། པའུ་ལུ་ཉིད་ཞབས་ཐང་ལ་ཕེབས་རྩིས་གནང༌།

¹⁴ཨ་སཱོ་ལ་ཁོང་ང་ཚོ་དང་མཇལ་ནས་གྲུ་གཟིངས་ལ་བསུས་ཏེ་མཉམ་དུ་མི་ཏི་ལེ་ནེ་གྲོང་ཁྱེར་དུ་སླེབས་ཤིང༌།

¹⁵ས་ཆ་དེ་ནས་ཡང་བསྐྱར་གྲུ་གཟིངས་ལ་བསྡད་དེ་ཕྱི་ཉིན་ལ་ཀི་ཨོ་སི་ཞེས་པའི་གླིང་ཕྲན་གྱི་ཕྱོགས་སུ་སླེབས། དེའི་སང་ཉིན་སཱ་མོ་སི་ཞེས་པའི་གླིང་ཕྲན་དུ་ཡོང་བ་དང༌། དེའི་ཕྱི་ཉིན་མི་ལེ་ཏུ་ཞེས་ཟེར་བའི་གྲུ་ཁར་སླེབས།

¹⁶གང་ཡིན་ཞེ་ན། པའུ་ལུས་ཨེ་ཞེ་ཡཱ་ཞིང་ཆེན་ལ་དུས་འགྱངས་མ་བྱེད་པའི་ཆེད་དུ་ཨེ་ཕེ་སུ་གྲོང་ཁྱེར་ལ་མི་འགྲོ་བར་ཐག་གཅོད་བྱས། དེ་ནི་མྱུར་བར་བསྐྱོད་ནས་ཉི་མ་ལྔ་བཅུ་པའི་དུས་ཆེན་གྱི་ཉིན་མོར་ཡེ་རུ་ཤ་ལེམ་ལ་སླེབས་ན་སྙམ་པས་སོ། །

¹⁷མི་ལེ་ཏུ་ནས་པའུ་ལུས་ཨེ་ཕེ་སུའི་ཆོས་ཚོགས་ཀྱི་འགན་འཁུར་བ་རྣམས་རང་གི་མདུན་དུ་བོས་པ་དང༌།

¹⁸ཁོང་གི་མདུན་དུ་སླེབས་ནས་ཁོང་གིས་ཁོ་རྣམས་ལ་“ང་ཨེ་ཞེ་ཡཱ་ཞིང་ཆེན་དུ་སླེབས་པའི་ཉིན་དང་པོ་ནས་བཟུང་ཁྱེད་ཚོའི་ཁྲོད་དུ་ངའི་སྤྱོད་ལམ་ཇི་ལྟར་ཡིན་པ་ཁྱེད་རྣམས་ཀྱིས་ཤེས།

¹⁹ཆེས་ཉམ་ཆུང་དང་མིག་ནས་མཆི་མ་ལྷུངས་ཤིང་ངས་གཙོ་བོ་ལ་ཞབས་ཏོག་བསྒྲུབས། ཡ་ཧུ་དཱ་པའི་ཇུས་ངན་ལས་བྱུང་བའི་ཉམས་ཚོད་མྱོང༌།

²⁰ཁྱེད་རྣམས་ལ་ཕན་པའི་དོན་གང་ཡོད་སྒྲོག་པར་མ་འཛེམ་པར་ངས་མི་ཚོགས་ཀྱི་མདུན་དང་ཁང་པ་རེ་རེར་ཆོས་བསྟན།

²¹ངས་ཡ་ཧུ་དཱ་པ་དང་གྷི་རིག་པ་གཉིས་ལ་སྤྱོད་པ་ངན་པ་སྤངས་ནས་དཀོན་མཆོག་གི་ཕྱོགས་སུ་སེམས་བསྒྱུར་ཏེ་ང་ཚོའི་གཙོ་བོ་ཡེ་ཤུ་ལ་དད་པ་བྱེད་དགོས་པར་ནན་གྱིས་བསྐུལ།

²²ད་ལྟ་དམ་པའི་ཐུགས་ཉིད་ཀྱིས་བསྐུལ་ནས་ཡེ་རུ་ཤ་ལེམ་ལ་འགྲོ་བཞིན་ཡོད། དེར་ང་ལ་གང་འབྱུང་བ་མི་ཤེས་ཀྱང༌།

²³གྲོང་ཁྱེར་རེར་དམ་པའི་ཐུགས་ཉིད་ཀྱིས་ང་ལ་བཙོན་དང་སྡུག་བསྔལ་མྱོང་བར་འགྱུར་ཞེས་བདེན་དཔང་མཛད་པ་དེ་འབའ་ཞིག་ཤེས།

²⁴འོན་ཀྱང་ངས་རང་གི་བགྲོད་ལམ་མཇུག་རྫོགས་དགོས་ཏེ་གཙོ་བོ་ཡེ་ཤུ་ལས་ཐོབ་པའི་དཀོན་མཆོག་གི་ཐུགས་རྗེའི་འཕྲིན་བཟང་ལ་བདེན་དཔང་བྱེད་པའི་ཞབས་ཏོག་དང་ལས་དོན་བསྒྲུབས་ན། ངས་རང་སྲོག་གཅེས་པར་མི་རྩི།

²⁵ཁྱེད་ཚོའི་ཁྲོད་དུ་ཕར་འགྲོ་ཚུར་འོངས་ཀྱིས་དཀོན་མཆོག་གི་རྒྱལ་སྲིད་ཀྱི་འཕྲིན་བཟང་སྒྲོག་སྟེ། ད་ནས་བཟུང་ཁྱེད་ཚོ་ཚང་མས་ངའི་གདོང་མཐོང་བར་མི་འགྱུར་བ་ངས་ཤེས།

²⁶དེའི་ཕྱིར་ཁྱེད་ཚོའི་ནང་ནས་སུ་ཞིག་གཙོ་བོ་ཡེ་ཤུ་ལ་དད་པ་མི་བྱེད་པར་ཤི་ན། ང་ལ་འགན་མེད་པ་ཡིན་པར་དེ་རིང་ཁྱེད་ཚོར་དཔང་པོ་བྱེད།

²⁷གང་ལགས་ཤེ་ན། ངས་ཁྱེད་རྣམས་ལ་དཀོན་མཆོག་གི་དགོངས་པ་ཆ་ཚང་སྒྲོག་པར་མ་འཛེམས་པས་སོ།

²⁸དམ་པའི་ཐུགས་ཉིད་ཀྱིས་ཁྱེད་ཚོ་ཆོས་ཚོགས་ཀྱི་དོ་དམ་པར་བསྒྱུར་བས་ཁྱེད་ཚོ་རང་ཉིད་དང་ཆོས་ཚོགས་ཀྱི་མི་ཐམས་ཅད་སྲུངས། དེ་ནི་དཀོན་མཆོག་གིས་སྲས་ཀྱི་སྐུ་ཁྲག་བླུ་རིན་གྱིས་ཐོབ་པའི་ཆོས་ཚོགས་ལ་ཁྱེད་ཚོས་ལུག་རྫི་ལྟར་བདག་སྐྱོང་བྱེད་པའི་ཆེད་དུ་ཡིན།

²⁹ང་ཕར་ཕྱིན་པའི་རྗེས་སུ་སྤྱང་ཀི་གདུག་པ་དང་འདྲ་བའི་མི་རྣམས་ལུག་ཁྱུ་དང་འདྲ་བའི་ཁྱེད་ཚོའི་དཀྱིལ་ལ་ཡོང་ནས་དད་ལྡན་རྣམས་ལ་གནོད་པ་བྱེད་པ་ངས་ཤེས།

³⁰ཁྱེད་ཚོའི་ཚོགས་པའི་ནང་ནས་ཀྱང་ཁ་ཅིག་གིས་དད་ལྡན་རྣམས་རང་གི་ཉེ་གནས་སུ་འཇུག་པའི་ཕྱིར་ལོག་ལྟ་སྟོན་པར་ངེས།

³¹དེར་བརྟེན་དོགས་ཟོན་གྱིས་ཤིག ལོ་གསུམ་རིང་ངས་ཉིན་མཚན་མེད་པར་མིག་ཆུ་དང་བཅས་པར་མི་རེ་རེར་ཁ་ཏ་བྱས་པ་དེ་ཡིད་ལ་འཇོག་ཅིག

³²ད་ངས་དཀོན་མཆོག་དང་ཁོང་གི་ཐུགས་རྗེའི་བཀའ་ལ་ཁྱེད་རྣམས་འཆོལ། བཀའ་དེས་ཁྱེད་ཚོར་བློ་སྒོ་འབྱེད་ཅིང་དམ་པ་རུ་འགྱུར་བ་ཐམས་ཅད་དང་མཉམ་དུ་དཀོན་མཆོག་གིས་ཞལ་ཆད་གནང་བའི་བྱིན་རླབས་ཀྱི་བགོ་སྐལ་གནང་ཐུབ་བོ།

³³ངས་མི་སུ་གང་གི་དངུལ་ལམ། གསེར་རམ། གྱོན་གོས་བཅས་ལ་ཧམ་སེམས་བཅངས་མེད།

³⁴ངས་རང་གི་ལག་པ་གཉིས་ལ་བརྟེན་ནས་ང་དང་ངའི་ལས་རོགས་ཀྱི་དགོས་མཁོ་བསྒྲུབས་པ་ཁྱེད་ཉིད་ཀྱིས་ཤེས།

³⁵གཙོ་བོ་ཡེ་ཤུ་ཉིད་ཀྱིས་ཐོབ་པ་ལས་སྦྱིན་པ་བདེ་བ་ཆེའོ་ཞེས་གསུངས་པར་དྲན་ཏེ། དེ་བཞིན་དུ་ངལ་རྩོལ་བྱེད་པའི་སྒོ་ནས་ངས་ཐབས་ཀུན་གྱིས་ཁྱེད་ཚོར་སྐྱོ་པོ་རྣམས་ལ་རོགས་པ་བྱེད་དགོས་པའི་མིག་དཔེ་ཞིག་བསྟན་ཡོད་”ཅེས་གསུངས་པའི་རྗེས་སུ།

³⁶པུས་མོ་སར་བཙུགས་ཏེ་ཁོང་གིས་ཁོ་ཚོ་ཐམས་ཅད་དང་མཉམ་དུ་སྨོན་ལམ་བཏབ།

³⁷ཤུགས་ཆེན་པོར་ངུས་ཏེ་ཁོ་ཚོ་ཐམས་ཅད་ཀྱིས་པའུ་ལུ་ལ་འཐམས་ནས་འགྲམ་པར་འོ་བྱས།

³⁸ཁོང་གིས་ད་ནས་བཟུང་ངའི་གདོང་རྩ་བ་ནས་མཐོང་བར་མི་འགྱུར་ཞེས་གསུངས་པས་ཁོ་ཚོའི་སེམས་ཧ་ཅང་སྐྱོ་བར་གྱུར། དེ་ནས་ཁོ་ཚོས་པའུ་ལུ་གྲུ་གཟིངས་ལ་བསྐྱལ་ལོ། །